Uthenga Wamampha wo Ukulembeka ndi Luka 1:1-80

JULANI

Mazu kwaku Teyofilo (1-4)
Gabiriyeli wakambiya limu va kuwaku kwaku Yohane Mubatizi (5-25)
Gabiriyeli wakambiya limu va kuwaku kwaku Yesu (26-38)
Mariya waluta kwaku Elizabeti (39-45)
Mariya wakuzga Yehova (46-56)
Kuwaku kwaku Yohane ndi kupaskika zina (57-66)
Uchimi waku Zekariya (67-80)

1 Ndawona kuti ŵanthu anandi ayesesa kuwunganisa nkhani za vakuchitika chayivu vo tosi tiwona kuti vauneneska,+ ² nge mo angutikambiya ŵanthu wo anguwona ndi masu kutuliya pakwamba,+ wo ŵenga so ateŵeti a uthenga wo.+ ³ Chifukwa chakuti ndafufuza mwakuphwere vinthu vosi kwamba pakwamba, nani ndawona kuti ndikulembiyeni mwandondomeku yimwi wakutumbikika Teyofilo.+ ⁴ Ndachitiya kuti musimikizi kuti vinthu vo mwaja muchisambizika pamulomu, vauneneska.+ ⁵ Mu mazuŵa ngaku Herodi,*+ fumu ya ku Yudeya, kwenga wasembi munyaki yo wadanikanga kuti Zekariya wa mu gulu laku Abiya.+ Muwolu waki wenga yumoza mwa ŵana aku Aroni ndipu zina laki wenga Elizabeti. ⁶ Wosi ŵaŵi ŵenga arunji kwaku Chiuta ndipu ŵengavi kalema pa marangu ngosi ndi vyeruzgu vaku Yehova.* ⁷ Kweni ŵengavi mwana chifukwa Elizabeti wenga chumba ndipu wosi ŵenga arara ukongwa. ⁸ Sonu Zekariya wachiteŵete nge wasembi kumiya gulu laki+ pa masu paku Chiuta ⁹ mwakukoliyana ndi dangu la asembi,* wangusere mumalu ngakupaturika ngaku Yehova*+ nyengu yaki yakuti wapereke sembi ya vakununkhira+ yati yakwana. ¹⁰ Gulu losi la ŵanthu lapempheranga kubwalu kwa malu ngakupaturika pa nyengu yakupereke sembi ya vakununkhira. ¹¹ Sonu mungelu waku Yehova* wanguza kwaku iyu ndipu wanguma kumaryi kwa guŵa la sembi za vakununkhira. ¹² Kweni Zekariya wati wawona venivi, wangusuzgika maŵanaŵanu ndipu wanguchita mantha ukongwa. ¹³ Mungelu yo wangumukambiya kuti: “Ungawopanga cha Zekariya chifukwa pempheru laku lakuŵeyere lavwika, muwolu waku Elizabeti wazakukubaliya mwana munthulumi ndipu uzimupaski zina lakuti Yohane.+ ¹⁴ Yiwi wazamuja ndi likondwa likulu ukongwa ndipu ŵanthu anandi azamukondwa chifukwa cha kuwa kwa mwana yo,+ ¹⁵ pakuti wazamuja wakuzirwa pa masu paku Yehova.*+ Kweni wangazimwanga vinyu cha pamwenga moŵa wewosi+ ndipu wazamuzazika ndi mzimu wakupaturika chinanga mphanyengu yo wazamuja wechendaweku.*+ ¹⁶ Ndipu iyu wazamuwovya kuti Ayisirayeli anandi awere kwaku Yehova* Chiuta wawu.+ ¹⁷ Iyu wazamudanjiya panthazi paku Chiuta ndi mzimu kweniso nthazi zaku Eliya,+ kuti wang’anamuliyi mitima ya awusewu ku ŵana+ ndipuso kuti wang’anamuwi ŵanthu ambula kuvwiya kuti aje ndi zeru za ŵanthu arunji. Wazamuchita ivi kuti wawunganisiyi Yehova* ŵanthu akunozgeka.”+ ¹⁸ Zekariya wangukambiya mungelu kuti: “Ndingasimikiza wuli venivi? Chifukwa ini ndakota ndipu muwolu wangu nayu ndi mura.” ¹⁹ Mungelu yo wangumumuka kuti: “Ini ndini Gabiriyeli,+ ndituma pa masu paku Chiuta+ ndipu wandituma kuti ndizikambiskani nawi kweniso kuti ndizikukambiyi uthenga wamampha wenuwu. ²⁰ Kweni awona! ujengi mbuwu ndipu uŵereŵetengi cha mpaka pa zuŵa lo vinthu venivi vazamuchitikiya chifukwa wangagomezga cha mazu ngangu ngo ngazamufiskika pa nyengu yakuŵikika.” ²¹ Pa nyengu yosi iyi, ŵanthu alindizganga Zekariya ndipu anguzizwa chifukwa wangusweramu ukongwa mumalu ngakupaturika. ²² Wati watuwamu, watondekanga kulongoro nawu ndipu yiwu anguziŵa kuti wawona chakuziziswa* mumalu ngakupaturika. Iyu watondekanga kulongoro kweni wagwiriskiyanga ntchitu manja. ²³ Mazuŵa nga uteŵeti waki wakupaturika ngati ngamala, wanguwere kunyumba kwaki. ²⁴ Pati pajumpha mazuŵa, muwolu waki Elizabeti wangume nthumbu ndipu wanguja mwakubisama kwa myezi yinkhondi. Iyu wakambanga kuti: ²⁵ “Ivi ndivu Yehova* wandichitiya mazuŵa nganu. Iyu wandikumbuka kuti ŵanthu aleki kundinyoza.”+ ²⁶ Elizabeti we ndi nthumbu ya myezi 6, mungelu Gabiriyeli,+ wangutumika ndi Chiuta kuti waluti ku Galileya mutawuni ya Nazareti, ²⁷ kuchikumana ndi mwali+ yo Yosefi wa munyumba yaku Davidi wangumulayizga kuti watoranengi nayu. Mwali yo wadanikanga kuti Mariya.+ ²⁸ Mungelu yo wati wafika wangumukambiya kuti: “Timoneni yiwi wakutumbikika ukongwa. Yehova* we nawi.” ²⁹ Kweni iyu wangutimbanyizgika maŵanaŵanu chifukwa cha vo wangumukambiya, ndipu wangutondeka kuvwisa vo moni wo wang’anamuwanga. ³⁰ Sonu mungelu wangumukambiya kuti: “Ungawopanga cha Mariya pakuti Chiuta wakutumbika. ³¹ Awona! wazamuja ndi nthumbu ndipu wazamubala mwana munthulumi.+ Mwana yo uzimupaski zina lakuti Yesu.+ ³² Iyu wazamuja wakuzirwa+ ndipu wazamudanika kuti Mwana wa Wapachanya Limu.+ Yehova* Chiuta wazakumupaska mpandu waufumu wa awisi a Davidi.+ ³³ Iyu wazamulamuliya nge Fumu kwamuyaya panyumba yaku Yakobe, ndipu Ufumu waki wazamumala cha.”+ ³⁴ Kweni Mariya wangukambiya mungelu yo kuti: “Vingachitika wuli venivi, pakuti ini ndechendagonanepu ndi munthulumi?”+ ³⁵ Mungelu wangumumuka kuti: “Mzimu wakupaturika uzengi paku yiwi+ ndipu nthazi ya Wapachanya Limu yazakukubenekere. Mwaviyo, yo wazamuwaku wazamudanika kuti wakupaturika,+ Mwana waku Chiuta.+ ³⁶ Awona! Elizabeti mubali waku, yo wadanikanga kuti chumba, we ndi nthumbu ya mwana munthulumi ya myezi 6 chinanga kuti ngwakukota. ³⁷ Ve viyo chifukwa palivi mazu ngo* Chiuta wangatondeka kufiska.”+ ³⁸ Sonu Mariya wangukamba kuti: “Awonani! Nde kapolu munthukazi waku Yehova!* Vichitiki kwaku ini mwakukoliyana ndi mazu nginu.” Wati wakamba mazu yanga, mungelu wangutuwaku kwaku iyu. ³⁹ Sonu mu mazuŵa ngeningo, Mariya wangusoka mwaliŵiliŵi ndi kuluta kutawuni ya Yuda yo yenga kuchigaŵa chamapiri. ⁴⁰ Iyu wangusere munyumba yaku Zekariya ndipu wangutawuzga Elizabeti. ⁴¹ Ndipu Elizabeti wati wavwa ŵaka moni wo, mwana yo wenga mumoyu mwaki wanguvuluvunthuka. Sonu Elizabeti wanguzazika ndi mzimu wakupaturika, ⁴² ndipu wangudaniriza kuti: “Ndiwi wakutumbikika pakati pa anthukazi ndipuso ntchakutumbikika chipasu cha mumoyu mwaku! ⁴³ Nde ndi mwaŵi ukongwa ini, kuti nyina wa Mbuyangu wazi kwaku ini! ⁴⁴ Awona! Ndati ndavwa ŵaka moni waku, mwana yo we mumoyu mwangu wavuluvunthuka chifukwa cha likondwa. ⁴⁵ Ngwakukondwa so munthukazi yo wagomezga, pakuti vosi vo Yehova* wamukambiya vazamufiskika nadi.” ⁴⁶ Mariya wangukamba kuti: “Umoyu wangu ukuzga Yehova,*+ ⁴⁷ ndipu mtima wangu ulekengi cha kukondwa mwaku Chiuta, Mtaski wangu,+ ⁴⁸ chifukwa iyu wakumbuka kapolu waki munthukazi wapasi ukongwa.+ Pakuti awonani! kwamba sonu migonezi yosi ya ŵanthu yazamukamba kuti nde wakukondwa.+ ⁴⁹ Chifukwa Wanthazi wandichitiya vinthu vikulu, ndipu zina laki ndakupaturika.+ ⁵⁰ Ndipu wachitiya lisungu ŵanthu wo atimuwopa kutuwa mugonezi mpaka mugonezi.+ ⁵¹ Iyu wachita vinthu mwanthazi ndi janja laki; ndipu wambininiska ŵanthu a mitima yakujikuzga.+ ⁵² Wasiska ŵanthu amazaza pa mipandu yawu yaufumu+ ndipu wakweza ŵanthu apasi.+ ⁵³ Ŵanthu anja waŵagutisa ndi vinthu vamampha+ ndipu achuma waŵaweza kwambula kanthu. ⁵⁴ Iyu wawovya mteŵeti waki Isirayeli, ndipu chifukwa cha lisungu laki wamukumbuka+ ⁵⁵ kwamuyaya nge mo wangukambiya apapi ŵidu akali, Abrahamu kweniso ŵana ŵaki.”*+ ⁵⁶ Mariya wanguja ndi Elizabeti kwa myezi pafufupi yitatu, pavuli paki wanguwere kwaki. ⁵⁷ Sonu nyengu yingukwana yakuti Elizabeti wabali, ndipu wangubala mwana munthulumi. ⁵⁸ Ŵanthu apafupi kweniso abali ŵaki anguvwa kuti Yehova* wamuchitiya lisungu likulu ndipu angukondwa ukongwa.+ ⁵⁹ Pa zuŵa la 8, anguza kuzidumuwa mwana yo+ ndipu angumupaska zina la awisi lakuti, Zekariya. ⁶⁰ Kweni anyina angumuka kuti: “Awa! zina laki ndi Yohane.” ⁶¹ Ŵati avwa venivi, angumukambiya kuti: “Palivi mubali waku chinanga njumoza yo wakudanikapu zina lenili.” ⁶² Sonu angufumba awisi mwakugwiriskiya ntchitu manja kuti akambi zina lo apenja kupaska mwana wawu. ⁶³ Zekariya wangupempha chakulembapu ndipu wanguŵalembe kuti: “Zina laki ndi Yohane.”+ Wosi anguzizwa ukongwa ndi venivi. ⁶⁴ Nyengu yeniyo, mulomu waki ungujulika kweniso lilimi laki lingufwatuka ndipu wangwamba kulongoro+ ndi kuthamika Chiuta. ⁶⁵ Ŵanthu wosi wo ajanga nawu kufupi angwamba kuchita mantha ndipu ajaliyanga ŵaka kukamba nkhani yeniyi muchigaŵa chosi chamapiri cha Yudeya. ⁶⁶ Ŵanthu wosi wo anguvwa aŵanaŵaniyanga venivi, ndipu akambanga kuti: “Kumbi mwana mwenuyu wazamuja wamtundu wuli?” Chifukwa janja laku Yehova* lenga nadi ndi mwana yo. ⁶⁷ Sonu awisi a Zekariya, anguzazika ndi mzimu wakupaturika, ndipu angukamba uchimi wakuti: ⁶⁸ “Walumbiki Yehova* Chiuta waku Isirayeli,+ chifukwa wakumbuka ŵanthu ŵaki ndipu waŵapingiya utaski.+ ⁶⁹ Ndipuso watisoske sengwi lautaski*+ munyumba yaku Davidi mteŵeti waki,+ ⁷⁰ nge mo wangukambiya kuporote mwa achimi ŵaki akupaturika kutuliya kali,+ ⁷¹ kuti watitaskengi kwa arwani ŵidu kweniso mu manja mwa ŵanthu wosi wo atititinkha.+ ⁷² Kuti watichitiyi lisungu chifukwa cha apapi ŵidu akali kweniso kuti wakumbuki phanganu laki lakupaturika,+ ⁷³ layizgu lo wangulapizgiya Abrahamu mpapi widu wakali,+ ⁷⁴ kuti asani watitaska mu manja mwa arwani ŵidu, tije ndi mwaŵi wakumuchitiya uteŵeti wakupaturika kwambula mantha, ⁷⁵ mwakugomezgeka kweniso mwaurunji pa masu paki mu mazuŵa ngidu ngosi. ⁷⁶ Kweni yiwi wamwana, wazamudanika kuti mchimi wa Wapachanya Limu, chifukwa wazamudanjiya panthazi paku Yehova* kuti umunozge nthowa zaki,+ ⁷⁷ kweniso kuti uziŵisi ŵanthu ŵaki kuti ataskikengi mwakugowokereka maubudi ngawu,+ ⁷⁸ chifukwa cha lisungu likulu laku Chiuta widu. Ndipu chifukwa cha lisungu lenili tiwonengi ukweru kutuliya kuchanya nge wo uwoneka asani kutucha, ⁷⁹ kuti umbulikiyi ŵanthu wo aja mu mdima kweniso mu mduzi wa nyifwa+ ndi kulongozga maphazi ngidu mu nthowa ya chimangu.” ⁸⁰ Mwana yo wangukuwa ndipu wenga wanthazi mu mzimu. Iyu wajanga muchipululu mpaka po wangujilongore pakweru kwa Ayisirayeli.