Genezesi 4:1-26

  • Kayini ndi Abelu (1-16)

  • Ŵana aku Kayini (17-24)

  • Seti ndi mwana waki Enosi (25, 26)

4  Sonu Adamu wangugonana ndi muwolu waki Heva, ndipu munthukazi yo wangume nthumbu.+ Wati wabala Kayini,+ Heva wangukamba kuti: “Ndabala mwana munthulumi mwakuwovyeka ndi Yehova.”  Pavuli paki, wangubala so mvurwa waki Abelu.+ Abelu wanguja mliska wa viŵetu kweni Kayini wanguja mlimi.  Pati pajumpha nyengu, Kayini wanguto vinyaki mwa vipasu va mumunda ndipu wangupereka sembi kwaku Yehova.  Kweni Abelu wangupereka sembi ŵana akwamba kuwaku a viŵetu vaki+ limoza ndi mafuta ngawu. Yehova wangwanja Abelu ndipuso sembi yaki,+  kweni wangumuyanja cha Kayini ndipuso sembi yaki chinanga nkhamanavi. Mwaviyo, Kayini wangukwiya ukongwa ndipu chisku chaki chingubwanthuka.*  Sonu Yehova wangufumba Kayini kuti: “Ntchifukwa wuli wakwiya ukongwa ndi kubwanthuka chisku?  Asani ungasintha ndi kwamba kuchita chinthu chamampha, kumbi ndingakuyanja so cha? Kweni asani uleka kusintha ndi kwamba kuchita chinthu chamampha, ubudi ukhaza pakhomu ndipu ukhumbisiska kukulamuliya; kweni kumbi uwuthereskengi?”  Pavuli paki, Kayini wangukambiya mvurwa waki Abelu kuti: “Tiyeni tiluti kumunda.” Ndipu pa nyengu yo ŵenga kumunda, Kayini wanguyukiya mvurwa waki Abelu ndipu wangumubaya.+  Pavuli paki, Yehova wangufumba Kayini kuti: “We pani mvurwa waku Abelu?” ndipu wangumuka kuti: “Ndiziŵa cha. Ini ndini nde mulonda wa mvurwa wangu?” 10  Ndipu Chiuta wangumufumba kuti: “Ntchinthu wuli cho wachita? Vwiya! Ndopa za mvurwa waku zitindiliriya kutuliya kudongu.+ 11  Sonu ndiwi wakutembeka, ndipu udikisikengi muchigaŵa cho dongu laki lajula mulomu waki ndi kulonde ndopa za mvurwa waku yo wabaya.+ 12  Asani ulima, dongu lazakukupaska cha vipasu vaki.* Wazamuja munthu wakuyingayinga kweniso wakuthaŵathaŵa mucharu.” 13  Kayini wati wavwa venivi, wangukambiya Yehova kuti: “Chilangu cha kunanga kwangu ntchikulu ukongwa, ndingafiska cha kukunthiyapu. 14  Msanawale mutindidikisa pamalu yanga* ndipu ndazamubisika ku chisku chinu; ndazamuja wakuyingayinga kweniso wakuthaŵathaŵa mucharu ndipu munthu weyosi yo wandisaniya wazakundibaya nadi.” 15  Sonu Yehova wangumukambiya kuti: “Pa chifukwa chenichi, munthu weyosi yo wabaya Kayini wazamulangika maulendu 7.” Ndipu Yehova wanguŵikiya* Kayini chisimikizu kuti munthu weyosi yo wamusaniya wangamubayanga cha. 16  Pavuli paki, Kayini wangutuwapu pa masu paku Yehova ndipu wangwamba kuja mucharu cha Nodi,* kuvuma* kwa Edeni.+ 17  Pati pajumpha nyengu, Kayini wangugonana ndi muwolu waki,+ ndipu muwolu waki wangume nthumbu ndipu wangubala Enoki. Pavuli paki, Kayini wangwamba kuzenga tawuni, ndipu wanguyidana zina la mwana waki lakuti Enoki. 18  Pavuli paki, Enoki wangubala Iradi. Iradi wangubala Mehuyayelu, Mehuyayelu wangubala Metusayeli, ndipu Metusayeli wangubala Lameki. 19  Lameki wanguto anthukazi ŵaŵi. Wakwamba wenga Ada ndipu wachiŵi wenga Zila. 20  Ada wangubala Yabala. Ndipu mwenuyu wenga wakwamba pa ŵanthu akuja mumahema ndipuso akuŵeta viŵetu. 21  Mubali waki wenga Yubala. Iyu wenga wakwamba pa ŵanthu wosi wo atumba bangu* ndipuso fyoliru. 22  Kweniso Zila wangubala Tubala-kayini, yo wapanganga vipangizu va mtundu wewosi vamkuŵa ndipuso vachisulu. Ndipu mzichi waku Tubala-kayini wenga Nama. 23  Ndipu Lameki wangupangiya ndakatulu awolu ŵaki, Ada ndi Zila yakuti: “Vwani mazu ngangu, yimwi awolu aku Lameki;Vwisiyani mazu ngangu: Ndabaya munthu chifukwa chakuti wangundipweteka,Ndabaya nadi mnyamata chifukwa chakuti wangundipuma. 24  Asani Kayini walangikengi maulendu 7,+Ndikuti Lameki walangikengi maulendu 77.” 25  Adamu wangugonana so ndi muwolu waki ndipu wangubala mwana munthulumi. Mwana yo, wangumudana zina lakuti Seti,*+ nge mo wangukambiya kuti: “Chiuta wandisankhiya* mphapu* yinyaki mumalu mwaku Abelu chifukwa Kayini wakumubaya.”+ 26  Seti nayu wangubala mwana ndipu wangumudana zina lakuti Enosi.+ Pa nyengu iyi ŵanthu angwamba kudana pa zina laku Yehova.

Mazu Ngam'mphata

Pamwenga kuti, “ndipu wanguguŵa ukongwa.”
Mazu ngaki chayingu, “nthazi zaki.”
Mazu ngaki chayingu, “pa chisku cha charu.”
Pamwenga kuti, “wangujalikiskiya.”
Kung’anamuwa charu cha akuthaŵa kwawu.
Pamwenga kuti, “kwakutuliya lumwi.”
Anyaki akamba kuti, “bangwi.”
Kung’anamuwa kuti, “Kusankha; Kuŵika; Kujalika.”
Pamwenga kuti, “wandipaska.”
Pamwenga kuti, “mbewu.”