Ezekiyeli 6:1-14

  • Uchimi wakukwaskana ndi mapiri nga ku Isirayeli (1-14)

    • Angoza akuseruska azamulengeseka (4-6)

    • “Mwazamuziŵa kuti ini ndini Yehova” (7)

6  Yehova wangulongoro so nani ndipu wangukamba kuti:  “Yiwi mwana wa munthu lazga chisku chaku kumapiri nga ku Isirayeli ndipu ukambi uchimi wakukwaskana ndi mapiri ngo.  Ukambi kuti, ‘Yimwi mapiri nga ku Isirayeli, vwani mazu ngaku Yehova, Ambuya Fumu Yikulu: Ivi ndivu Yehova, Ambuya Fumu Yikulu wakambiya mapiri, mitunthu, misinji ndipuso madambu: “Awonani! Ndikutumiyeningi lipanga ndipu linangengi malu nginu ngapachanya.  Maguŵa nginu nga sembi ngazamubwangandulika, malu nginu ngakuŵikapu vakununkhira ngazamuwisikiya pasi,+ ndipu ŵanthu ŵinu akubayika ndazakuŵaponya panthazi pa angoza ŵinu akuseruska.*+  Ndazamuponya mathupi nga Ayisirayeli panthazi pa angoza ŵawu akuseruska, ndipu ndazamumbininiska viwanga vinu kuzunguliya maguŵa nginu nga sembi.+  Mumalu mosi mo muja, matawuni ngazamubwangandulika+ ndipu malu ngapachanya ngazamubwangandulika ndi kuja mahami.+ Maguŵa nginu nga sembi ngazamubwangandulika ndi kuvikitika, angoza ŵinu akuseruska azamumala, malu nginu ngakuŵikapu vakununkhira ngazamuwisikiya pasi, ndipu ntchitu za manja nginu zazamumaliya limu.  Ŵanthu wo azamubayika, azamukuwa pakati pinu,+ ndipu mwazamuziŵa kuti ini ndini Yehova.+  “‘“Kweni ndazamusiyapu akujaku, pakuti anyaki aku yimwi azamuthaŵa lipanga pakati pa mitundu ya ŵanthu asani ndazikumbininiskiyani muvyaru vakupambanapambana.+  Ndipu ŵanthu wo azamuthaŵa lipanga, azakundikumbuka pakati pa mitundu ya ŵanthu ko amuja akapolu.+ Yiwu azamuziŵa kuti ndingupwetekeka mtima chifukwa cha mtima wawu wambula kugomezgeka wo ungutuwaku kwaku ini+ kweniso chifukwa chakuti masu ngawu ngalondo angoza ŵawu akuseruska kuti ngachiti nawu ureŵi.+ Yiwu azamuchita soni kweniso azamuseruka ndi vinthu vosi viheni ndipuso vakuseruska vo achita.+ 10  Yiwu azamuziŵa kuti ini ndini Yehova ndipuso azamuziŵa kuti ndaŵawofyanga ŵaka cha kuti ndiŵatumiyengi soka ili.”’+ 11  “Yehova, Ambuya Fumu Yikulu wakamba kuti: ‘Umbi manja ngaku ndi kukandakanda pasi lundi laku mwanthazi, ndipu liya chifukwa cha vinthu vosi viheni kweniso vakuseruska vo nyumba yaku Isirayeli yachita, pakuti yiwu azamubayika ndi lipanga, nja ndipuso mulili.+ 12  Munthu yo we kutali ukongwa, wazamukufwa ndi mulili, yo we pafupi wazamubayika ndi lipanga, weyosi yo wazamupona ku vinthu venivi ndipu wajaku, wazamukufwa ndi nja; ndazakuŵalongo ukali wangu wosi.+ 13  Ndipu mwazamuziŵa kuti ini ndini Yehova+ asani ŵanthu ŵinu wo azamubayika azija landati pakati pa angoza ŵawu akuseruska, kuzunguliya maguŵa ngawu nga sembi,+ pamtunthu wewosi utali, pachanya pa mapiri ngosi, pasi pa chimiti chechosi chakubiriŵira ndipuso kusi kwa mphanda za vimiti vikuluvikulu ko aperekiyanga sembi za vakununkhira kuti akondwesi angoza ŵawu wosi akuseruska.+ 14  Ndazakuŵatambasuliya janja langu ndipu ndazamusambusa charu cho kuja mahami. Malu ngawu ngosi ngakujamu, ngazamuja mahami ngaheni ukongwa kuluska chipululu chapafupi ndi Dibula. Ndipu azamuziŵa kuti ini ndini Yehova.’”

Mazu Ngam'mphata

Mazu yanga ngakutuliya ku mazu nga Chiheberi ngo ngayanana ndi mazu ngakuti “mavi nga viŵetu” ndipu ngagwiriskikiya ntchitu pakuyuyuwa chinthu.