Ezekiyeli 47:1-23

  • Msinji wo watuliyanga munyumba yakusopiyamu (1-12)

    • Ndimba ya maji yisazgikiyaku kamanakamana (2-5)

    • Maji nga mu Nyanja Yakufwa ngachizgika (8-10)

    • Mathaŵali ngachizgika cha (11)

    • Vimiti va vipasu va vakurya kweniso vakuchizga (12)

  • Mphaka za charu (13-23)

47  Pavuli paki, wanguwere nani kukhomu la nyumba yakusopiyamu,+ ndipu kwenuku ndinguwona maji ngo ngayendanga kulazgiya kuvuma. Maji ngo ngatuliyanga pasi pa khomu la nyumba yakusopiyamu,+ pakuti kunthazi kwa nyumba yakusopiyamu kwalereskanga kuvuma. Maji ngo ngatuwanga pasi ndipu ngasikiyanga kumphata. Ngatuliyanga kuchigaŵa chakumaryi cha nyumba yakusopiyamu, kumwera kwa guŵa la sembi.  Pavuli paki, wangutuwa nani kuziya kukanyumba kapageti ka kunkhondi,*+ wangundituzgiya kubwalu ndi kuzunguliya nani kukanyumba kapageti kakubwalu ko kalereska kuvuma,+ ndipu ndinguwona maji ngo ngayendanga kamanakamana kutuliya kuchigaŵa chakumaryi.  Munthu yo wanguluta chakuvuma ndipu wenga ndi chingwi chakupimiya mujanja laki.+ Iyu wangupima mamita 518* nga msinji wo, kutuliya pakanyumba kapageti ka kuvuma, ndipu wangundijumphisa mumaji; maji ngo, ngangufika mukangolingoli.  Pavuli paki, wangupima so mamita 518 nga msinji wo ndi kundijumphisa mumaji, ndipu maji ngangufika mumakongonu. Wangupima so mamita 518 ndi kundijumphisa mumaji, ndipu maji ngo ngangufika muchiwunu.  Munthu yo wati wapima so mamita 518, msinji wo ungukuwa ukongwa ndipu ndingutondeka kujumpha, pakuti maji ngenga nganandi ukongwa mwakuti munthu wakhumbikanga kusambira. Msinji wo wenga wakuti munthu wangayambuka ndi malundi cha.  Munthu yo wangundifumba kuti: “Yiwi mwana wa munthu, kumbi waviwona venivi?” Pavuli paki, wangundiyendesa ndipu wangundiweze mumphepeti mwa msinji.  Ndati ndatuwa mumaji, ndinguwona kuti mumphepeti mwa msinji mwenga vimiti vinandi ukongwa, uku ndi uku.+  Pavuli paki, wangundikambiya kuti: “Maji yanga ngaluta kuchigaŵa cha kuvuma, ngasika kujumpha muchigaŵa cha Araba*+ ndipu ngasere munyanja.+ Asani ngasere munyanja, ngamuchitiska kuti maji nga munyanja ngachizgiki.  Kwekosi ko maji ngo ngaluta,* mumaji mwazamukuŵa vamoyu vakupambanapambana. Mwazamukuŵa somba zinandi chifukwa maji yanga ngazamukwenda kweniko. Maji nga munyanja ngazamuchizgika, ndipu kwekosi ko msinji uluta, vinthu vosi vazamukuŵa vamoyu. 10  “Alovi azamukuma mumphepeti mwa nyanja kwambiya ku Eni-gedi mpaka ku Eni-egilayimu,+ ko kwazamukuŵa malu ngakunikapu mikwawu. Kwazamukuŵa so somba zinandi za mitundu yakupambanapambana, nge somba za mu Nyanja Yikulu.*+ 11  “Kweniko kwazamukuŵa madambu kweniso mathaŵali, ndipu ngazamuchizgika cha. Yingu ngazamujowoleka kuti ngaje malu ngamche.+ 12  “Vimiti vamitundu yosi va vipasu vazamume mumphepeti mwa msinji wo, uku ndi uku. Mani ngaki ngazamufota cha; ndipu vimiti vo vazamuleka cha kupasa vipasu. Mwezi wewosi vimiti vo vazamupasanga vipasu vifya, chifukwa maji ngaki ngatuliya kumalu ngakupaturika.+ Vipasu vaki vazamukuŵa chakurya ndipu mani ngaki ngazamuja ngakuchizgiya.”+ 13  Yehova, Ambuya Fumu Yikulu wakamba kuti: “Ichi ntchigaŵa cho muperekengi ku mafuku 12 nga Ayisirayeli kuti chije chihara chawu, ndipu Yosefi waŵengi ndi vigaŵa viŵi.+ 14  Muharengi charu cho ndipu mulondiyengi malu ngakuyanana. Ndingulapizga kuti ndiperekengi charu ichi kwa apapi ŵinu akali+ ndipu sonu nditichipereka kwaku yimwi kuti chije chihara chinu. 15  “Mphaka ya charu cho, kuchigaŵa cha kunkhondi* ndi iyi: Yitambiya ku Nyanja Yikulu kujumpha ku Hetiloni+ kulazga ku Zedadi,+ 16  ku Hemati,+ ku Berota,+ ndipuso ku Siburayimu, chigaŵa cho che pakati pa chigaŵa cha Damasiko kweniso chigaŵa cha Hemati, mpaka kuchifika ku Hazere-hatikoni, chigaŵa cho che kufupi ndi mphaka ya Haurani.+ 17  Mwaviyo, mphaka yiyambiyengi kunyanja kuchifika ku Hazara-enoni,+ mumphepeti mwa mphaka ya Damasiko kunkhondi* kweniso mphaka ya Hemati.+ Yeniyi ndi mphaka ya kunkhondi. 18  “Chigaŵa cha kuvuma chiyambiyengi pakati pa Haurani ndi Damasiko ndipu chijumphengi mumphepeti mwa Yorodani pakati pa Giliyadi+ ndi charu cha Isirayeli. Mupimi kwambiya kumphaka mpaka kuchifika kunyanja ya kuvuma.* Yeniyi ndi mphaka ya kuvuma. 19  “Mphaka ya kumwera yiyambiyengi ku Tamara kuchifika ku maji nga ku Meribati-kadeshi,+ mpaka ku Dambu* ndipuso mpaka ku Nyanja Yikulu.+ Yeniyi ndi mphaka ya kumwera. 20  “Kuchigaŵa cha kuzambwi kwe Nyanja Yikulu, kutuliya kumphaka ya kumwera mpaka pamalu ngo ngalereskana ndi Lebo-hemati.*+ Yeniyi ndi mphaka ya kuzambwi.” 21  “Mugaŵani charu chenichi, mwakukoliyana ndi mafuku 12 nga Ayisirayeli. 22  Mugaŵani malu ngenanga kuti chije chihara chinu, kweniso mugaŵiyeku alendu wo aja pakati pinu, wo akubala ŵana achija pakati pinu; ndipu yiwu ajengi nge Ayisirayeli wo akuwiya mucharu chinu. Yiwu alondiyengi chihara pakati pa mafuku nga Ayisirayeli limoza ndi yimwi. 23  Alendu wo aja pakati pinu, muŵapaski chihara muchigaŵa cha fuku lo ajamu,” Yehova, Ambuya Fumu Yikulu ndiyu wakamba.

Mazu Ngam'mphata

Anyaki akamba kuti, “kumpotu.”
Mazu ngaki chayingu, “manja 1,000.” Yanga ndi manja ngatali. Wonani Fundu Zakukumaliya B14.
Pamwenga kuti, “muchidika chachipalamba.”
Mazu ngaki chayingu, “ko misinji yiŵi yo yiluta.”
Kung’anamuwa Nyanja ya Meditereniyani.
Anyaki akamba kuti, “kumpotu.”
Anyaki akamba kuti, “kumpotu.”
Kung’anamuwa Nyanja Yakufwa.
Kung’anamuwa Dambu la ku Ijipiti. Ili ndi dambu lo lija ndi maji mu nyengu ya vuwa pe.
Pamwenga kuti, “mpaka pakuselere ku Hemati.”