Ezekiyeli 44:1-31

  • Geti la kuvuma lijengi lakujala (1-3)

  • Ulongozgi wakukwaskana ndi alendu (4-9)

  • Ulongozgi wakukwaskana ndi Alevi kweniso asembi (10-31)

44  Iyu wanguweku nani kuziya kunthowa ya geti lakubwalu la malu ngakupaturika, lo lilereska kuvuma,+ ndipu lenga lakujala.+  Pavuli paki, Yehova wangundikambiya kuti: “Geti ili lijengi lakujala. Lingajulikanga cha ndipu munthu wangaseleriyanga pageti lenili cha; pakuti Yehova, Chiuta waku Isirayeli waselere pageti lenili,+ mwaviyo, lijengi lakujala.  Kweni mulongozgi wajengi mwenimo kuti waryi chiŵandi pa masu paku Yehova,+ pakuti iyu ndi mulongozgi. Iyu waseleriyengi pakhondi la geti ndipu watuliyengi penipo.”+  Pavuli paki, wanguza nani kunthazi kwa nyumba yakusopiyamu kuziya pageti la kunkhondi.* Ndati ndalereska, ndinguwona kuti unkhankhu waku Yehova wazaza munyumba yakusopiyamu yaku Yehova.+ Mwaviyo, ndingujikama ndi kusindama mpaka chisku changu pasi.+  Pavuli paki, Yehova wangundikambiya kuti: “Yiwi mwana wa munthu, yivwa, wona ndipuso vwisiya mwakuphwere vinthu vosi vo nditikukambiya vakukwaskana ndi marangu nga nyumba yakusopiyamu yaku Yehova. Lereseska khomu la nyumba yakusopiyamu kweniso mageti ngosi ngakutuliya mumalu ngakupaturika.+  Kambiya nyumba yaku Isirayeli yakugaruka kuti, ‘Yehova, Ambuya Fumu Yikulu wakamba kuti: “Yimwi a munyumba yaku Isirayeli mwachita ukongwa vinthu vaukazuzi.  Asani mwaza mumalu ngangu ngakupaturika ndi alendu ambula kudumulika mumtima kweniso kuliŵavu, yiwu afipiska nyumba yangu yakusopiyamu. Mupereka viŵandi vangu, mafuta ndi ndopa, kweni pa nyengu yeniyo pe mutuswa phanganu langu chifukwa cha vinthu vosi vaukazuzi vo muchita.  Mwaphwere cha vinthu vangu vakupaturika.+ Mumalu mwaki, musankha ŵanthu anyaki kuti ndiwu ateŵetiyengi mumalu ngangu ngakupaturika.”’  “‘Yehova, Ambuya Fumu Yikulu wakamba kuti: “Mulendu wambula kudumulika mumtima kweniso kuliŵavu, yo waja mu Isirayeli, wangaserenga cha mumalu ngangu ngakupaturika.”’ 10  “‘Kweni Alevi wo angundileka+ pa nyengu yo Ayisirayeli angutuwaku kwaku ini kuti alondo angoza ŵawu akuseruska,* azamulangika chifukwa cha ubudi wawu. 11  Ndipu yiwu azamuteŵete mumalu ngangu ngakupaturika kuti awoneriyengi mageti nga nyumba yakusopiyamu+ kweniso kuti ateŵetiyengi pa nyumba yakusopiyamu. Azamubayiya ŵanthu sembi yakupiriza yamphumphu kweniso sembi zinyaki. Ndipu azamukuma pa masu pa ŵanthu kuti aŵateŵete. 12  Chifukwa chakuti yiwu anguŵateŵete panthazi pa angoza ŵawu akuseruska ndipuso anguja chinthu chakuguŵiska mwakuchitiska Ayisirayeli kuti abudi,+ ndichu chifukwa chaki ndaŵasoske janja langu ndi kulapizga,’ Yehova, Ambuya Fumu Yikulu ndiyu wakamba, ‘ndipu yiwu azamulangika chifukwa cha ubudi wawu. 13  Yiwu azamundere cha kufupi ndi ini kuti anditeŵete nge asembi ŵangu kweniso azamundere cha kufupi ndi vinthu vangu vakupaturika pamwenga ku vinthu vakupaturika ukongwa, ndipu yiwu azamuchita soni chifukwa cha vinthu vaukazuzi vo anguchita. 14  Kweni ndazakuŵasankha kuti aphweriyengi ntchitu za panyumba yakusopiyamu, kuti agwirengi ntchitu za penipo ndipuso kuti aphweriyengi vinthu vosi vo vitenere kuchitika mwenimo.’+ 15  “‘Kweni asembi wo mbalevi, ŵana anthulumi aku Zadoki,+ wo aphweriyanga ntchitu za mumalu ngangu ngakupaturika pa nyengu yo Ayisirayeli angundileka,+ azamundere kwaku ini kuti anditeŵete ndipu yiwu azamukuma pa masu pangu kuti andipaski mafuta+ kweniso ndopa,’+ Yehova, Ambuya Fumu Yikulu ndiyu wakamba. 16  ‘Yiwu ndiwu azamusere mumalu ngangu ngakupaturika kweniso azamundere ku thebulu langu kuti anditeŵete,+ ndipu azakunditeŵete.+ 17  “‘Asani asere mutinyumba tapageti ta mubalaza lamukati, avwalengi vakuvwala vasalu.+ Yiwu angavwalanga cha chakuvwala chechosi chaweya wa mbereri asani ateŵete mutinyumba tapageti ta mubalaza lamukati pamwenga mukati mwaki. 18  Yiwu avwalengi mphumphu zasalu kumutu kwawu ndipuso avwalengi akabunthu asalu muviwunu vawu.+ Angavwalanga cha chakuvwala chechosi cho chingaŵachitiska vuchi. 19  Ŵechendaluti kubalaza lakubwalu ko kwe ŵanthu, azuwengi vakuvwala vo anguvwala pakuteŵete,+ ndipu aviŵikengi muvipinda vakuryiyamu vakupaturika.+ Yiwu avwalengi vakuvwala vinyaki kuti vakuvwala vawu vileki kutowesa ŵanthu. 20  Yiwu angasenganga cha sisi la kumutu kwawu+ ndipuso angazomerezanga cha kuti sisi likuwengi ukongwa kumutu. Yiwu ayepuwengi ŵaka sisi la kumutu kwawu. 21  Asembi angamwanga cha vinyu asani asere mubalaza lamukati.+ 22  Angatonga choko cha pamwenga munthukazi yo wakupatika kuti waje muwolu wawu;+ kweni angato mwali yo ndi mphapu yaku Isirayeli pamwenga choko cho mulumu waki wenga wasembi.’+ 23  “‘Yiwu asambizengi ŵanthu ŵangu kuti apambanisengi pakati pa vinthu vakupaturika ndi vinthu bweka; ndipuso aŵasambizengi kuti apambanisengi pakati pa vinthu vakufipiskika ndi vinthu vambula kufipiskika.+ 24  Yiwu ayeruzgengi milandu;+ ayeruzgengi milandu mwakukoliyana ndi vyeruzgu vangu.+ Asungengi marangu ngangu ngakukwaskana ndi maphwandu ngangu ngosi+ kweniso atowesengi masabata ngangu. 25  Yiwu anganderenga cha pafupi ndi munthu weyosi wakufwa kuti aleki kufipiskika. Kweni angajifipiska chifukwa cha awusewu, anyinawu, mwana wawu munthulumi, mwana wawu munthukazi, mku wawu, mvurwa wawu, pamwenga mzichi wawu wambula kuyirwa.+ 26  Asani wasembi watoweseka, amuŵerengiyengi mazuŵa 7. 27  Pa zuŵa lo waseleriyengi mumalu ngakupaturika, mubalaza lamukati, kuti wakateŵete mumalu ngakupaturika, waperekengi sembi yaki ya ubudi,’+ Yehova, Ambuya Fumu Yikulu ndiyu wakamba. 28  “‘Ndipu chihara chawu ndi ichi: Ini ndini chihara chawu.+ Mungaŵapaskanga malu ngengosi cha mu Isirayeli, pakuti ini ndini chihara chawu. 29  Yiwu ndiwu aryengi sembi ya mbewu,+ sembi ya ubudi kweniso sembi ya mulandu,+ ndipu chinthu chechosi cho chaperekeka mu Isirayeli chijengi chawu.+ 30  Vipasu vamampha ukongwa pa vipasu vakwamba kweniso vinthu vakupambanapambana vo mwapereka vijengi va asembi.+ Ndipu mupaskengi asembi ufwa wakugulung’uzuka wakutuliya pa vipasu vakwamba kucha.+ Venivi vichitiskengi kuti mabanja nginu ngatumbikiki.+ 31  Asembi angaryanga cha chiyuni chechosi ndipuso nyama yeyosi yo yafwa yija pamwenga yo yapalurika.’+

Mazu Ngam'mphata

Anyaki akamba kuti, “kumpotu.”
Mazu yanga ngakutuliya ku mazu nga Chiheberi ngo ngayanana ndi mazu ngakuti “mavi nga viŵetu” ndipu ngagwiriskikiya ntchitu pakuyuyuwa chinthu.