Ezekiyeli 42:1-20

  • Midadada ya vipinda vakuryiyamu (1-14)

  • Vigaŵa vinayi va nyumba yakusopiyamu vipimika (15-20)

42  Pavuli paki, wangundilongozge ku balaza lakubwalu chakunkhondi.*+ Ndipu wangunditole ku chimudadada cha vipinda vakuryiyamu cho chenga pafupi ndi malu ngambula kanthu,+ kunkhondi* kwa nyumba yo yenga pafupi ndi chimudadada cho.*+  Kwambiya pakhomu lakunkhondi,* utali wa chimudadada cho wenga mamita pafufupi 52,* ndipu usani waki wenga mamita pafufupi 26.*  Chimudadada cho chenga pakati pa balaza lamukati ndi kamsewu ka balaza lakubwalu. Balaza lamukati lenga mamita pafufupi 10 mu usani.+ Chimudadada cho chenga cha vigaŵa vitatu vakuyerekana ndipu timakhondi taki talereskananga.  Panthazi pa vipinda vakuryiyamu penga kanthowa kamukati.+ Kanthowa ko, kenga mamita pafufupi ngankhondi mu usani ndipu mu utali kenga mamita pafufupi 52.* Makhomu nga vipinda vo ngenga kunkhondi.*  Vipinda vakuryiyamu vamuchanya va chimudadada cho, venga vimanavimana kuphara vapasi kweniso vapakati, chifukwa timakhondi tingutoku malu nganyaki nga vipinda vo.  Pakuti vipinda vo, venga va vigaŵa vitatu vakuyerekana, kweni vengavi ntchindamilu nge zo zenga mumabalaza. Ndichu chifukwa chaki vipinda vamuchanya venga vimanavimana kuphara vipinda vapasi kweniso vapakati.  Chimati chamya chakubwalu cho chenga pafupi ndi vipinda vakuryiyamu kulazgiya ku balaza lakubwalu lo lalereskananga ndi vipinda vinyaki vakuryiyamu, chenga mamita pafufupi 26 mu utali.  Vipinda vakuryiyamu vo venga kufupi ndi balaza lakubwalu, venga mamita pafufupi 26 mu utali, kweni vo valereskananga ndi malu ngakupaturika venga mamita pafufupi 52 mu utali.  Kuvuma kwa vipinda vakuryiyamu kwenga khomu lo ŵanthu aseleriyangapu asani atuwa ku balaza lakubwalu. 10  Chakuvuma kwenga so vipinda vakuryiyamu, vipinda venivi venga mukati mwa chimati chamya cha balaza. Vipinda vo, venga pafupi ndi malu ngambula kanthu kweniso nyumba.*+ 11  Panthazi pa vipinda ivi penga kanthowa kakuyanana ndi ka vipinda vakuryiyamu va kunkhondi.*+ Vipinda venivi vayanananga ŵaka mu utali ndi mu usani, ndipu vinguzengeka mwakuyanana. Tinthowa takutuliya muvipinda venivi tenga so takuyanana. Makhomu ngaki 12  ngayanananga ndi makhomu nga vipinda vakuryiyamu vo venga chakumwera. Po payambiyanga kanthowa, penga khomu lo lenga pafupi ndi chimati chamya chakuvuma, po munthu waseleriyanga.+ 13  Pavuli paki, wangundikambiya kuti: “Vipinda vakuryiyamu va kunkhondi* kweniso vipinda vakuryiyamu va kumwera vo ve pafupi ndi malu ngambula kanthu,+ ndi vipinda vakuryiyamu vakupaturika. Vipinda venivi ndivu asembi wo andere kufupi ndi Yehova aryiyamu sembi zakupaturika ukongwa.+ Mwenumu ndimu aŵika sembi zakupaturika ukongwa, sembi ya mbewu, sembi ya ubudi ndipuso sembi ya mulandu chifukwa chakuti malu ngenanga ngakupaturika.+ 14  Asani asembi asere, angatuwanga cha mumalu ngakupaturika kuluta ku balaza lakubwalu kwambula kuzuwa vakuvwala vo avwala pakuteŵete,+ pakuti vakuvwala venivi vakupaturika. Yiwu avwalengi vakuvwala vinyaki kuti aluti kumalu ko ŵanthu azomerezeka kusere.” 15  Wati wamaliza kupima malu ngamukati nga nyumba yakusopiyamu,* wangundituzga kupitiya pageti lo lilereska kuvuma,+ ndipu wangupima malu ngosi. 16  Iyu wangupima chigaŵa cha kuvuma ndi deti lakupimiya. Ndipu mwakukoliyana ndi deti lakupimiya,* chigaŵa cho chingukwana mateti 500 mu utali, kutuwa kuchigaŵa chimoza kufika kuchigaŵa chinyaki. 17  Wangupima chigaŵa cha kunkhondi* ndipu mwakukoliyana ndi deti lakupimiya, chigaŵa cho chingukwana mateti 500 mu utali. 18  Wangupima chigaŵa cha kumwera ndipu mwakukoliyana ndi deti lakupimiya, chigaŵa cho chingukwana mateti 500 mu utali. 19  Pavuli paki, wanguzunguliya ndipu wanguluta kuchigaŵa cha kuzambwi. Wangupima chigaŵa cho ndi deti lakupimiya, ndipu chingukwana mateti 500 mu utali. 20  Wangupima malu ngo muvigaŵa vosi vinayi. Malu ngosi ngenga ndi mpanda+ wakukwana mateti 500 mu utali kweniso mu usani.+ Mpanda wo wapatuwanga vinthu vakupaturika ndi vinthu bweka.+

Mazu Ngam'mphata

Anyaki akamba kuti, “chakumpotu.”
Anyaki akamba kuti, “kumpotu.”
Kung’anamuwa nyumba yo yenga kuzambwi.
Anyaki akamba kuti, “lakumpotu.”
Mazu ngaki chayingu, “manja 100.” Yanga ndi manja ngatali. Wonani Fundu Zakukumaliya B14.
Mazu ngaki chayingu, “manja 50.” Wonani Fundu Zakukumaliya B14.
Mu Bayibolu la Chigiriki la Septuagint, akufwatuliya kuti, “manja 100 mu utali.” Mu Chiheberi akukamba kuti: “Kanthowa kakukwana janja limoza utali waki.” Wonani Fundu Zakukumaliya B14.
Anyaki akamba kuti, “kumpotu.”
Kung’anamuwa nyumba yo yenga kuzambwi.
Anyaki akamba kuti, “kumpotu.”
Anyaki akamba kuti, “kumpotu.”
Mazu ngaki chayingu, “Wati wamaliza kupima nyumba yamukati.”
Anyaki akamba kuti, “kumpotu.”