Ezekiyeli 35:1-15

  • Uchimi wakukwaskana ndi mapiri nga ku Seiri (1-15)

35  Yehova wangulongoro so nani, ndipu wangukamba kuti:  “Yiwi mwana wa munthu, lazga chisku chaku kuchigaŵa chamapiri cha Seiri,+ ndipu kamba uchimi wakukwaskana ndi chigaŵa cho.+  Uchikambiyi kuti, ‘Yehova, Ambuya Fumu Yikulu wakamba kuti: “Ndilimbanengi nawi, yiwi chigaŵa chamapiri cha Seiri, ndikutambasuliyengi janja langu ndi kukusambusa mahami.+  Matawuni ngaku ndazakungasambusa mahami, yiwi nawi wazamusambuka mahami;+ ndipu wazamuziŵa kuti ini ndini Yehova.  Pakuti unguŵatinkha ukongwa Ayisirayeli,+ ndipu unguŵapereka ku lipanga pa nyengu ya soka lawu, pa nyengu yo angulonde chilangu chakumaliya.”’+  “‘Mwaviyo, nge mo ini ndiliri wamoyu,’ Yehova, Ambuya Fumu Yikulu wakamba kuti, ‘ndikunozgekeresengi kuti ndopa zaku zidiriki ndipu nyifwa yikulondongi.*+ Pakuti ungutinkha ndopa, nyifwa yikulondongi.+  Chigaŵa chamapiri cha Seiri ndazakuchisambusa mahami + ndipu ndazamubaya weyosi yo wajumphamu.  Mumapiri ngaku ndazamuzazamu ŵanthu wo abayika; ndipu ŵanthu wo abayika azamukuwa pamitunthu yaku, mumadambu ngaku kweniso mutimisinji taku tosi.  Ndazakukusambusa mahami mpaka muyaya, mumatawuni ngaku mwazamujanga so ŵanthu cha;+ ndipu wazamuziŵa kuti ini ndini Yehova.’ 10  “Pakuti ungukamba kuti, ‘Mitundu yiŵi iyi kweniso vyaru viŵi ivi vijengi vangu, vosi viŵi vijengi vidu,’+ chinanga kuti Yehova wenga kweniko, 11  ‘mwaviyo, nge mo ini ndiliri wamoyu,’ Yehova, Ambuya Fumu Yikulu ndiyu wakamba, ‘ndimalanengi nawi mwakukoliyana ndi ukali kweniso sanji, vo ungulongo chifukwa cha kuŵatinkha;+ ndipu ini ndazakujiziŵikisa pakati pawu asani ndazikuyeruzga. 12  Ndipu wazamuziŵa kuti ini Yehova ndavwa vinthu vosi vakunyoza vo ungukamba vakukwaskana ndi mapiri nga ku Isirayeli po ungukamba kuti, “Ngasambuka mahami ndipu ngaperekeka kwaku isi kuti tingamezi.”* 13  Ungulongoro nani mwakujikuzga kweniso ungukamba vinthu vinandi vakundinyoza.+ Ndipu ndinguvwa vosi.’ 14  “Yehova, Ambuya Fumu Yikulu wakamba kuti: ‘Charu chosi chapasi chazamukondwa asani ndazikusambusa mahami. 15  Nge mo yiwi ungukondwe pa nyengu yo chihara cha nyumba yaku Isirayeli chingusambuka mahami, ndimu so ndichitiyengi ndi yiwi.+ Nawi wazamusambuka mahami, yiwi chigaŵa chamapiri cha Seiri, chigaŵa chosi cha Edomu;+ ndipu azamuziŵa kuti ini ndini Yehova.’”

Mazu Ngam'mphata

Pamwenga kuti, “kudira ndopa kukulondongi.”
Mazu ngaki chayingu, “ngaperekeka kwaku isi nge chakurya.”