Ezekiyeli 33:1-33

  • Udindu wa mulonda (1-20)

  • Uthenga wa kubwangandulika kwa Yerusalemu (21, 22)

  • Uthenga wakuluta ku ŵanthu akuja mumahami nga Yerusalemu (23-29)

  • Ŵanthu avwiya cha uthenga (30-33)

    • Ezekiyeli “we nge sumu yachanju” (32)

    • “Pakati pawu penga mchimi” (33)

33  Yehova wangulongoro nani, ndipu wangukamba kuti:  “Yiwi mwana wa munthu, longoro ndi ŵana a ŵanthu ŵaku,+ ndipu uŵakambiyi kuti,“‘Asani ndatuma lipanga mucharu,+ ndipu ŵanthu wosi a mucharu cho ato munthu ndi kumuŵika kuja mulonda wawu,  ndipu mulonda yo wawona lipanga lichiza mucharu cho, pavuli paki watumba mbata* ndi kutcheŵeska ŵanthu,+  asani munthu wavwa kumba kwa mbata kweni wachitapu kanthu cha,+ ndipu lipanga laza ndi kumubaya, ndopa zaki ziŵengi pa mutu waki.+  Iyu wanguvwa kuliya kwa mbata, kweni wanguchitapu kanthu cha. Ndopa zaki ziŵengi pa mutu waki. Asani iyu wanguchitapu kanthu, watingi wataskengi umoyu waki.  “‘Kweni asani mulonda wawona lipanga lichiza ndipu wamba cha mbata,+ ŵanthu atcheŵeskeka cha ndipu lipanga laza ndi kubaya yumoza mwa ŵanthu wo, munthu yo wafwengi chifukwa cha kunanga kwaki, kweni mulonda wajengi ndi mulandu chifukwa cha ndopa za munthu yo.’+  “Kweni yiwi mwana wa munthu, ndakusankha kuti uje mulonda wa nyumba yaku Isirayeli; ndipu asani wavwa mazu kutuliya mumulomu mwangu, unditcheŵeske ŵanthu wo.+  Asani ndakambiya munthu muheni kuti, ‘Yiwi munthu muheni, ufwengi nadi!’+ kweni yiwi wamutcheŵeska cha kuti wasinthi nthowa yaki, iyu wazamukufwa nge munthu muheni chifukwa cha kunanga kwaki,+ kweni yiwi wazamuja ndi mulandu chifukwa cha ndopa zaki.  Kweni asani watcheŵeska munthu muheni kuti watuweku ku nthowa yaki, ndipu iyu wakana kusintha nthowa yaki, wazamukufwa chifukwa cha kunanga kwaki,+ kweni yiwi wazamutaska umoyu waku.+ 10  “Ndipu yiwi mwana wa munthu, kambiya a munyumba yaku Isirayeli kuti, ‘Yimwi mwakamba kuti: “Tazitiskika ukongwa chifukwa cha kugaruka kwidu kweniso maubudi ngidu, ndipu venivi vatiwondesa;+ sonu tingalutirizga wuli kuja ndi umoyu?”’+ 11  Uŵakambiyi kuti: ‘“Nge mo ini ndiliri wamoyu,” Yehova, Ambuya Fumu Yikulu ndiyu wakamba, “ndikondwa cha ndi nyifwa ya munthu muheni,+ kweni ndikondwa asani munthu muheni wasintha nthowa yaki+ ndipu walutirizga kuja ndi umoyu.+ Tuwaniku, tuwaniku ku nthowa zinu ziheni,+ mufwiyengenji yimwi a munyumba yaku Isirayeli?”’+ 12  “Ndipu yiwi mwana wa munthu, kambiya ŵana a ŵanthu ŵaku kuti, ‘Asani munthu murunji wagaruka,+ urunji waki wazakumutaska cha; ndipu asani munthu muheni watuwaku ku uheni waki,+ uheni waki wazakumuguŵiska cha; kweniso, munthu murunji wazamulutirizga cha kuja ndi umoyu chifukwa cha urunji waki pa zuŵa lo wazamubudiya.+ 13  Asani ndakambiya munthu murunji kuti: “Ulutirizgengi kuja ndi umoyu,” ndipu wayamba kuthemba urunji waki ndi kuchita vinthu viheni,*+ ntchitu zaki zaurunji zazamukumbukika cha, kweni wazamukufwa chifukwa cha vinthu viheni vo wachita.+ 14  “‘Ndipu asani ndakambiya munthu muheni kuti: “Ufwengi,” ndipu iyu watuwaku ku ubudi waki ndi kwamba kuchita vinthu vakwenere kweniso vaurunji,+ 15  ndipu munthu muheni yo, waweza chinthu cho wanguto nge chikoli,+ kweniso waweza chinthu cho wanguba,+ ndipu wayamba kwenda mu marangu ngakupaska umoyu mwakuleka kuchita vinthu viheni, iyu walutirizgengi kuja ndi umoyu.+ Wafwengi cha. 16  Iyu wazamumbika mulandu cha chifukwa cha maubudi ngo wanguchita.*+ Wazamulutirizga kuja ndi umoyu chifukwa cha kuchita vinthu vakwenere kweniso vaurunji.’+ 17  “Kweni ŵanthu ŵaku akamba kuti, ‘Nthowa yaku Yehova njambula urunji,’ penipo nthowa yawu ndiyu yambula urunji. 18  “Kweni asani munthu murunji waleka urunji waki ndipu wachita vinthu viheni, watenere kubayika chifukwa cha vo wachita.+ 19  Kweni asani munthu muheni waleka uheni waki ndipu wayamba kuchita vinthu vakwenere kweniso vaurunji, iyu wazamuja ndi umoyu chifukwa cha vo wachita.+ 20  “Kweni yimwi mwakamba kuti, ‘Nthowa yaku Yehova njambula urunji.’+ Ndazamuyeruzga weyosi waku yimwi mwakukoliyana ndi nthowa zaki, yimwi a munyumba yaku Isirayeli.” 21  Pati pajumpha nyengu, mu chaka cha 12 kutuliya po tingutoleke ku ukapolu, mu mwezi wa 10, pa zuŵa lachinkhondi la mwezi wo, munthu munyaki yo wangupona ku Yerusalemu wanguza kwaku ini,+ ndipu wangukamba kuti: “Tawuni yabwangandulika!”+ 22  Sonu ndi mazulu, munthu yo wangupona wechendazi, janja laku Yehova linguza paku ini, ndipu wangujula mulomu wangu munthu yo wechendazi kwaku ini ndi mlenji. Mwaviyo, mulomu wangu ungujulika ndipu ndingwamba kulongoro.+ 23  Pavuli paki, Yehova wangulongoro nani, ndipu wangukamba kuti: 24  “Yiwi mwana wa munthu, ŵanthu wo aja mumahami yanga+ akamba vakukwaskana ndi charu cha Isirayeli kuti, ‘Abrahamu wenga munthu yumoza, ndipu wanguto charu cho kuja chaki.+ Kweni isi te anandi; mwaviyo, charu cho chaperekeka nadi kwaku isi kuti chije chidu.’ 25  “Mwaviyo uŵakambiyi kuti, ‘Yehova, Ambuya Fumu Yikulu wakamba kuti: “Muturya chakurya limoza ndi ndopa,+ ndipu mulereska kwa angoza akuseruska,* ndipuso mulutirizga kubaya ŵanthu.+ Sonu mungato wuli charu cho kuti chije chinu? 26  Yimwi mwathemba lipanga linu,+ muchita vinthu vaukazuzi ndipuso weyosi waku yimwi wakazuzga muwolu wa munthu yo wakuzengezana nayu.+ Sonu mungato wuli charu cho kuti chije chinu?”’+ 27  “Uŵakambiyi kuti, ‘Yehova, Ambuya Fumu Yikulu wakamba kuti: “Nge mo ini ndiliri wamoyu, ŵanthu wo aja mumahami azamukufwa ndi lipanga, ŵanthu wo aja mudondu, ndazakuŵapereka ku vinyama vamudondu kuti aje chakurya cha vinyama vo; ndipu wo aja mumalu ngakuvikilirika kweniso mumphanji, azamukufwa ndi matenda.+ 28  Ndazamusambusa charu cho kuja mahami,+ ndazamumalisa kujikuzga kwaki kweniso mapiri nga ku Isirayeli ngazamunangika,+ ndipu mwazamujumphanga ŵanthu cha. 29  Yiwu azamuziŵa kuti ini ndini Yehova asani ndazisambusa charu cho kuja mahami+ chifukwa cha vinthu vosi vaukazuzi vo achita.”’+ 30  “Kweni yiwi mwana wa munthu, ŵanthu ŵaku akambiskana vakukwaskana ndi yiwi mumphepeti mwa mipanda kweniso mumakhomu nga nyumba zawu.+ Yiwu akambiskana, weyosi wakambiya mubali waki kuti, ‘Zani, tiyeni tikavwi mazu ngakutuliya kwaku Yehova.’ 31  Ŵanthu anandi azamuwungana kwaku yiwi nge ŵanthu ŵangu; ndipu azamukuvwa mazu ngaku, kweni azamuchitapu kanthu cha.+ Pakuti ndi milomu yawu atikukambiya vinthu vakukondwesa, kweni mitima yawu ye pakusaniya phindu mwachinyengu. 32  Awona! Yiwi we nge sumu yachanju kwaku yiwu, yakumbika ndi mazu ngasalala kweniso yakumbika mwalusu ndi chakumbiya cha vingwi. Yiwu azamukuvwa mazu ngaku, kweni azamuchitapu kanthu cha. 33  Asani mazu ngenanga ngazifiskika, ndipu ngazamufiskika nadi, yiwu azamuziŵa kuti pakati pawu penga mchimi.”+

Mazu Ngam'mphata

Anyaki akamba kuti, “lipenga.”
Pamwenga kuti, “vinthu vambula urunji.”
Mazu ngaki chayingu, “Maubudi ngo wanguchita ngazamukumbukika cha.”
Mazu yanga ngakutuliya ku mazu nga Chiheberi ngo ngayanana ndi mazu ngakuti “mavi nga viŵetu” ndipu ngagwiriskikiya ntchitu pakuyuyuwa chinthu.