Ezekiyeli 31:1-18

  • Kuwa kwa charu cha Ijipiti, chimiti chitali cha sidara (1-18)

31  Mu chaka cha 11, mu mwezi wachitatu, pa zuŵa lakwamba la mwezi wo, Yehova wangulongoro so nani, ndipu wangukamba kuti:  “Yiwi mwana wa munthu, kambiya Farawo fumu ya ku Ijipiti kweniso magulu nga ŵanthu ŵaki kuti,+‘Kumbi ukulu waku uyanana ndi waku yani?   Penga munthu wa ku Asiriya, chimiti cha sidara* cha ku Lebanoni,Chenga ndi mphanda zakutowa nge chivwati cha mduzi, chenga chitali ukongwa;Kusongu kwaki kwafikanga mumtambu.   Maji nganguchitiska kuti chikuwi ukongwa, akasupi andimba anguchitiska kuti chithopoki. Po chingupandika chinguzingilizika ndi timisinji ta maji;Migelu yaki yadiriyanga vimiti vosi va mucharu cho.   Ndichu chifukwa chaki chinguthopoka ukongwa kuluska vimiti vinyaki vosi va mucharu cho. Chenga ndi mphanda zinandi zikuluzikulu, ndipu mphanda zaki zinyaki zenga zitalizitaliChifukwa cha maji nganandi ngo ngenga mutimisinji taki.   Viyuni vosi vamude vazenganga vizimbu mumphanda zaki zikuluzikulu,Vinyama vosi vamudondu vabaliyanga kusi kwa mphanda zaki,Ndipu mitundu yosi yo yenga ndi ŵanthu anandi yajanga mu mduzi waki.   Chingutowa ukongwa kweniso mphanda zaki zenga zitali ukongwa,Pakuti misisi yaki yingusere pasi po penga maji nganandi.   Pengavi chimiti cha sidara chechosi mumunda waku Chiuta+ cho chayanananga nachu. Pengavi chimiti cha junipa cho chenga ndi mphanda zikuluzikulu nge ichu,Pengavi chimiti cha puleni* cho chenga ndi mphanda nge ichu. Kweniso mumunda waku Chiuta mwengavi chimiti chechosi cho chenga chakutowa kuluska ichu.   Ndinguchitowesa ndi mani nganandi,Ndipu vimiti vinyaki vosi va mu Edeni, mumunda waku Chiuta wauneneska, vinguchichitiya sanji.’ 10  “Mwaviyo, Yehova, Ambuya Fumu Yikulu wakamba kuti: ‘Chifukwa chakuti chinguthopoka* ukongwa, ndipu kusongu kwaki kungufika kumitambu, kweniso pakuti mtima waki ungwamba kujikuzga chifukwa cha utali waki, 11  ndazakuchipereka mu manja mwa mulongozgi wanthazi wa mitundu ya ŵanthu.+ Iyu wazakuchilanga, ndipu ini ndazakuchikana chifukwa cha uheni waki. 12  Alendu, ŵanthu ankhaza ukongwa pakati pa mitundu ya ŵanthu, azakuchidumuliya pasi ndipu azakuchijowo pamapiri. Mani ngaki ngazamuwiya mumadambu ngosi, ndipu mphanda zaki zazamufyoke mutimisinji tosi ta mucharu cho.+ Ŵanthu wosi a pacharu chapasi azamutuwamu mu mduzi waki ndipu azakuchijowo. 13  Viyuni vosi vamude vazamujanga pachimkoku chaki, ndipu vinyama vosi vamudondu vamujanga mumphanda zaki.+ 14  Ve viyo kuti pafupi ndi maji paleki kume chimiti chitali pamwenga kuti paŵevi chimiti cho kusongu kwaki kwafika kumitambu kweniso kuti paŵevi chimiti chechosi chakudirika maji cho chifika kumitambu. Pakuti vosi vazamukufwa, vazamusikiya kusi kwa charu, limoza ndi ŵana a ŵanthu wo asikiya muzenji.’* 15  “Yehova, Ambuya Fumu Yikulu wakamba kuti: ‘Pa zuŵa lo chazamusikiya mu Dindi,* ndazamuchitiska kuti ŵanthu aliyi. Ndazamujala maji ngandimba kweniso timisinji kuti maji nganandi ngaleki kwenda. Ndazamuchitiska kuti Lebanoni wachiti mdima chifukwa cha chimiti cho, ndipu vimiti vosi vamudondu vazamufota. 16  Ndazamuchitiska kuti mitundu ya ŵanthu yizinjekeme asani yazivwa chiwawa cha kuwa kwaki, pa nyengu yo ndazakuchisisiya ku Dindi* limoza ndi wosi wo asikiya muzenji,* ndipu vimiti vosi va mu Edeni,+ vimiti vakusankhika kweniso vamampha ukongwa va ku Lebanoni, vimiti vosi vakudirika maji vazamupembuzgika kusi kwa charu. 17  Vimiti vo, vasikiya mu Dindi* limoza ndi ichu, vasikiya kwaku wo akubayika ndi lipanga,+ limoza ndi wo achiwovyanga,* wo ajanga mu mduzi waki pakati pa mitundu ya ŵanthu.’+ 18  “‘Ntchimiti nichi mu Edeni cho chenga ndi unkhankhu ndipuso cho chenga chikulu nge yiwi?+ Kweni usisikiyengi kusi kwa charu limoza ndi vimiti va mu Edeni. Wazamugona pakati pa ŵanthu ambula kudumulika, limoza ndi ŵanthu wo akubayika ndi lipanga. Venivi ndivu vazamuchitikiya Farawo ndi magulu nga ŵanthu ŵaki,’ Yehova, Ambuya Fumu Yikulu ndiyu wakamba.”

Mazu Ngam'mphata

Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
Ili ndi zina la mtundu unyaki wa vimiti.
Mazu ngaki chayingu, “unguthopoka.”
Pamwenga kuti, “mudindi.”
Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
Pamwenga kuti, “mudindi.”
Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
Mazu ngaki chayingu, “limoza ndi janja laki.”