Ezekiyeli 26:1-21

  • Uchimi wakukwaskana ndi Turo (1-21)

    • “Malu ngakunikapu mikwawu” (5, 14)

    • Mya ndi dongu viponyeka mumaji (12)

26  Mu chaka cha 11, pa zuŵa lakwamba la mwezi, Yehova wangulongoro nani ndipu wangukamba kuti:  “Yiwi mwana wa munthu, pakuti Turo wakamba vakukwaskana ndi Yerusalemu kuti,+ ‘Khawu cha! Geti la ŵanthu akupambanapambana labwangandulika! + Vinthu vindiyendiyengi umampha, sonu ndikhupukengi chifukwa chakuti iyu wabwangandulika’;  mwaviyo, Yehova, Ambuya Fumu Yikulu wakamba kuti: ‘Ndilimbanengi nawi, yiwi Turo, ndipu ndizengi kwaku yiwi ndi mitundu yinandi ya ŵanthu kuti yizikuyukiyi, nge mo nyanja yiziya ndi mayiŵa ngaki.  Yiwu azamubwanganduwa mipanda ya Turo ndipuso azamuwisiya pasi tinyumba taki takuthopoka.+ Ndazamupara dongu laki ndi kumusambusa jalawi lakung’anima, lambula kanthu.  Iyu wazamusambuka malu ngakunikapu mikwawu pakati pa nyanja.’+ “‘Pakuti ini ndalongoro,’ Yehova, Ambuya Fumu Yikulu ndiyu wakamba, ‘ndipu wazamuja chinthu chakuti mitundu yiphangi.  Ŵanthu ŵaki* wo aja mumizi yakubwalu kwa tawuni azamubayika ndi lipanga, ndipu ŵanthu azamuziŵa kuti ini ndini Yehova.’  “Pakuti Yehova, Ambuya Fumu Yikulu wakamba kuti: ‘Ndizengi ndi Nebukadinezara* fumu ya ku Babiloni kutuliya kunkhondi* kuti waziyukiyi Turo;+ iyu ndi fumu ya mafumu.+ Wazengi ndi mahachi,+ magaleta ngankhondu,+ asilikali akukwera pamahachi kweniso gulu la asilikali anandi.*  Iyu wazamubaya ndi lipanga ŵanthu ŵaku wo aja mumizi yakubwalu kwa tawuni, wazamuzenga mpanda wankhondu, wazamuzenga chimbumira chakuchitiyapu nkhondu kweniso wazakukusoske chishangu chikulu.  Iyu wazamugumuwa mipanda yaku ndi chidya chaki chankhondu chakugumuliya, ndipu wazamuwisiya pasi tinyumba taku takuthopoka ndi mbavi zaki.* 10  Mahachi ngazamuja nganandi ukongwa mwakuti ngazamutchupusa fuvu lo lazakukubulumutizga. Chiwawa cha asilikali akukwera pamahachi, cha vingelengeli kweniso cha magaleta, chazamusukunyisa mipanda iyu wachisere pamageti ngaku, nge mo ŵanthu aselere mutawuni ya mpanda wakubwangandulika. 11  Vakukandiya va mahachi ngaki, vazamukandakanda misewu yaku yosi;+ iyu wazamubaya ŵanthu ŵaku ndi lipanga ndipu ntchindamilu zaku zakukho zazamukuwa pasi. 12  Yiwu azamukuba chuma chaku, azamuphanga malonda ngaku,+ azamuwisiya pasi mipanda yaku, azamugumuwa nyumba zaku zamampha; pavuli paki azamuponya mumaji mya yaku, vinthu vaku vamathabwa ndipuso dongu laku.’ 13  “‘Ndazamumalisa chiwawa cha sumu zaku, ndipu chiwawa cha mabangu* ngaku chazamuvwika so cha.+ 14  Ndazakukusambusa jalawi lakung’anima lambula kanthu, ndipu wazamusambuka malu ngakunikapu mikwawu.+ Wazamuzengeka so cha, pakuti ini Yehova ndalongoro,’ Yehova, Ambuya Fumu Yikulu ndiyu wakamba. 15  “Yehova, Ambuya Fumu Yikulu wakambiya Turo kuti: ‘Kumbi virwa* vazamusukunyika cha chifukwa cha chiwawa cha kubwangandulika kwaku, pa nyengu yo ŵanthu wo ŵe pafupi kufwa azamutamanthanga, pa nyengu yo ŵanthu azamubayika pakati paku?+ 16  Alongozgi wosi a kunyanja azamutuwapu pamipandu yawu yaufumu, azamuzuwa mikhanju* yawu, azamuzuwa vakuvwala vawu vakudyoŵa ndipu azamumbwambwanthiya. Yiwu azamuja pasi, azamumbwambwanthiyanga nyengu zosi ndipu azakukulereska mwakuzizwa.+ 17  Yiwu azamukumba sumu zakumba pakuliya+ chifukwa chaku yiwi ndipu azakukukambiya kuti: “Wamaliya limu,+ yiwi yo pakati paku pajanga ŵanthu akunyanja, tawuni yakuthamikika;Yiwi kweniso ŵanthu wo ajanga mwaku yiwi, mwenga* anthazi panyanja,+Ŵanthu wosi pacharu chapasi akuwopanga! 18  Virwa vazamumbwambwanthiya pa zuŵa lo wazamubwangandulikiya,Virwa va munyanja vazamutimbanyizgika pa nyengu yo wazamumaliya.”’+ 19  “Pakuti Yehova Ambuya Fumu Yikulu wakamba kuti: ‘Pa nyengu yo ndazakukubwanganduliya nge matawuni ngambula ŵanthu, pa nyengu yo ndazakukuthereske ndi maji nganandi kweniso asani maji nganthazi ngazikubizga,+ 20  yiwi ndi ŵanthu wo asikiya nawi muzenji,* ndazamuluta namwi ku ŵanthu akali; ndazamuchitiska kuti yiwi limoza ndi ŵanthu wo asikiya muzenji+ muzije mumalu ngapasi ukongwa, nge malu ngakali ngo ngakubwangandulika, kuti pakati paku pangazijanga so ŵanthu cha. Pavuli paki, ndazamutowesa charu cha ŵanthu amoyu. 21  “‘Ndazakukuwisiya soka mwamabuchibuchi ndipu wazamuŵaku so cha.+ Azakukupenja, kweni wazamusanirika so cha,’ Yehova, Ambuya Fumu Yikulu ndiyu wakamba.”

Mazu Ngam'mphata

Mazu ngaki chayingu, “Ŵana ŵaki anthukazi.”
Zina ili lilembeka so kuti, “Nebukadirezara.”
Anyaki akamba kuti, “kumpotu.”
Mazu ngaki chayingu, “kweniso mitundu yinandi ya ŵanthu.”
Pamwenga kuti, “ndi malipanga ngaki.”
Anyaki akamba kuti, “mabangwi.”
Anyaki akamba kuti, “vilumba.”
Pamwenga kuti, “ mikhanju yapanthuwa.”
Mazu ngaki chayingu, “Iyu ndi ŵanthu wo ajanga mwaku iyu ŵenga.”
Pamwenga kuti, “mudindi.”