Ezekiyeli 25:1-17

  • Uchimi wakukwaskana ndi Aamoni (1-7)

  • Uchimi wakukwaskana ndi Mowabu (8-11)

  • Uchimi wakukwaskana ndi Edomu (12-14)

  • Uchimi wakukwaskana ndi Afilisiti (15-17)

25  Yehova wangulongoro so nani, ndipu wangukamba kuti:  “Yiwi mwana wa munthu, lazga chisku chaku kwa Aamoni+ ndipu kamba uchimi wakukwaskana ndi yiwu.+  Ukambi vakukwaskana ndi Aamoni kuti: ‘Vwani mazu ngaku Yehova, Ambuya Fumu Yikulu. Yehova, Ambuya Fumu Yikulu wakamba kuti: “Pakuti mungukamba kuti, ‘Khawu cha! Vaja umampha!’ malu ngangu ngakupaturika ngati ngafipiskika, charu cha Isirayeli chati chabwangandulika ndipuso nyumba yaku Yuda yati yatoleke ku ukapolu,  ndikuperekeningi ku ŵanthu a Kuvuma kuti muje chihara chawu. Yiwu azamujintha misasa yawu* pakati pinu ndipuso azamujintha mahema ngawu pakati pinu. Yiwu azamukurya vipasu vinu ndipuso azamukumwa mkaka winu.  Raba+ ndimusambusengi malu ngakuliskaku ngamila, charu cha Aamoni ndichisambusengi malu ngakupumuliyaku mskambu; ndipu mwazamuziŵa kuti ini ndini Yehova.”’”  “Pakuti Yehova, Ambuya Fumu Yikulu wakamba kuti: ‘Chifukwa chakuti wati wawona vo vinguchitikiya charu cha Isirayeli, ungumba manja,+ ungukandakanda pasi malundi ngaku mwanthazi, ungukondwa ndipuso ungunyoza charu cho,+  ndikutambasuliyengi janja langu kuti ndikupereki ku mitundu ya ŵanthu nge vinthu vakuphangika ku nkhondu. Ndikubayengi kuti uleki kuja pakati pa mitundu ya ŵanthu ndipuso ndikunangengi kuti uleki kuja pakati pa vyaru.+ Ndikumaliyengi limu, ndipu wazamuziŵa kuti ini ndini Yehova.’  “Yehova, Ambuya Fumu Yikulu wakamba kuti: ‘Chifukwa chakuti Mowabu+ ndi Seiri+ akamba kuti, “Awonani! Nyumba yaku Yuda ye nge mitundu yinyaki yosi,”  ndazamuchitiska kuti matawuni nga mucharu cha Mowabu ngo nge mumphaka ya* charu cho, ngaje ngambula kuvikilirika, kusazgapu tawuni ya Beti-yeshimoti, Bala-meyoni, kweniso ya Kiriyatayimu.+ 10  Amowabu kweniso Aamoni ndazakuŵapereka ku ŵanthu a Kuvuma+ kuti aje chihara chawu, kuti Aamoni azileki kukumbukika pakati pa mitundu ya ŵanthu.+ 11  Ndazamupereka cheruzgu ku Mowabu,+ ndipu yiwu azamuziŵa kuti ini ndini Yehova.’ 12  “Yehova, Ambuya Fumu Yikulu wakamba kuti: ‘Edomu waweze nduzga pa nyumba yaku Yuda ndipu we ndi mulandu ukulu chifukwa cha kuŵaweze nduzga;+ 13  mwaviyo, Yehova, Ambuya Fumu Yikulu wakamba kuti: “Edomu ndazakumutambasuliya janja langu ndipu ndazamubaya ŵanthu ndi viŵetu, kweniso ndazakumusambusa mahami.+ Yiwu azamubayika ndi lipanga+ kwambiya ku Temani mpaka ku Dedani. 14  ‘Ndazamuweze nduzga paku Edomu mwakugwiriskiya ntchitu janja la ŵanthu ŵangu Ayisirayeli.+ Yiwu azamulongo ukali ndi kukwiya kwangu paku Edomu, kuti Aedomu aziziŵi mo ini ndiweze nduzga,’+ Yehova, Ambuya Fumu Yikulu ndiyu wakamba.”’ 15  “Yehova, Ambuya Fumu Yikulu wakamba kuti: ‘Afilisiti angukhumbisiska kuweze nduzga kweniso kunanga Ayisirayeli chifukwa chakuti aŵatinkhanga ukongwa.+ 16  Mwaviyo, Yehova Ambuya Fumu Yikulu wakamba kuti: “Afilisiti+ ndiŵatambasuliyengi janja langu, ndibayengi Akereti+ ndipuso ndinangengi ŵanthu wo ajaku a mumphepeti mwa nyanja.+ 17  Ndiŵachitiyengi ntchitu zikulu kuti ndiŵaweze ndi kuŵalanga ukongwa, ndipu asani ndaziŵaweze, azamuziŵa kuti ini ndini Yehova.”’”

Mazu Ngam'mphata

Pamwenga kuti, “misasa yawu yampanda.”
Pamwenga kuti, “ngo nge mumalu ngakusendemuka nga.”