Ezekiyeli 24:1-27

  • Yerusalemu we nge mumphika waulosu (1-14)

  • Nyifwa ya muwolu waku Ezekiyeli ye nge chisimikizu (15-27)

24  Yehova wangulongoro so nani mu chaka cha 9, mu mwezi wa 10, pa zuŵa la 10 la mwezi wo, ndipu wangukamba kuti:  “Yiwi mwana wa munthu, lemba deti ili,* zuŵa ili. Fumu ya ku Babiloni yayamba kuyukiya tawuni ya Yerusalemu pa zuŵa lenili.+  Ndipu ukambi nthanthi* yakukwaskana ndi nyumba yakugaruka, kamba vakukwaskana ndi yiwu kuti: “‘Yehova, Ambuya Fumu Yikulu wakamba kuti: “Jalika mumphika* pamotu; ujaliki pamotu ndipu udemu maji.+   Uŵikemu viŵalu vanyama,+ uŵikemu chiŵalu chechosi chamampha,Chiŵa champhata ndi chiŵa chanena;* uzazemu viwanga vamampha ukongwa.   To mbereri yamampha ukongwa mu mskambu,+ ndipu usonkhi vijiku kusi kwa mumphika wo. Bwatusa viŵalu va nyama yo ndipu ubiki viwanga mumumphika wo.”’  Mwaviyo, Yehova, Ambuya Fumu Yikulu wakamba kuti: ‘Soka tawuni yakudira ndopa,+ mumphika waulosu, wo ulosu waki watuzgikaku cha! Tuzgamu viŵalu vosi, chimozachimoza;+ ungavichitiyanga mayeri cha.   Pakuti ndopa za tawuni yo ze mukati mwaki;+ yinguzidira pajalawi lambula kanthu. Tawuni yo yinguzidira pasi cha kuti ziwundiki ndi dongu.+   Kuti yiyuski ukali wangu wakuweze nduzga,Ndaŵika ndopa zaki pajalawi lakung’anima, lambula kanthuKuti zileki kuwundika.’+  “Yehova, Ambuya Fumu Yikulu wakamba kuti: ‘Soka tawuni yakudira ndopa!+ Ndiwunjikengi mulu ukulu wa nkhuni. 10  Wunjika vijiku ndipuso buska motu,Bwatusa ukongwa nyama, punguwa msuni ndipuso piriza viwanga. 11  Jalika mumphika wambula kanthu pamaka kuti ufyiKuti mkuŵa waki uchiti dangalira. Kufipiskika kwaki kusongonokengi mukati mwaki,+ ndipu ulosu waki umalengi. 12  Ntchitu yakutowesa mumphika wo njakupaska mphwayi kweniso njakuvukisa,Pakuti ulosu waki unandi utuwengeku cha.+ Ponya mumphika wo pamotu limoza ndi ulosu waki!’ 13  “‘Yiwi ungufipiskika chifukwa cha jalidu laku lakuchitiska soni.+ Ndinguyesa kukutowesa kweni ungutowa cha. Utowengi cha mpaka po ukali wangu watuniya.+ 14  Ini Yehova ndalongoro, vichitikengi nadi. Ndichitengepu kanthu kwambula kutondeka, ndikuchitiyengi chitima cha pamwenga lisungu.+ Azakukuyeruzga mwakukoliyana ndi nthowa zaku kweniso vo uchita,’ Yehova, Ambuya Fumu Yikulu ndiyu wakamba.” 15  Yehova wangulongoro so nani, ndipu wangukamba kuti: 16  “Yiwi mwana wa munthu, nde pafupi kutuzgaku munthu yo utanja kwaku yiwi.+ Ndipu ndimupumengi kamoza pe. Ungaliyanga cha;* ungatenjenga cha ndipuso ungadiranga masozi cha. 17  Utamanthi mwachisisi, ndipuso ungachitanga cha mudawuku wakuliya akufwa.+ Umangi mphumphu yaku+ ndipu uvwali sapatu zaku.+ Ungabenekeriyanga cha mwembi wapamphunu,*+ ndipu ungaryanga cha chiŵandi cho ŵanthu aza nachu kwaku yiwi.”*+ 18  Ndi mlenji ndingulongoro ndi ŵanthu ndipu ndi mazulu muwolu wangu wangufwa. Mwaviyo, mawa laki mlenji ndinguchita vo ndingulamulika. 19  Ŵanthu andifumbanga kuti: “Kumbi utikambiyengi cha kuti vinthu ivi vo uchita ving’anamuwanji kwaku isi?” 20  Ndinguŵamuka kuti: “Yehova walongoro nani ndipu wandikambiya kuti, 21  ‘Kambiya nyumba yaku Isirayeli kuti: “Yehova, Ambuya Fumu Yikulu wakamba kuti, ‘Ndifipiskengi malu ngangu ngakupaturika,+ ko kutuliya kunyada kwinu kukulu, chinthu cho mutichiyanja ukongwa ndipuso cho mtima winu ukhumba. Ŵana ŵinu anthulumi kweniso anthukazi wo mukuŵaleka mutawuni yo azamukufwa ndi lipanga.+ 22  Pavuli paki, mwazamuchita nge mo ini ndachitiya. Mwazamubenekere cha mwembi winu wapamphunu, ndipu mwazamukurya cha chiŵandi cho ŵanthu azamukuza nachu kwaku yimwi.+ 23  Mwazamuvwala mphumphu kumutu kwinu kweniso sapatu kumaphazi nginu. Mwazamuliya cha pamwenga kutenje. Mumalu mwaki, mwazamuwonda chifukwa cha ubudi winu+ ndipu mwazamutamanthiyana. 24  Ezekiyeli waja chisimikizu kwaku yimwi.+ Nge mo iyu wachitiya, namwi mwazamuchita viyo. Asani venivi vazichitika, mwazamuziŵa kuti ini ndini Yehova, Ambuya Fumu Yikulu.’”’” 25  “Kweni yiwi mwana wa munthu, pa zuŵa lo ndazamutuzgapu malu ngawu ngakuvikilirika, chinthu chakutowa cho chitiŵakondwesa, chinthu cho atichiyanja, cho mtima wawu ukhumba, limoza ndi ŵana ŵawu anthulumi kweniso ŵana ŵawu anthukazi,+ 26  munthu yo wazamuthaŵa ndiyu wazakukukambiya venivi.+ 27  Mu zuŵa lenilo, wazamujula mulomu waku ndi kulongoro ndi munthu yo wathaŵa, ndipu wazamuja cheti cha.+ Wazamuja chisimikizu kwaku yiwu, ndipu azamuziŵa kuti ini ndini Yehova.”

Mazu Ngam'mphata

Mazu ngaki chayingu, “lemba zina la zuŵa.”
Pamwenga kuti, “ntharika.”
Pamwenga kuti, “mumphika wa mulomu usani.”
Mazu ngaki chayingu, “phewa.”
Pamwenga kuti, “Ungajipumanga pachifuŵa cha.”
Pamwenga kuti, “mulomu wanena.”
Mazu ngaki chayingu, “chiŵandi cha ŵanthu.”