Ezekiyeli 22:1-31

  • Yerusalemu, tawuni ya mulandu wa ndopa (1-16)

  • Isirayeli we nge vinthu vo vijaliya pakuyengetuwa siliva (17-22)

  • Alongozgi kweniso Ayisirayeli asuskika (23-31)

22  Yehova wangulongoro so nani, ndipu wangukamba kuti:  “Kweni yiwi mwana wa munthu, kumbi wanozgeka kupereka uthenga wacheruzgu pa* tawuni yo+ ye ndi mulandu wa ndopa kweniso kuyiziŵisa vinthu vosi vaukazuzi vo yichita?+  Ukambi kuti, ‘Yehova, Ambuya Fumu Yikulu wakamba kuti: “Yiwi tawuni yakuzaza ndi mulandu wa ndopa,+ tawuni yo nyengu yaki yituza,+ tawuni yo yipanga angoza akuseruska* kuti yijifipiski,+  we ndi mulandu chifukwa chakudira ndopa,+ ndipuso wafipiskika ndi angoza ŵaku akuseruska.+ Wachitiska kuti mazuŵa ngaku ngamali liŵi, ndipu vyaka vaku vamala. Ndichu chifukwa chaki ndazakukusambusa chinthu chakunyozeka ku mitundu ya ŵanthu kweniso chinthu chakunyozeka ku vyaru vosi.+  Vyaru vapafupi kweniso vakutali ndi yiwi, vazakukunyoza,+ yiwi tawuni yo ye ndi zina lakufipiskika ndipuso yo yazaza ndi chimtimbaheka.  Awona! Mulongozgi weyosi wa Ayisirayeli pakati paku, wagwiriskiya ntchitu mazaza ngaki kuti wadiri ndopa.+  Pakati paku pe ŵanthu wo ayuyuwa awusewu kweniso anyinawu.+ Yiwu abiya alendu, ndipuso achitiya nkhaza ŵana ambula awusewu* kweniso vyoko.”’”+  “‘Uyuyuwa malu ngangu ngakupaturika ndipuso ufipiska masabata ngangu.+  Pakati paku pe ŵanthu wo akamba vinthu viheni vakukwaskana ndi anyawu ndipu akhumba kudira ndopa.+ Pakati paku pe ŵanthu wo aturya vinthu vakuperekeka sembi pamapiri kweniso achita nkharu zakuchitiska soni pakati paku.+ 10  Pakati paku pe ŵanthu wo ayuyuwa pakugona pa awusewu,*+ ndipuso agonana ndi anthukazi akufipiskika wo ŵe ku mwezi.+ 11  Pakati paku, munthu wafipiska muwolu wa munyaki,+ munyaki yo we ndi nkharu yakuchitiska soni wakazuzga mkumwana waki,+ ndipu munyaki wagonana ndi mzichi waki, mwana munthukazi wa awisi.+ 12  Pakati paku pe ŵanthu wo alonde vinyeda kuti adiri ndopa.+ Ubwerekesa vinthu kuti usaniyi ndalama zapachanya+ pamwenga phindu,* kweniso uphanga ndalama ku ŵanthu wo ukuzengezana nawu.+ Wandiluwiya limu,’ Yehova Ambuya Fumu Yikulu ndiyu wakamba. 13  “‘Awona! Nditumba manja ngangu chifukwa cha kuseruka ndi phindu lachinyengu lo wasaniya kweniso chifukwa cha jalidu lakudira ndopa lo le pakati paku. 14  Kumbi wazamulutirizga kuja wachiganga kweniso kuja ndi manja nganthazi mu zuŵa lo ndazamupereke chilangu kwaku yiwi?+ Ini Yehova ndalongoro ndipu ndazamuchitapu kanthu. 15  Ndazakukumbininiskiya pakati pa mitundu ya ŵanthu kweniso ndazakukumbininiskiya muvyaru vinyaki,+ ndipu ndazamumalisa kufipiskika kwaku.+ 16  Wazamulengeseka pa masu pa mitundu ya ŵanthu ndipu wazamuziŵa kuti ini ndini Yehova.’”+ 17  Yehova wangulongoro so nani, ndipu wangukamba kuti: 18  “Yiwi mwana wa munthu, a munyumba yaku Isirayeli asambuka vinthu vabwekabweka* kwaku ini. Wosi ŵe nge mkuŵa, tini, chisulu kweniso ndolu mung’anju. Yiwu asambuka vinthu vo vijaliya pakuyengetuwa siliva.+ 19  “Mwaviyo, Yehova, Ambuya Fumu Yikulu wakamba kuti: ‘Chifukwa chakuti mosi mwasambuka vinthu vabwekabweka,*+ ndazakukuwunganisani pamoza mutawuni ya Yerusalemu. 20  Nge mo siliva, mkuŵa, chisulu, ndolu kweniso tini viwunganisikiya mung’anju kuti avibuski ndi motu ndi kuvisongono, ndimu so nani ndazakukuwunganisiyani chifukwa cha ukali kweniso kukwiya kwangu, ndipu ndazakukubuskani ndi motu ndi kukusongononi.+ 21  Ndazakukuwunganisani pamoza ndi kukupembani ndi motu wa ukali wangu,+ ndipu mwazamusongonoke mutawuni yo.+ 22  Nge mo siliva wasongonoke mung’anju, ndimu so namwi mwazamusongonoke mutawuni yo; ndipu mwazamuziŵa kuti ini Yehova, ndakupunguliyani ukali wangu.’” 23  Ndipu Yehova wangulongoro so nani, ndipu wangukamba kuti: 24  “Yiwi mwana wa munthu, kambiya charu cho kuti, ‘Ndiwi charu cho chazamutoweseka cha kweniso cho vuwa yazamuwiyapu cha mu zuŵa la ukali. 25  Achimi a mutawuni yo anozga chiŵembu,+ nge nkharamu yakukoroma yo yipaluwa nyama.+ Yiwu abaya ŵanthu. Aphanga chuma kweniso vinthu vakuzirwa. Achitiska kuti mutawuni yo muje vyoko vinandi. 26  Asembi a mutawuni yo aswa dangu langu,+ ndipu alutirizga kufipiska malu ngangu ngakupaturika.+ Apambanisa cha pakati pa vinthu vakupaturika ndi vinthu bweka,+ ndipu atondeka kuziŵisa ŵanthu vinthu vakufipiskika kweniso vinthu vambula kufipiskika,+ akana kusunga masabata ngangu, ndipu ndafipiskika pakati pawu. 27  Alongozgi a mutawuni yo ŵe nge mphumphi zo zipaluwa nyama; yiwu adira ndopa kweniso kubaya ŵanthu kuti asaniyi phindu lachinyengu.+ 28  Kweni achimi ŵaki apaka layimu vinthu vo achita. Awona viwona vaboza ndipu akamba vinthu vaboza vo vichitikengi kunthazi.+ Yiwu akamba kuti: “Yehova, Ambuya Fumu Yikulu wakamba kuti,” penipo ndi Yehova cha yo wakamba venivo. 29  Ŵanthu a mucharu cho aryiya ŵanthu ndi kuŵabiya,+ achitiya nkhaza ŵanthu wo akhumbika chovyu kweniso akavu, ndipu aryiya alendu ndi kukana kuŵachitiya urunji.’ 30  “‘Ndapenjanga munthu pakati pawu kuti wanozgi mpanda wamya pamwenga kuma pamalu ngakugumuka pa masu pangu kuti wavikiliyi ŵanthu, kuti charu chileki kubwangandulika,+ kweni ndingusaniyapu munthu weyosi cha. 31  Mwaviyo, ndazakuŵapunguliya ukali wangu kweniso ndazakuŵamaliya limu ndi motu wa ukali wangu. Ndazakuŵaweze mwakukoliyana ndi nthowa zawu,’ Yehova, Ambuya Fumu Yikulu ndiyu wakamba.”

Mazu Ngam'mphata

Mazu ngaki chayingu, “kumbi uyeruzgengi, kumbi uyeruzgengi.”
Mazu yanga ngakutuliya ku mazu nga Chiheberi ngo ngayanana ndi mazu ngakuti “mavi nga viŵetu” ndipu ngagwiriskikiya ntchitu pakuyuyuwa chinthu.
Pamwenga kuti, “ŵana alanda.”
Mazu ngaki chayingu, “ajalika nkhuli awusewu.”
Pamwenga kuti, “uchita katapira.”
Vinthu vo vijaliya asani ayengetuwa visulu.
Vinthu vo vijaliya asani ayengetuwa visulu.