Ezekiyeli 16:1-63

  • Chiuta watanja Yerusalemu (1-63)

    • Wasanirika nge mwana wakujowoleka (1-7)

    • Chiuta watimutowesa ndipu wachita nayu phanganu la nthengwa (8-14)

    • Yerusalemu waleka kugomezgeka (15-34)

    • Walangika chifukwa cha chigololu (35-43)

    • We nge Samariya kweniso Sodomu (44-58)

    • Chiuta wakumbuka phanganu laki (59-63)

16  Yehova wangulongoro so nani, ndipu wangukamba kuti:  “Yiwi mwana wa munthu, ziŵisa Yerusalemu vinthu vaukazuzi vo wachita.+  Ukambi kuti, ‘Yehova, Ambuya Fumu Yikulu wakambiya Yerusalemu kuti: “Kwaku kweniso ko ukuwiya nkhucharu cha Kanani. Awusu ŵenga Aamori+ ndipu anyoku ŵenga Ahiti.+  Kweni pa zuŵa lo unguwiya, umbwela waku ungudumulika cha, ungusambisika cha ndi maji kuti utowi, ungupakika cha mche ndipuso unguvungika cha musalu.  Pengavi yo wangukuchitiya chitima kuti wakuchitiyi venivi. Pengavi yo wangukulenge lisungu. Mumalu mwaki, unguponyeka kudondu chifukwa chakuti ungutinkhika pa zuŵa lo unguwiya.  “‘“Ndichijumpha pafupi, ndingukuwona uchipafuwapafuwa malundi wakhatima ndi ndopa, ndipu we penipo pasi wakhatima ndi ndopa, ndingukamba kuti: ‘Ujengi ndi umoyu!’ We pasi kweniso wakhatima ndi ndopa ndingukamba kuti: ‘Ujengi ndi umoyu!’  Ndingukusambusa mtundu ukulu, nge vakume vo vabuka mumunda, ndipu ungume, ungukuwa kweniso unguvwala vakujitowese vamampha ukongwa. Maŵe ngaku nganguma, ndipu sisi laku lingukuwa; kweni wenga weche nkhuli ndipu unguvwala chechosi cha.”’  “‘Ndichijumpha pafupi ndingukuwona, ndipu ndinguwona kuti wafika pa msinkhu wakuti ungayanjika. Mwaviyo ndingukutandawuliya chakuvwala changu+ ndipu ndingukubenekere kuti uleki kuja nkhuli. Ndingulapizga ndipuso ndinguchita nawi phanganu ndipu unguja wangu,’ Yehova, Ambuya Fumu Yikulu ndiyu wakamba.  ‘Kweniso ndingukusambisa ndi maji, ndingusuka ndopa zaku ndipuso ndingukupaka mafuta.+ 10  Pavuli paki, ndingukuvwalika chakuvwala chakudyoŵa, ndingukupaska sapatu za chikopa* chamampha, ndingukuvunga musalu yamampha kweniso ndingukuvwalika vakuvwala vakudula. 11  Ndingukuvwalika vakutowese, ndingukuvwalika vibangili mumanja ngaku kweniso ndingukuvwalika nekelesi mukhosi mwaku. 12  Ndingukuvwalika so mpheti pamphunu yaku, ndingukuvwalika ndeŵereŵi mumakutu ngaku kweniso ndingukuvwalika chisoti chaufumu chakutowa kumutu kwaku. 13  Wajitowesanga ndi golidi kweniso siliva, wavwalanga vakuvwala va salu zamampha, vakuvwala va salu zakudula ndipuso vakuvwala vakudyoŵa. Waryanga vakurya va ufwa wakusilirika, uchi ndipuso mafuta. Ungutowa ukongwa,+ ndipu wenga wakwenere kuja fumukazi.’” 14  “‘Mbiri yaku yinguwanda* ukongwa pakati pa mitundu ya ŵanthu+ chifukwa cha kutowa kwaku, pakuti wenga wakutowa ukongwa chifukwa chakuti ndingukupaska unkhankhu wangu,’+ Yehova, Ambuya Fumu Yikulu ndiyu wakamba.” 15  “‘Kweni ungwamba kuthemba kutowa kwaku,+ ndipu ungusambuka huli chifukwa cha kutchuka kwaku.+ Wajikonga cha, wachitanga uhuli ndi weyosi yo wajumphanga munthowa+ ndipu wamupaskanga kutowa kwaku. 16  Unguto vinyaki mwa vakuvwala vaku ndipu ungupangiya malu ngapachanya ngakutowa ko wachitiyanga uhuli.+ Vinthu vaviyo vitenere cha kuchitika, ndipu vingazichitikanga so cha. 17  Unguto so vakujitowese vaku vakutowa vagolidi kweniso vasiliva vo ndingukupaska, ndipu ungupangiya vikozgu vinthulumi ndi kuchita navu uhuli.+ 18  Unguto vakuvwala vaku vakudyoŵa ndi kubenekere vikozgu vo,* ndipu unguvipaska mafuta ngangu ndi vakununkhira vangu nge sembi.+ 19  Chiŵandi cho ndingukupaska, chakupangika ndi ufwa wakusilirika, mafuta ndipuso uchi vo ndingukupaska kuti uryengi, unguvipereka ku vikozgu vo nge sembi ya kafungu kamampha.*+ Venivi ndivu unguchita nadi,’ Yehova, Ambuya Fumu Yikulu ndiyu wakamba.” 20  “‘Unguto ŵana ŵaku anthulumi ndipuso ŵana ŵaku anthukazi wo ungundibaliya+ ndipu unguŵapereka kwa angoza ŵenaŵa nge sembi.+ Kumbi ukhorwa cha ndi uhuli waku? 21  Ungubaya ŵana ŵangu ndi kuŵapereka nge sembi mwakuŵajumphisa pamotu.+ 22  Uchichita vinthu vaku vosi vaukazuzi ndipuso uhuli, ungukumbuka cha mazuŵa nga unamana waku penipo wenga nkhuli kwambula kuvwala chechosi, po wapafuwangapafuwanga malundi ngaku wakhatima ndi ndopa. 23  Soka, soka kwaku yiwi chifukwa cha vinthu viheni vosi vo wachita,’+ Yehova Ambuya Fumu Yikulu ndiyu wakamba. 24  ‘Ungujizenge chimbumira ndipuso ungujipangiya malu ngapachanya mubalaza lelosi la tawuni. 25  Unguzenga malu ngapachanya pamalu ngakuzirwa nga msewu wewosi, ndipu kutowa kwaku ungukusambusa chinthu chaukazuzi chifukwa chakuti wajiperekanga ku* munthu weyosi yo wajumphanga munthowa,+ kweniso ungusazgiyaku uhuli waku.+ 26  Unguchita uhuli ndi ŵana anthulumi a ku Ijipiti,+ ŵanthu amata wo ukuzengezana nawu* ndipu ungundikwiyisa chifukwa cha uhuli wo unguchita maulendu ngambula kuŵerengeka. 27  Sonu ndikutambasuliyengi janja langu ndipu ndikupaskengi chakurya chimana.+ Ndazamuchitiska kuti anthukazi wo atikutinkha achiti nawi vosi vo akhumba,+ ŵana anthukazi ŵa Afilisiti wo anguseruka chifukwa cha nkharu yaku yakuchitiska soni.+ 28  “‘Chifukwa chakuti ungukhorwa cha, unguchita uhuli ndi ŵana anthulumi a ku Asiriya,+ kweni wati wachita nawu uhuli ungukhorwa mbwenu cha. 29  Ungusazgiyaku uhuli waku ndipu ungujipereka ku ŵanthu a mucharu cha amalonda* ndipuso kwa Akadiya,+ kweni ungukhorwa mbwenu cha. 30  Mtima waku ungutama* ukongwa* pa nyengu yo wachitanga vinthu vosi venivi, wachitanga vinthu nge huli lambula soni!’+ Yehova, Ambuya Fumu Yikulu ndiyu wakamba. 31  Kweni pa nyengu yo unguzenga chimbumira chaku pamalu ngakuzirwa nga msewu wewosi ndi kuzenga malu ngapachanya mubalaza lelosi la tawuni, wachitanga vinthu nge huli cha, chifukwa chakuti wakananga kulonde malipiru. 32  Ndiwi munthukazi wachigololu yo watanja anthulumi achilendu mumalu mwakwanja mulumu waki!+ 33  Ŵanthu apereka mphasu ku huli lelosi,+ kweni yiwi ndiwi upereka mphasu ku ŵanthu wosi wo atikukhumbira,+ ndipu upereka vinyeda kwaku yiwu kuti azi kwaku yiwi kutuliya mumalu ngakupambanapambana kuti azichiti nawi uhuli.+ 34  Yiwi upambana ukongwa ndi anthukazi anyaki wo achita uhuli. Palivi yo wachita uhuli nge mo yiwi uchitiya! Yiwi ndiwi ulipira ŵanthu, ndipu yiwu atikulipira chechosi cha. Upambana ukongwa ndi mahuli nganyaku.’ 35  “Mwaviyo, yiwi huli,+ yivwa mazu ngaku Yehova. 36  Yehova, Ambuya Fumu Yikulu wakamba kuti: ‘Chifukwa chakuti walongo khumbiru laku liheni mwakujumphisa, wazulika ndi kuja nkhuli uchichita uhuli ndi vibwezi vaku, kweniso ndi angoza ŵaku wosi akuseruska* ndipuso aukazuzi,+ wo unguŵapaska chinanga ndi ndopa za ŵana ŵaku anthulumi nge sembi,+ 37  mwaviyo, ndiwunganisa vibwezi vaku vosi vo unguvikondwesa, vosi vo waviyanjanga kweniso vo wavitinkhanga. Ndiŵawunganisengi pamoza kuti akuyukiyi kutuliya mumalu ngakupambanapambana. Ndazakukuzuwa kuti akuwoni ndipu azakukuwona we nkhani nkhuli.+ 38  “‘Ndipu ndazakukulanga ndi cheruzgu cho chitenere kuperekeka kwa anthukazi achigololu+ kweniso anthukazi akubaya ŵanthu+ ndipu wazamubayika chifukwa cha ukali wangu ndipuso sanji.+ 39  Ndazakukupereka mu manja mwawu, ndipu azamubwanganduwa vimbumira vaku. Azamubwanganduwa malu ngaku ngapachanya;+ azakukuzuwa vakuvwala vaku+ ndi kuto vinthu vaku vakujitowese vakutowa+ ndipu azakukuleka we nkhuli kweniso wambula kuvwala. 40  Azakukuziya ndi gulu la ŵanthu+ ndipu azakukuponya ndi mya,+ yiwu azakukubaya ndi malipanga ngawu.+ 41  Yiwu azamuwotcha nyumba zaku ndi motu+ ndipu azakukupaska cheruzgu pa masu pa anthukazi anandi; ndazamumalisa uhuli waku+ ndipu wazamuleka kulipira ŵanthu. 42  Ukali wangu wazamutuniya paku yiwi,+ ndipu ukali wangu wazamutuwaku kwaku yiwi;+ ndazamujalika mtima wangu pasi ndipu ndazamulutirizga cha kuja wakukwiya.’ 43  “‘Chifukwa chakuti ungukumbuka cha mazuŵa nga unamana waku+ ndipu ungundikwiyisa mwa kuchita vinthu vosi venivi, ndikuweziyengi mwakukoliyana ndi nthowa zaku ndipuso ulekengi nkharu yaku yakuchitiska soni kweniso vinthu vosi vaukazuzi vo uchita,’ Yehova, Ambuya Fumu Yikulu ndiyu wakamba. 44  “‘Awona! Weyosi yo wakamba nthanthi wazakukukambiya nthanthi yakuti: “Mwana munthukazi wakozga anyina!”+ 45  Yiwi we nge anyoku wo anguyuyuwa alumu ŵawu kweniso ŵana ŵawu. Ndipuso we nge abali ŵaku wo anguyuyuwa alumu ŵawu kweniso ŵana ŵawu. Anyoku ŵenga Ahiti ndipu awusu ŵenga Aamori.’”+ 46  “‘Mku waku ndi Samariya+ yo waja kunkhondi* ndi ŵana ŵaki anthukazi,*+ ndipu mvurwa waku ndi Sodomu+ yo waja kumwera* ndi ŵana ŵaki anthukazi.+ 47  Ungwenda munthowa zawu ndi kulondo vinthu vawu vaukazuzi, ndipu mu kanyengu kamanavi nkharu yaku yingunangika ukongwa kuluska nkharu yawu.+ 48  Nge mo ini ndiliri wamoyu, Yehova, Ambuya Fumu Yikulu ndiyu wakamba, ‘Mvurwa waku Sodomu ndi ŵana ŵaki anthukazi akuchitapu cha vo yiwi ndi ŵana ŵaku anthukazi mwachita. 49  Awona! Mvurwa waku Sodomu wangunanga vinthu ivi: Iyu ndi ŵana ŵaki anthukazi+ ŵenga akunyada,+ ŵenga ndi chakurya chinandi+ ndipuso afipanga mtima ndi chechosi cha;+ kweni awovyanga cha ŵanthu akusuzgika ndi akavu.+ 50  Yiwu angulutirizga kujikuzga+ ndipu alekanga cha kuchita vinthu vaukazuzi mumasu mwangu,+ mwaviyo ndinguwona kuti mphakwenere kuŵatuzgapu.+ 51  “‘Samariya+ nayu wakuchitapu cha chinanga ndi hafu ya maubudi ngo yiwi uchita. Unguchita maubudi nganandi kuluska ngo ŵanthu a ku Samariya anguchita, mwakuti mku waku wanguwoneka kuti ndi murunji chifukwa cha vinthu vosi vaukazuzi vo yiwi wachitanga.+ 52  Uchiti soni chifukwa chakuti wachitiska kuti nkharu ya abali ŵaku yiwoneki nge kuti njamampha.* Chifukwa chakuti wachita vinthu vaukazuzi ukongwa kuluska vo yiwu anguchita, yiwu mbarunji ukongwa kuphara yiwi. Mwaviyo, chita soni ndi kulengeseka chifukwa wachitiska kuti abali ŵaku awoneki nge kuti mbarunji.’ 53  “‘Ndazamuwunganisa ŵanthu a ku Sodomu ndi ŵana ŵawu wo angutoleke ku ukapolu kweniso ŵanthu a ku Samariya ndi ŵana ŵawu wo angutoleke ku ukapolu; ndipu ŵanthu ŵaku wo angutoleke ku ukapolu ndazakuŵawunganisa limoza ndi ŵanthu ŵenaŵa,+ 54  kuti uchiti soni; ndipuso kuti ulengeseki chifukwa cha vo wachita mwa kuŵapembuzga. 55  Abali ŵaku, Sodomu ndi ŵana ŵaki anthukazi azamuja so nge mo ŵenge kali, Samariya ndi ŵana ŵaki anthukazi azamuja so nge mo ŵenge kali ndipu yiwi ndi ŵana ŵaku anthukazi mwazamuja so nge mo mwenge kali.+ 56  Mvurwa waku Sodomu wenga wakuti ungamuzumbuwa cha pa nyengu yo yiwi wanyadanga, 57  ubudi waku wechendavumbuliki.+ Sonu ŵana anthukazi a ku Siriya ndipuso wo akuzengezana nawu atikunyoza, ndipu ŵana anthukazi ŵa Afilisiti+ wo akuzunguliya atikunena. 58  Ndikuweziyengi mwakukoliyana ndi nkharu yaku yakuchitiska soni kweniso vinthu vaukazuzi vo uchita,’ Yehova ndiyu wakamba.” 59  “Pakuti Yehova, Ambuya Fumu Yikulu wakamba kuti: ‘Ndikuchitiyengi mwakukoliyana ndi vo wachita,+ chifukwa chakuti unguyuyuwa vo ungulapizga mwakuswa phanganu langu.+ 60  Kweni ndazamukumbuka phanganu lo ndinguchita nawi pa unamana waku, ndipu ndazamuchita nawi phanganu lamuyaya.+ 61  Wazamukumbuka nkharu yaku ndi kuchita soni+ pa nyengu yo wazamulonde ŵana ŵa anyoku, aku ŵaku kweniso avurwa ŵaku, ndipu ndazakuŵapereka kwaku yiwi kuti aje ŵana ŵaku anthukazi, kweni ndazamuchita venivi chifukwa cha phanganu lo ndikuchita nawi cha.’ 62  “‘Ndazamuchita nawi phanganu; ndipu wazamuziŵa kuti ini ndini Yehova. 63  Pavuli paki, wazamukumbuka ndipu wazamuchita soni ukongwa kuti ujuli mulomu waku chifukwa cha kulengeseka kwaku,+ asani ndazibenekere ubudi waku chinanga kuti wachita vinthu vinandi viheni,’+ Yehova, Ambuya Fumu Yikulu ndiyu wakamba.”

Mazu Ngam'mphata

Pamwenga kuti, “chikopa cha katumbwi.”
Mazu ngaki chayingu, “Zina laku linguwanda.”
Kung’anamuwa angoza anthulumi.
Pamwenga kuti, “kafungu kakujalika mtima pasi.” Mazu ngaki chayingu, “kafungu kakupumuzga.”
Mazu ngaki chayingu, “wajuliyanga malundi.”
Mazu ngaki chayingu, “ŵanthu a viŵalu vikuluvikulu wo ukuzengezana nawu.”
Mazu ngaki chayingu, “mucharu cha Kanani.”
Pamwenga kuti, “ungumala nthazi.”
Yapa pangafwatulikiya so kuti, “Ndingukukwiyiya ukongwa.”
Mazu yanga ngakutuliya ku mazu nga Chiheberi ngo ngayanana ndi mazu ngakuti “mavi nga viŵetu” ndipu ngagwiriskikiya ntchitu pakuyuyuwa chinthu.
Anyaki akamba kuti, “kumpotu.”Mazu ngaki chayingu, “kumazge kwaku.”
Panyaki ang’anamuwa matawuni ngamanangamana ngakufupi ndi Samariya.
Mazu ngaki chayingu, “kumaryi kwaku.”
Pamwenga kuti, “chifukwa chakuti waŵikiya kuvuli abali ŵaku.”