Ezekiyeli 13:1-23

  • Uchimi wakukwaskana ndi achimi aboza (1-16)

    • Vimati vakupaka layimu vibwangandulikengi (10-12)

  • Uchimi wakukwaskana ndi achimi anthukazi aboza (17-23)

13  Yehova wangulongoro so nani, ndipu wangukamba kuti:  “Yiwi mwana wa munthu, kamba uchimi wakukwaskana ndi achimi a ku Isirayeli,+ ndipu kambiya ŵanthu wo akamba mauchimi ngamumutu mwawu+ kuti, ‘Vwani mazu ngaku Yehova.  Yehova, Ambuya Fumu Yikulu wakamba kuti: “Soka achimi akupusa, wo alondo maŵanaŵanu ngawu,* penipo awona chinthu chechosi cha!+  Yiwi Isirayeli, achimi ŵaku asambuka akambwi a mumahami.  Mulutengi cha ko kwabwangandulika mumpanda wamya kuti mukaŵazenge so mpanda a munyumba yaku Isirayeli.+ Mwaviyo, Ayisirayeli aponengi cha pa nkhondu mu zuŵa laku Yehova.”+  “Yiwu awona viwona vaboza ndi kukamba mauchimi ngaboza, akamba kuti, ‘Yehova wakamba kuti,’ penipo Yehova waŵatuma cha, ndipu alindizga kuti vo akamba vifiskiki.+  Asi mwawona viwona vaboza kweniso mwakamba mauchimi ngaboza, po mukamba kuti, ‘Yehova wakamba kuti,’ penipo ini ndakamba chechosi cha?”’  “‘Mwaviyo, Yehova, Ambuya Fumu Yikulu wakamba kuti: “‘Pakuti mwakamba boza ndipuso viwona vinu vaboza, ndilimbanengi namwi,’ Yehova, Ambuya Fumu Yikulu ndiyu wakamba.”+  Janja langu lilimbanengi ndi achimi wo awona viwona vaboza kweniso wo akamba mauchimi ngaboza.+ Yiwu aŵengepu cha pakati pa ŵanthu wo nditiŵakambiya visisi; ndipuso alembekengi cha mubuku la nyumba yaku Isirayeli, kweniso aweriyengeku cha kucharu cha Isirayeli; ndipu mwazamuziŵa kuti ini ndini Yehova, Ambuya Fumu Yikulu.+ 10  Venivi vichitikengi chifukwa chakuti yiwu alandizga ŵanthu ŵangu ndipu atiŵakambiya kuti, “Kwe chimangu!” penipo kulivi chimangu.+ Asani azenga chimati chambula kukho, atichipaka layimu.’*+ 11  “Kambiya ŵanthu wo apaka layimu kuchimati kuti chiwengi. Vuwa yikulu yiwengi, matalala ngawengi, ndipu vimphunga vanthazi viwisiyengi pasi chimati cho.+ 12  Asani chimati cho chaziwa, mwazamufumbika kuti, ‘We pani layimu yo mungupaka kuchimati?’+ 13  “Mwaviyo, Yehova, Ambuya Fumu Yikulu wakamba kuti: ‘Ndiputisengi chimphunga chifukwa cha ukali wangu, ndiwisengi vuwa yikulu chifukwa cha kukwiya kwangu, ndipuso ndiwisengi matalala chifukwa cha ukali wangu wakunanga. 14  Ndibwanganduwengi chimati cho mukuchipaka layimu ndipuso ndichiwisiyengi pasi, ndipu fawundeshoni yaki yazamuwoneka. Asani tawuni yaziwa, yimwi mwazamumaliya mwenimo; ndipu mwazamuziŵa kuti ini ndini Yehova.’ 15  “‘Asani ndazilongo ukali wangu wosi pa chimati cho kweniso pa ŵanthu wo anguchipaka layimu, ndazakukukambiyani kuti: “Chimati kulivi ndipuso ŵanthu wo anguchipaka layimu nawu so kulivi.+ 16  Achimi a ku Isirayeli, wo akambanga mauchimi ngakukwaskana ndi Yerusalemu kweniso wo awonanga viwona va chimangu vakukwaskana ndi tawuni yo, penipo kulivi chimangu,+ amala,”’ Yehova, Ambuya Fumu Yikulu ndiyu wakamba. 17  “Kweni yiwi mwana wa munthu, ng’anamukiya ku ŵana anthukazi a ŵanthu ŵaku, wo akamba mauchimi ngamumutu mwawu, ndipu kamba uchimi wakukwaskana ndi yiwu. 18  Akambiyi kuti, ‘Yehova, Ambuya Fumu Yikulu wakamba kuti: “Soka kwa anthukazi wo asona vakuvwala vamumanja* kweniso wo apanga salu zakudika kumutu za sayizi yeyosi, kuti athyi ŵanthu! Kumbi mupenja umoyu wa ŵanthu ŵangu, muchiŵanaŵana kuti mutaskengi umoyu winu? 19  Kumbi mundifipiskengi pakati pa ŵanthu ŵangu chifukwa cha balire wakuzaza janja kweniso chifukwa cha vibanthu va chiŵandi,+ mwakubaya ŵanthu wo atenere cha kubayika, ndi kuleka ŵanthu wo atenere kubayika, ndipu muchita venivi mwakupusika ŵanthu ŵangu wo avwisiya maboza nginu?”’+ 20  “Mwaviyo, Yehova, Ambuya Fumu Yikulu wakamba kuti: ‘Yimwi anthukazi, ndilimbanengi ndi vakuvwala vinu vamumanja, vo mutivigwiriskiya ntchitu pakuthya ŵanthu nge viyuni, ndipu ndazakuvikeruwa kumanja nginu ndi kufwatuwa ŵanthu wo mutiŵathya nge viyuni. 21  Ndazamukeruwa salu zinu zakudika kumutu ndipu ndazamutaska ŵanthu ŵangu mu manja mwinu, mwazakuŵathya so cha kuti muŵako; ndipu mwazamuziŵa kuti ini ndini Yehova.+ 22  Pakuti mwachitiska chitima munthu murunji chifukwa cha boza linu,+ penipo ini ndakhumbanga cha kuti wasuzgiki,* ndipu mwakholesa manja nga munthu muheni,+ kuti waleki kutuwaku ku nthowa yaki yiheni ndi kuja ndi umoyu.+ 23  Mwaviyo, yimwi anthukazi, mwazamuwona so viwona vaboza cha pamwenga kukamba vinthu vo vichitikengi kunthazi;+ ndazamutaska ŵanthu ŵangu mu manja mwinu, ndipu mwazamuziŵa kuti ini ndini Yehova.’”

Mazu Ngam'mphata

Mazu ngaki chayingu, “mzimu wawu.”
Kung’anamuwa kuzenga chimati chambula kukho cha mukati mwa nyumba ndi kuchipaka layimu kuti chiwonekengi nge kuti ntchakukho.
Kung’anamuwa vakuvwala vamasenga vo avwalanga pakasukusuku pamwenga pajanja.
Pamwenga kuti, “wavwi urwirwi.”