Dotoronome 7:1-26
7 “Asani Yehova Chiuta waku wazikusereza mucharu cho we pafupi kusere ndi kuchito kuja chaku,+ wazamutuzgamu mitundu yo ye ndi ŵanthu anandi pa masu paku.+ Iyu wazamutuzgamu mitundu iyi: Ahiti, Agirigasi, Aamori,+ Akanani, Aperezi, Ahivi ndi Ayebusi,+ mitundu 7 yo ye ndi ŵanthu anandi kweniso yo njanthazi kuluska yiwi.+
2 Yehova Chiuta waku wazamupereka ŵanthu ŵenaŵa mu manja mwaku ndipu yiwi wazakuŵathereska.+ Utenere kuziŵananga kwambula kutondeka.+ Ungazichitanga nawu phanganu lelosi cha pamwenga kuŵachitiya lisungu.+
3 Ungazichitanga nawu cha phanganu la nthengwa lelosi.* Ungaziperekanga cha ŵana ŵaku anthukazi ku ŵana ŵawu anthulumi pamwenga kuto ŵana ŵawu anthukazi kuti azije awolu ŵa ŵana ŵaku anthulumi.+
4 Pakuti azamupatuska ŵana ŵaku anthulumi kuti azileki kundilondo ndipu azamukwamba kuteŵete achiuta anyaki;+ venivi vazamuchitiska kuti ukali waku Yehova ukole paku yiwi ndipu wazakukubaya mwaliŵi.+
5 “Mumalu mwaki, uziŵachitiyi ivi: Uzibwanganduwi maguŵa ngawu nga sembi, uziswi vipilala vawu vakupaturika,+ uziwisiyi pasi mapolu ngawu ngakupaturika*+ ndipuso uziwotchi vikozgu vawu vakujoba.+
6 Pakuti yimwi ndimwi ŵanthu akupaturika kwaku Yehova Chiuta winu, ndipu Yehova Chiuta winu wakusankhani kuti muje ŵanthu ŵaki, chuma chaki chapade,* kutuliya mu mitundu yosi ya ŵanthu yo ye pacharu chapasi.+
7 “Yehova wangukuyanjani ndi kukusankhani+ chifukwa chakuti mwenga anandi kuluska ŵanthu anyaki wosi cha, yimwi mwenga amana ukongwa pa ŵanthu wosi.+
8 Mumalu mwaki, Yehova wakukutuzgani ndi janja lanthazi kuti wakutaskeni munyumba ya ukapolu,+ mu janja laku* Farawo, fumu ya ku Ijipiti, chifukwa chakuti Yehova wangukuyanjani ndipuso wangusunga vo wangulapizga kwa apapi ŵinu akali.+
9 Muziŵa umampha kuti Yehova Chiuta winu ndi Chiuta wauneneska, Chiuta wakugomezgeka, yo wasunga phanganu laki ndipuso yo walongo chanju chambula kumala ku migonezi 1,000 ya ŵanthu wo atimuyanja ndi kusunga marangu ngaki.+
10 Kweni ŵanthu wo atimutinkha wazakuŵaweze pa masu ndi pa masu mwa kuŵananga.+ Iyu wazamuswera cha kumalana ndi ŵanthu wosi wo atimutinkha, wazakuŵaweze pa masu ndi pa masu.
11 Mwaviyo, uwonesesi kuti usunga marangu, fundu ndipuso vyeruzgu vo nditikulamula msanawale, ndipu uvilondongi.
12 “Asani mulutirizgengi kuvwiya vyeruzgu venivi ndi kuvisunga kweniso kuvilondo, Yehova Chiuta waku wasungengi phanganu kweniso wakulongongi chanju chambula kumala cho wangulapizga kwa apapi ŵaku.
13 Wazakukuyanja, wazakukutumbika ndipuso wazamuchitiska kuti uyandani. Wazakukutumbika ndi ŵana anandi*+ kweniso vipasu va mumunda waku, tirigu waku, vinyu waku wasonu, mafuta ngaku,+ ŵana a ng’ombi zaku kweniso ŵana a mbereri zaku, mucharu cho wakulapizga kwa apapi ŵaku akali kuti wakupaskengi.+
14 Wazamutumbikika ukongwa kuluska ŵanthu wosi;+ pakati pinu pazamuŵavi munthulumi pamwenga munthukazi yo wazamuja wambula mwana, ndipuso pazamuŵavi chiŵetu chaku cho chazamuja chambula mwana.+
15 Yehova wazamutuzgaku matenda ngosi kwaku yiwi ndipu wazakukuwisiya cha nthenda zakofya zo unguwona mucharu cha Ijipiti.+ Mumalu mwaki, wazakuziwisiya pa ŵanthu wosi wo atikutinkha.
16 Uzibayi* ŵanthu wosi wo Yehova Chiuta waku wazakuŵapereka mu manja mwaku.+ Ungaziŵachitiyanga* lisungu cha+ ndipu ungaziteŵetiyanga achiuta ŵawu cha,+ chifukwa chingazija chiŵana kwaku yiwi.+
17 “Asani mumtima mwaku wazamukamba kuti, ‘Ŵanthu yaŵa mbanandi kuluska isi. Ndingaŵadikisa wuli?’+
18 ungaziŵawopanga cha.+ Uzikumbukengi vo Yehova Chiuta waku wanguchitiya Farawo ndipuso charu chosi cha Ijipiti,+
19 vyeruzgu vikulu vo masu ngaku nganguwona, visimikizu ndi vakuziziswa+ kweniso janja lanthazi ndi janja lakutambasuka, lo Yehova Chiuta waku wangukutuzgiya mucharu cho.+ Venivi ndivu Yehova Chiuta waku wazamuchitiya ŵanthu wosi wo utiŵawopa.+
20 Yehova Chiuta waku wazamuchitiska kuti mitima yawu yisongonoki* mpaka po ŵanthu wo angujaku + ndipuso wo ajibisanga amaliya pa masu paku.
21 Ungaŵawopanga cha chifukwa Yehova Chiuta waku we nawi,+ iyu ndi Chiuta mukulu ndipuso wakuchitiska mantha.+
22 “Yehova Chiuta waku wazamudikisa mitundu yeniyi pa masu paku kamanakamana.+ Wazakukuzomereza cha kuti uziyimali liŵi, kuchitiya kuti nyama zamudondu zizileki kuyandana ndi kukupweteka.
23 Yehova Chiuta waku wazakuyipereka mu manja mwaku ndipu wazakuyithereska mpaka po yamaliya limu.+
24 Iyu wazamupereka mafumu ngawu mu manja mwaku,+ ndipu yiwi wazamusisita mazina ngawu pacharu chapasi.+ Palivi yo wazamulimbana nawi+ mpaka po waŵamaliya.+
25 Muziwotchi vikozgu vakujoba va achiuta ŵawu pamotu.+ Ungazikhumbiranga siliva ndi golidi wa achiuta wo cha, pamwenga kuto siliva ndi golidi yo kuti waje waku,+ kuti vizileki kuja chiŵana kwaku yiwi, pakuti Yehova Chiuta waku waseruka navu vinthu venivi.+
26 Ungaziserenga ndi vinthu vaukazuzi cha munyumba yaku kuti uzileki kunangika nge yivu. Uziviwonengi kuti vaukazuzi ndipu uzivitinkhengi ukongwa chifukwa ndi vinthu vo vitenere kunangika.
Mazu Ngam'mphata
^ Pamwenga kuti, “Ungazichitanga nawu cha chitolerana chechosi.”
^ Wonani Mazu ngo Ngakonkhoskeka.
^ Pamwenga kuti, “chuma chaki chakuzirwa.”
^ Pamwenga kuti, “mu nthazi zaku.”
^ Mazu ngaki chayingu, “Wazamutumbika chipasu cha nthumbu yaku.”
^ Mazu ngaki chayingu, “Uzimezi.”
^ Mazu ngaki chayingu, “Jisu laku lingaziŵachitiyanga.”
^ Yapa pangafwatulikiya so kuti, “wazamuchitiska kuti achiti mantha.”
