Dotoronome 32:1-52
32 “Vwani, yimwi machanya ndipu ndilongorongi,Charu chapasi chivwi mazu nga mumulomu mwangu.
2 Ulongozgi wangu uwengi nge vuwa;Mazu ngangu nganthonyengi nge dungwi,Nge vuwa yamuswera pa utekaKweniso nge vuwa yikulu pa vakume.
3 Pakuti ndipharazgengi zina laku Yehova.+
Ndikambengi va ukulu waku Chiuta widu!+
4 Jalawi, ntchitu zaki zakufikapu,+Pakuti nthowa zaki zosi zaurunji.+
Chiuta wakugomezgeka+ yo wachita cha vinthu vambula urunji;+Iyu ndi murunji kweniso ngwakunyoloka.+
5 Yiwu ndiwu achita vinthu vo vingachitiska kuti anangiki.+
Yiwu mbana ŵaki cha, chilema ntchawu.+
Yiwu ndi mugonezi wakugombete kweniso wakunyongoroka! +
6 Kumbi venivi ndivu mutenere kuchitiya Yehova,+Mwaŵanthu akupusa kweniso ambula zeru yimwi?+
Asi iyu ndiyu Wusemwi yo wakuchitiska kuti muŵeku,+Yo wakukupangani ndi kukujalikiskani mwanthazi?
7 Kumbukani mazuŵa ngamwaka;Ŵanaŵaniyani vyaka va migonezi yakali.
Fumbani awusemwi ndipu akukambiyeningi;+Fumbani ŵara ŵinu ndipu akuziŵiseningi.
8 Wapachanya Limu wati wapereka chihara ku mitundu,+Wati wapatuwa ŵana aku Adamu* yumoza ku munyaki,+Wanguŵika mphaka za mitundu ya ŵanthu+Mwakukoliyana ndi unandi wa ŵana anthulumi aku Isirayeli.+
9 Pakuti ŵanthu aku Yehova ntchigaŵa chaki;+Yakobe ntchihara chaki.+
10 Wangumusaniya mucharu chachipululu+Ndipuso muchipalamba chambula kanthu mo mubangula vinyama.+
Wangumuzingiliza kuti wamuvikiliyi, wangumuphwere,+Kweniso wangumuvikiliya nge mboni ya jisu laki.+
11 Nge mo nombu yisukunyisiya chizimbu chaki,Mo yiphululukiya pachanya pa ŵana ŵaki,Kutambaluwa mapapa ngaki, kuŵato,Ndi kuŵapinga pachanya pa mapapa ngaki,+
12 Yehova yija wangulutirizga kumulongozga;*+Pengavi chiuta wachilendu weyosi yo wenga nayu.+
13 Chiuta wangumuyendesa pamalu ngapachanya nga pacharu chapasi,+Ndipu wangurya vipasu va muminda.+
Wangumuryisa uchi wamujalawiNdipuso mafuta ngakutuliya mujalawi linononu,
14 Wangumuryisa mkaka wakukhoma wa* ng’ombi ndipuso mkaka wa mbereri,Limoza ndi mbereri zakututuŵa,*Mbereri zinthulumi zaku Bashani, ndipuso aphongu,Limoza ndi tirigu wamampha ukongwa;+Ndipu ungumwa vinyu wakutuliya ku* mphereska.
15 Yeshuruni* wati watutuŵa wangugaruka.
Watutuŵa, waja mukhomi, wajintcha.+
Mwaviyo wangukana Chiuta yo wakumupanga,+Ndipuso wanguyuyuwa Jalawi la utaski waki.
16 Angumukwiyisa ndi achiuta achilendu;+Amukwiyisanga ndi vinthu vaukazuzi vo achitanga.+
17 Aperekanga sembi kwaku Chiuta cha kweni ku viŵanda,+Kwa achiuta wo aŵaziŵanga cha,Achiuta ŵafya wo aza sonu,Kwa achiuta wo apapi ŵinu akali aŵaziŵanga cha.
18 Munguluwa Jalawi+ lo likukubalani,Ndipu mungumukumbuka cha Chiuta yo wakukubalani.+
19 Yehova wati wawona viyo, wanguŵakana+Chifukwa chakuti ŵana ŵaki anthulumi ndi ŵana ŵaki anthukazi angumukwiyisa.
20 Mwaviyo, wangukamba kuti, ‘Ndibisengi chisku changu kwaku yiwu;+Ndiwonengi vo viŵachitikiyengi.
Pakuti yiwu ndi mugonezi wo uchitiya dala vinthu viheni,+Ŵana ambula kugomezgeka.+
21 Andikwiyisa* ndi yo ndi chiuta cha;+Andikwiyisa ndi vikozgu vawu vambula fundu.+
Mwaviyo, nani ndazakuŵachitiska sanji ndi ŵanthu akuti ndi mtundu cha;+Ndazakuŵakwiyisa ndi mtundu uzereza.+
22 Pakuti ukali wangu wabuska motu+Wo ukoliyengi mpaka kusi kwa Dindi,*+Motu wo unangengi charu chapasi ndi vipasu vakiNdipu uwotchengi mafawundeshoni nga mapiri.
23 Ndisazgiyengeku masoka ngawu;Ndipu mivi yangu ndiyigwiriskiyengi ntchitu paku yiwu.
24 Azamulefuka chifukwa cha nja+Azamupwetekeka ndi nthenda ya kufunda muliŵavu kweniso pharanyiku lakuŵaŵa.+
Ndiŵatumiyengi minyu nga vinyama vakofya kuti ngaŵalumi+Ndipuso ndiŵatumiyengi mata ngakali nga vamoyu vakukwaŵa pasi.
25 Kubwalu, lipanga lazakuŵamala;+Mukati, vinthu vakofya+Vazamuchitikiya mnyamata, mwali,Litema kweniso munthu wanyivu.*+
26 Ndatingi ndikambengi kuti: “Ndiŵambininiskengi;Ndichitiskengi kuti aleki kukumbukika pakati pa ŵanthu,”
27 Kweni ndingopa kunyoza kwa arwani,+Chifukwa atingi ajengi ndi maŵanaŵanu ngaheni.+
Yiwu atingi akambengi kuti: “Nthazi zidu ndizu zapunda;+
Ndi Yehova cha yo wachita vosi ivi.”
28 Pakuti yiwu ndi mtundu wambula zeru,*Ndi mtundu wambula kuvwisa vinthu.+
29 Mphanyi ŵenga azeru!+ Atingi alungurukengi vinthu venivi.+
Atingi aŵanaŵaniyengi vo viŵachitikiyengi.+
30 Munthu yumoza wangatchimbiza wuli ŵanthu 1,000,Ndipu ŵanthu ŵaŵi angatchimbiza wuli ŵanthu 10,000?+
Vingachitika pijapija asani Jalawi laŵagulisa+Ndipuso asani Yehova waŵapereka.
31 Pakuti jalawi lawu le nge Jalawi lidu cha,+Chinanga mbarwani ŵidu aziŵa umampha venivi.+
32 Pakuti chimiti chawu cha mphereska chikutuliya kuchimiti cha mphereska cha ku SodomuKweniso chikutuliya muminda ya ku Gomora.+
Mphereska zawu ze ndi poyizoni,Makhoroza ngawu ngakuŵaŵa.+
33 Vinyu wawu ndi mata ngakali nga njoka,Ndi poyizoni wakubaya wa khakhu.
34 Asi ini ndini ndikusunga venivi,Ndikuvijaliya munkhokwi yangu?+
35 Kuweze nduzga nkhwangu kweniso kupereka chilangu nkhwangu,+Pa nyengu yakuŵikika asani malundi ngawu ngazitelemuka,+Pakuti zuŵa la soka lawu le pafupi,Ndipu vinthu vo vitiŵalindizga vizengi mwaliŵi.’
36 Pakuti Yehova wazamuyeruzga ŵanthu ŵaki,+Ndipu wazamuchitiya chitima ateŵeti ŵaki+Asani waziwona kuti nthazi zawu zamala,Kweniso kuti paja ŵaka ŵanthu wo akhumbika chovyu ndipuso ambula nthazi.
37 Pavuli paki, wazamukamba kuti, ‘Ŵe pani achiuta ŵawu,+Jalawi lo athaŵiyangaku,
38 Wo aryanga mafuta nga sembi zawu,*Ndi kumwa vinyu wa sembi zawu za chakumwa?+
Asoki ndipu akuwovyi.
Yiwu aje malu ngaku ngakuthaŵiyaku.
39 Wona sonu kuti ini, ndini,+Ndipu palivi achiuta anyaki kupatuwaku ini.+
Ndibaya kweniso ndipereka umoyu.+
Ndipweteka+ ndipuso ndichizga,+Ndipu palivi yo wangataska munthu mujanja langu.+
40 Pakuti ndisoske janja langu kuchanya,Ndipu ndilapizga kuti: “Nge mo ini ndiliri wamoyu muyaya,”+
41 Asani ndanora lipanga langu lakung’animaNdipuso asani ndanozga janja langu kuti ndiyeruzgi,+Ndazamuweze arwani ŵangu+Ndipu ndazamulanga wo atinditinkha.
42 Ndazamuchitiska kuti mivi yangu yiloŵe ndi ndopa,Ndipu lipanga langu lazamukurya nyama,Limoza ndi ndopa za ŵanthu wo abayika kweniso akapolu,Limoza ndi mitu ya alongozgi a murwani.’
43 Kondwani yimwi mitundu limoza ndi ŵanthu ŵaki,+Pakuti wazamuweze ndopa za ateŵeti ŵaki,+Ndipu wazamuweze nduzga pa arwani ŵaki+Kweniso wazamutowesa* charu cha ŵanthu ŵaki.”
44 Sonu Mozesi wanguza ndi kukamba mazu ngosi nga sumu iyi ŵanthu wo achivwa,+ iyu limoza ndi Hosheya*+ mwana waku Nuni.
45 Mozesi wati wamaliza kulongoro mazu ngosi yanga kwa Ayisirayeli wosi,
46 wanguŵakambiya kuti: “Musungi mazu ngosi ngakutcheŵeska ngo ndakukambiyani msanawale,+ kuti muzikambiyengi ŵana ŵinu alinga kuti aziwonesesengi kuti asunga mazu ngosi nga Dangu ili.+
47 Pakuti mazu yanga ngambula fundu cha kwaku yimwi, kweni ngangakuwovyani kuti muje ndi umoyu,+ ndipu asani muvwiyengi mazu yanga mwamuja ndi umoyu utali mucharu cho muyambuka Yorodani kuti mukachito kuja chinu.”
48 Yehova wangulongoro ndi Mozesi pa zuŵa lenili, ndipu wangukamba kuti:
49 “Kwera paphiri ili la Abarimu,+ Phiri la Nebo+ lo le mucharu cha Mowabu, mwakulereskana ndi Yeriko, kuti uwoni charu cha Kanani cho nditichipereka kwa Ayisirayeli kuti chije chawu.+
50 Pavuli paki, wamukufwa paphiri lo we pafupi kukwera, ndipu wamuwunganisikiya ku ŵanthu ŵaku,* nge mo Aroni mku waku wakufwiya pa Phiri la Horo+ ndi kuwunganisikiya ku ŵanthu ŵaki,*
51 chifukwa chakuti mosi mwaŵaŵi mungugomezgeka cha kwaku ini pakati pa Ayisirayeli pa maji nga ku Meriba+ ku Kadeshi, muchipululu cha Zini, pakuti mungunditowesa cha pa masu pa Ayisirayeli.+
52 Charu cho uchiwoniyengi patali, kweni userengi cha mucharu cho ndipaska Ayisirayeli.”+
Mazu Ngam'mphata
^ Panyaki, “mtundu wa ŵanthu.”
^ Kung’anamuwa kulongozga Yakobe.
^ Pamwenga kuti, “masa nga.”
^ Mazu ngaki chayingu, “ndi mafuta nga mbereri.”
^ Mazu ngaki chayingu, “wakutuliya ku ndopa za.”
^ Kung’anamuwa kuti, “Wakunyoloka,” zina laulemu laku Isirayeli.
^ Pamwenga kuti, “Andichitiska sanji.”
^ Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
^ Anyaki akamba kuti, “wambuha.”
^ Yapa pangafwatulikiya so kuti, “mtundu wambula kuvwiya ulongozgi.”
^ Pamwenga kuti, “Wo aryanga sembi zawu zamampha ukongwa,”
^ Mazu ngaki chayingu, “wazamubenekere.”
^ Zina lakwamba laku Yoswa. Zina lakuti Hosheya likutuliya ku zina lakuti Hoshaya ndipu ling’anamuwa kuti, “Kutaskika ndi Ya; Ya Wataska.”
^ Yanga ndi mazu ngandakatulu ngo ngang’anamuwa kuti wafwengi.
^ Yanga ndi mazu ngandakatulu ngo ngang’anamuwa kufwa.
