Dotoronome 29:1-29
29 Yanga ndi mazu nga phanganu lo Yehova wangulamula Mozesi kuti wachiti ndi Ayisirayeli mucharu cha Mowabu, kusazgiyapu pa phanganu lo wanguchita nawu ku Horebu.+
2 Sonu Mozesi wanguwunganisa Ayisirayeli wosi ndipu wanguŵakambiya kuti: “Munguwona ndi masu nginu vinthu vosi vo Yehova wanguchita mucharu cha Ijipiti, vo wanguchitiya Farawo, ateŵeti ŵaki wosi kweniso charu chaki chosi.+
3 Munguwona so vyeruzgu vikulu, visimikizu vikulu ndipuso vakuziziswa.+
4 Kweni Yehova wakupaskani cha mtima wakuwamu, masu kuti muwoni ndi makutu kuti muvwi mpaka kufika msanawale.+
5 ‘Pa nyengu yo ndakulongozganingi kwa vyaka 40 muchipululu,+ vakuvwala vinu vingumala cha paliŵavu linu ndipuso sapatu zinu zingumala cha kumaphazi nginu.+
6 Mungurya cha chiŵandi ndipuso mungumwa cha vinyu pamwenga chakumwa chechosi chakuloŵeresa, alinga kuti muziŵi kuti ini ndini Yehova Chiuta winu.’
7 Pavuli paki, mungufika pamalu nganu ndipu Sihoni, fumu ya ku Heshiboni+ kweniso Ogi, fumu ya ku Bashani,+ anguza kuzichita nasi nkhondu kweni tinguŵathereska.+
8 Pavuli paki, tinguto charu chawu ndipu tinguchipereka ku fuku laku Rubeni, fuku laku Gadi ndipuso ku hafu ya fuku laku Manasi kuti chije chihara chawu.+
9 Mwaviyo, musungengi mazu nga mu phanganu ili, kweniso mungavwiyengi kuti vinthu vosi vo muchita vikuyendiyeningi umampha.+
10 “Mosi mwama panu msanawale pa masu paku Yehova Chiuta winu, alongozgi a mafuku nginu, ŵara ŵinu, alongozgi ŵinu, munthulumi weyosi wa mu Isirayeli,
11 ŵana ŵinu, awolu ŵinu,+ alendu+ wo aja mumsasa winu, kwambiya munthu yo watikudeŵiyani nkhuni mpaka munthu yo watikuneŵiyani maji.
12 Mwe panu kuti muchiti phanganu ndi Yehova Chiuta winu mwakuchita kulapizga, phanganu lo Yehova Chiuta winu wachita namwi msanawale,+
13 kuti msanawale wakuŵikeni kuja ŵanthu ŵaki+ ndipuso kuti iyu waje Chiuta winu,+ nge mo wakukulayizgiyani kweniso nge mo wakulapizgiya kwa apapi ŵinu akali, Abrahamu,+ Isaki+ ndi Yakobe.+
14 “Sonu ndichita ndi yimwi pe cha phanganu ili lo nditilisimikiza mwakuchita kulapizga,
15 kweni ndichita phanganu ili msanawale ndi ŵanthu wo ŵama nasi panu pa masu paku Yehova Chiuta widu, kweniso ndi wo ŵe nasi cha panu msanawale.
16 (Pakuti muziŵa umampha mo tingujaliya mucharu cha Ijipiti ndipuso mo tingujumphiya pakati pa mitundu yakupambanapambana pa ulendu widu.+
17 Ndipu mwawonanga vinthu vawu vaukazuzi ndipuso angoza ŵawu akuseruska*+ avimiti, amya, asiliva kweniso agolidi, wo ŵenga pakati pawu.)
18 Phweriyani kuti pakati pinu paleki kuŵa munthulumi pamwenga munthukazi, banja pamwenga fuku lo mtima waki watuwaku kwaku Yehova Chiuta widu ndi kwamba kuteŵete achiuta a mitundu yinyaki,+ kuti pakati pinu paleki kuŵa msisi wakutuzga chakume* chapoyizoni kweniso kamiti kakuŵaŵa.+
19 “Kweni asani munthu munyaki watuvwa mazu ngakulayizga yanga ndipu watamba kujikuzga mumtima mwaki, mwakukamba kuti, ‘Ndijengi mwachimangu, chinanga kuti ndilutirizga kwenda mu nthowa ya mtima wangu,’ uku wananga chechosi* mu nthowa yaki,
20 Yehova wamugowokiyengi cha munthu yo.+ Mumalu mwaki, ukali ukulu waku Yehova ukoliyengi paku iyu, matembu ngosi ngo ngakulembeka mubuku ili ngazengi paku iyu+ ndipu Yehova wasisitengi zina laki pacharu chapasi.
21 Pavuli paki, Yehova wamupatuwengi pakati pa mafuku nga Ayisirayeli kuti wamulangi mwakukoliyana ndi matembu ngosi nga phanganu ngo ngakulembeka mubuku ili la Dangu.
22 “Migonezi yakunthazi ya ŵana ŵinu, kweniso alendu akutuliya kucharu chakutali azamuwona milili ya mucharu chinu ndipuso masoka ngo Yehova wapereka mucharu cho,
23 sulufule, mche kweniso kotcha, mwakuti mucharu cho mwazamumijika pamwenga kubuka mbewu cha, ndipuso mwazamubuka chakume chechosi cha, nge mo Sodomu ndi Gomora+ kweniso Adima ndi Zeboyimu,+ vingubwangandulikiya, matawuni ngo Yehova wangubwanganduwa chifukwa cha kufya mtima ndipuso ukali waki,
24 yiwu kweniso mitundu yinyaki yosi azamukamba kuti, ‘Ntchifukwa wuli Yehova wanguchita venivi ndi charu ichi?+ Ntchinthu wuli cho chingumuchitiska kuti wakwiyi ukongwa?’
25 Pavuli paki, azamukamba kuti, ‘Ntchifukwa chakuti angujowo phanganu laku Yehova,+ Chiuta wa apapi ŵawu akali, phanganu lo wanguchita nawu wati waŵatuzga mucharu cha Ijipiti.+
26 Kweni anguluta ndi kuchiteŵete kweniso kusindamiya achiuta anyaki, achiuta wo aŵaziŵanga cha kweniso wo wanguŵazomereza cha kuti aŵasopengi.+
27 Pavuli paki, ukali waku Yehova ungukole pacharu cho ndipu wanguchilanga ndi matembu ngosi ngo ngakulembeka mubuku ili.+
28 Mwaviyo, Yehova wakuŵachesuwa mucharu chawu chifukwa cha kufya mtima,+ kukwiya kweniso ukali ukulu wo wenga nawu ndipu wakuŵatumiza kucharu chinyaki, ko ŵali msanawale.’+
29 “Vinthu vakubisika, vaku Yehova Chiuta widu,+ kweni vinthu vo vavumbulika vidu ndipuso va ŵana ŵidu kwamuyaya, kuti tilondongi mazu ngosi nga mu Dangu ili.+
Mazu Ngam'mphata
^ Mazu yanga ngakutuliya ku mazu nga Chiheberi ngo ngayanana ndi mazu ngakuti “mavi nga viŵetu” ndipu ngagwiriskikiya ntchitu pakuyuyuwa chinthu.
^ Mazu ngaki chayingu, “wakupasa chipasu.”
^ Mazu ngaki chayingu, “chimiti chakudirika umampha limoza ndi chakumira.”
