Dotoronome 27:1-26
27 Pavuli paki, Mozesi limoza ndi ŵara ŵa Ayisirayeli angulamula ŵanthu kuti: “Muvwiyengi marangu ngosi ngo nditikupaskani msanawale.
2 Pa zuŵa lo mwazamuyambukiya Yorodani kuti musere mucharu cho Yehova Chiuta winu watikupaskani, muzimiki mya yikuluyikulu ndipu muziyipangi pulasitala.*+
3 Asani mwaziyambuka, muzilembi pamya yo mazu ngosi nga mu Dangu ili, kuti muzisere mucharu cho Yehova Chiuta winu watikupaskani, charu chakwenda mkaka ndi uchi, nge mo Yehova, Chiuta wa apapi ŵinu akali wakukulayizgiyani.+
4 Asani mwaziyambuka Yorodani, muzimiki mya yeniyi pa Phiri la Ebala,+ ndipu muziyipangi pulasitala, nge mo nditikulamuliyani msanawale.
5 Ndipuso mukazenge Yehova Chiuta winu guŵa la sembi la mya pamalu ngeningo. Mya yo, mungaziyisemanga cha ndi vidya vachisulu.+
6 Pakuzenge Yehova Chiuta winu guŵa la sembi, muzigwiriskiyi ntchitu mya yamphumphu ndipu muziperekiyepu sembi zakupiriza kwaku Yehova Chiuta winu.
7 Muzipereki sembi za chimangu+ ndi kuziryiya kweniko,+ ndipu muzikondwi pa masu paku Yehova Chiuta winu.+
8 Mukalembi mazu ngosi nga mu Dangu ili pamya yo, ndipu ngakawonekengi umampha.”+
9 Pavuli paki, Mozesi ndi asembi wo Mbalevi, angukambiya Ayisirayeli wosi kuti: “Yimwi Ayisirayeli jani cheti ndipu vwisiyani. Msanawale mwaja ŵanthu aku Yehova Chiuta winu.+
10 Muvwiyengi mazu ngaku Yehova Chiuta winu ndipu mulondongi marangu ngaki+ ndi fundu zaki, zo nditikulamulani msanawale.”
11 Pa zuŵa lenili Mozesi wangulamula ŵanthu kuti:
12 “Asani mwaziyambuka Yorodani, mafuku ngo ngazamukuma pa Phiri la Gerizimu+ ndi kutumbika ŵanthu ndi yanga: fuku laku Simiyoni, laku Levi, laku Yuda, laku Isakara, laku Yosefi ndipuso fuku laku Benjamini.
13 Ndipu mafuku ngo ngazamukuma pa Phiri la Ebala+ kuti ngazikambi matembu ndi yanga: fuku laku Rubeni, laku Gadi, laku Ashere, laku Zebuloni, laku Dani ndipuso fuku laku Nafutali.
14 Ndipu Alevi azamukambiya Ayisirayeli wosi mwakudaniriza kuti:+
15 “‘Ngwakutembeka munthu yo wapanga chikozgu chakusema+ pamwenga chikozgu chachisulu*+ ndi kuchibisa, chinthu cho Yehova waseruka nachu,+ cho chapangika ndi munthu walusu.’ (Ŵanthu wosi azamumuka kuti, ‘Ame!’*)
16 “‘Ngwakutembeka munthu yo wayuyuwa awisi pamwenga anyina.’+ (Ŵanthu wosi azamumuka kuti, ‘Ame!’)
17 “‘Ngwakutembeka munthu yo wandereza mphaka ya munyaki.’+ (Ŵanthu wosi azamumuka kuti, ‘Ame!’)
18 “‘Ngwakutembeka munthu yo walandizga nthowa munthu wachibulumutiya.’+ (Ŵanthu wosi azamumuka kuti, ‘Ame!’)
19 “‘Ngwakutembeka munthu yo wabendezga cheruzgu+ asani wayeruzga mulandu wa mulendu, mwana mulanda* pamwenga choko.’+ (Ŵanthu wosi azamumuka kuti, ‘Ame!’)
20 “‘Ngwakutembeka munthu yo wagonana ndi muwolu wa awisi, chifukwa chakuti wayuyuwa awisi.’*+ (Ŵanthu wosi azamumuka kuti, ‘Ame!’)
21 “‘Ngwakutembeka munthu yo wagona ndi nyama yeyosi.’+ (Ŵanthu wosi azamumuka kuti, ‘Ame!’)
22 “‘Ngwakutembeka munthu yo wagonana ndi mzichi waki, yo ndi mwana munthukazi wa awisi pamwenga mwana munthukazi wa anyina.’+ (Ŵanthu wosi azamumuka kuti, ‘Ame!’)
23 “‘Ngwakutembeka munthu yo wagonana ndi apongozi ŵaki.’*+ (Ŵanthu wosi azamumuka kuti, ‘Ame!’)
24 “‘Ngwakutembeka munthu yo wakhaza munyaki ndi kumubaya.’+ (Ŵanthu wosi azamumuka kuti, ‘Ame!’)
25 “‘Ngwakutembeka munthu yo walonde vinyeda kuti wabayi munthu wambula kunanga.’+ (Ŵanthu wosi azamumuka kuti, ‘Ame!’)
26 “‘Ngwakutembeka munthu yo walekengi kuvwiya mazu nga mu Dangu ili ndi kungachita.’+ (Ŵanthu wosi azamumuka kuti, ‘Ame!’)
Mazu Ngam'mphata
^ Pamwenga kuti, “muziyipaki layimu.”
^ Pamwenga kuti, “Vije viyo!”
^ Pamwenga kuti, “chachisulu chakusongono.”
^ Mazu ngaki chayingu, “mwana wambula awisi.”
^ Mazu ngaki chayingu, “wabenuwa siketi ya awisi.”
^ Kung’anamuwa anyina a muwolu waki.
