Dotoronome 26:1-19
26 “Asani wazisere mucharu cho Yehova Chiuta waku watikupaska kuti chije chihara chaku ndipu wazichito ndi kwamba kujamu,
2 uzito vinyaki mwa vipasu vakwamba va vinthu vosi vo wavuna, vo wawunjika kutuliya mucharu cho Yehova Chiuta waku watikupaska, ndipu uziviŵiki musokola ndi kuluta navu kumalu ngo Yehova Chiuta winu wasankha kuti kujengi zina laki.+
3 Uziluti kwa wasembi yo wazamuteŵetiyanga mu nyengu yeniyo ndi kumukambiya kuti, ‘Msanawale ndikambiya Yehova Chiuta winu kuti ndasere mucharu cho Yehova wangulapizga kwa apapi ŵidu akali kuti watipaskengi.’+
4 “Pavuli paki, wasembi wazito sokola yo mumanja mwaku ndi kuyiŵika panthazi pa guŵa la sembi laku Yehova Chiuta waku.
5 Pavuli paki, uzikambi pa masu paku Yehova Chiuta waku kuti, ‘Ada ŵenga Muaramu+ wakuyingayinga, anguluta ku Ijipiti+ ndi kwamba kuja kweniko nge mulendu. Pa nyengu yo, ŵenga amanavi mu banja lawu.+ Kweni ŵe kweniko, angusambuka mtundu ukulu, wanthazi ndipuso anguyandana.+
6 Ndipu Ayijipiti angutichitiya nkhaza, angutikandirizga ndipuso angutigwiriska ntchitu yakufyo ya ukapolu.+
7 Mwaviyo, tingwamba kuliriya Yehova Chiuta wa apapi ŵidu akali, ndipu Yehova wanguvwa kuliya kwidu. Iyu wanguwona kutombozgeka kwidu, kusuzgika kwidu ndipuso kukandirizgika kwidu.+
8 Pakumaliya, Yehova wangutituzga mucharu cha Ijipiti mwakugwiriskiya ntchitu janja lanthazi, janja lakutambasuka,+ ntchitu zakofya, visimikizu ndipuso vakuziziswa.+
9 Pavuli paki, wanguza nasi kunu ndi kutipaska charu ichi, charu chakwenda mkaka ndi uchi.+
10 Sonu ndaza ndi vipasu vakwamba va vinthu vo ndavuna mucharu cho Yehova wandipaska.’+
“Uviŵiki pa masu paku Yehova Chiuta waku ndipu usindami pa masu paku Yehova Chiuta waku.
11 Pavuli paki, yiwi, Mlevi ndipuso mulendu yo waja pakati pinu, mukondwengi ndi vinthu vosi vamampha vo Yehova Chiuta waku wapereka kwaku yiwi ndi banja laku.+
12 “Asani wazimaliza kupereka+ chatchumi chosi cha vinthu vo wavuna mu chaka chachitatu, chaka chakupereke chatchumi, uziperekengi chatchumi cho ku Mlevi, mulendu, mwana mulanda* kweniso choko, ndipu yiwu azamukurya ndi kuguta mumatawuni* nginu.+
13 Pavuli paki, wazamukamba pa masu paku Yehova Chiuta waku kuti, ‘Munyumba mwangu ndatuzgamu chigaŵa chakupaturika ndipu ndachipereka kwa Mlevi, mulendu, mwana mulanda ndipuso choko,+ nge mo mwandilamuliya. Ndaswa cha marangu nginu pamwenga kungaleka.
14 Ndaryapu cha vinyaki mwa vinthu venivi pa nyengu yo ndaliyanga, ndavituzgapu cha pa nyengu yo ndenga wakufipiskika pamwenga kupereka vinyaki mwaku ivu chifukwa cha ŵanthu akufwa. Ndavwiya mazu ngaku Yehova Chiuta wangu ndipu ndachita vosi vo mukundilamula.
15 Sonu lereskani pasi kutuliya kuchanya, malu nginu ngakujaku ngakupaturika, ndipu tumbikani ŵanthu ŵinu Ayisirayeli ndipuso charu cho mwatipaska+ nge mo mungulapizgiya kwa apapi ŵidu akali,+ charu chakwenda mkaka ndi uchi.’+
16 “Msanawale, Yehova Chiuta winu watikulamulani kuti mulondongi fundu zenizi kweniso vyeruzgu venivi. Muvisungengi ndi kuvigwiriskiya ntchitu ndi mtima winu wosi+ kweniso umoyu winu wosi.
17 Msanawale, Yehova wakukambiyani kuti wajengi Chiuta winu asani muyendengi mu nthowa zaki, asani mulondongi fundu zaki,+ marangu ngaki+ ndi vyeruzgu vaki+ kweniso asani muvwiyengi mazu ngaki.
18 Ndipu msanawale mwakambiya Yehova kuti mujengi ŵanthu ŵaki, chuma chaki chapade,*+ nge mo wakukulayizgiyani, kweniso kuti musungengi marangu ngaki ngosi,
19 ndipu iyu wakukwezeningi kuluska mitundu yinyaki yosi yo wakupanga,+ wachitiskengi kuti mutumbikiki, muziŵiki kweniso kuti mukankhuskiki asani mulutirizgengi kuja ŵanthu atuŵa kwaku Yehova Chiuta winu,+ nge mo wakulayizgiya.”
Mazu Ngam'mphata
^ Mazu ngaki chayingu, “mumageti.”
^ Mazu ngaki chayingu, “mwana wambula awisi.”
^ Pamwenga kuti, “chuma chaki chakuzirwa.”
