Dotoronome 21:1-23
21 “Asani munthu wasanirika kuti wafwa kudondu, mucharu cho Yehova Chiuta winu watikupaskani kuti chije chinu ndipu munthu yo wamubaya waziŵika cha,
2 ŵara ndi akweruzga+ ŵinu atenere kuluta ndi kuchipima mtunda wo ulipu kutuliya po pe thupi la munthu yo, kuchifika kumatawuni ngo nge kufupi ndi malu ngo pe munthu yo wafwa.
3 Pavuli paki, ŵara a mutawuni yo ye pafupi ukongwa ndi malu ngo pe munthu yo wafwa, atongi tholi* linthukazi kutuliya pa ng’ombi zawu. Tholi lo lijengi lakuti lechendagwirepu ntchitu, lo ŵechendalimangiriyepu goli.
4 Ŵara a mutawuni yo, aluti ndi ntholi lo mudambu* lo litenda maji, lo ŵechendalimemu pamwenga kupandamu mbewu, ndipu tholi linthukazi lo alifyole khosi mudambu mwenimo.+
5 “Ndipu asembi wo Mbalevi, azengi kuti atumbiki ŵanthu mu zina laku Yehova,+ chifukwa chakuti Yehova Chiuta winu wakuŵasankha kuti amuteŵetiyengi.+ Yiwu akambengi mo mphindanu yeyosi yakukwaskana ndi viwawa yitenere kumaliya.+
6 Pavuli paki, ŵara wosi a mutawuni yo ye pafupi ukongwa ndi malu ngo pe munthu yo wafwa, atenere kusambiya mumanja+ pachanya pa tholi linthukazi lo alifyole khosi mudambu,
7 ndipu atenere kukamba kuti, ‘Ndi manja ngidu cha ngo ngadira ndopa izi ndipu masu ngidu nganguwona cha ndopa izi zichidirika.
8 Yimwi Yehova, mungaŵambanga mulandu cha ŵanthu ŵinu Ayisirayeli wo mukuŵawombo,+ ndipu mungazomerezanga cha kuti mulandu wakudira ndopa zambula kunanga uje pakati pa ŵanthu ŵinu Ayisirayeli.’+ Pavuli paki, Ayisirayeli aŵengevi mulandu wa ndopa.
9 Asani mwachita venivi, mutuzgengepu mulandu wakudira ndopa zambula kunanga pakati pinu ndipu muchitengi cho ntchamampha mu masu mwaku Yehova.
10 “Asani waluta kuchichita nkhondu ndi arwani ŵaku, ndipu Yehova Chiuta waku wakuthereske arwani ŵaku kweniso yiwi waŵako kuti aje akapolu ŵaku,+
11 ndipu pakati pa akapolu wo, wawonapu munthukazi wakutowa yo wamukhumbira ndipu ukhumba kumuto kuti waje muwolu waku,
12 ungaluta nayu kunyumba yaku. Munthukazi yo wameti sisi laki, wacheketi njoŵi zaki,
13 wazuwi vakuvwala vo wanguvwala pa nyengu yo wakolekanga ndipu waje munyumba yaku. Iyu waliyi nyifwa ya awisi kweniso anyina kwa mwezi wamphumphu,+ pavuli paki ungagonana nayu ndipu ujengi mulumu waki ndipu iyu wajengi muwolu waku.
14 Kweni asani wakukondwesa cha, umuleki kuti wakengi+ kwekosi ko wakhumba. Kweni ungamugulisanga cha pamwenga kumuchitiya nkhaza, pakuti wamuyuyuwa.
15 “Asani munthulumi we ndi anthukazi ŵaŵi ndipu watanja ukongwa yumoza kuluska munyaki* ndipu wosi ŵaŵi amubaliya ŵana anthulumi ndipu mwana wakwamba ngwa munthukazi yo watimutinkha,+
16 pa zuŵa lakupereke chihara ku ŵana ŵaki, wazomerezeka cha kuto mwana wa munthukazi yo watanja kuti ndiyu mwana wakwamba mumalu mwa mwana wa munthukazi yo watimutinkha, yo ndi mwana wakwamba nadi.
17 Iyu watenere kuzomereza kuti mwana wa munthukazi yo watimutinkha ndiyu mwana wakwamba ndipu watenere kumupaska vigaŵa viŵi pa chinthu chechosi cho we nachu, pakuti iyu ndiyu chiyambi cha nthazi zaki zakubara. Wanangwa wakuja mwana wakwamba ngwaki.+
18 “Asani munthu we ndi mwana wamtafu kweniso wakugaruka ndipu watiŵavwiya cha awisi ndi anyina,+ ndipu ayesesa kumulunguchizga kweni wakana kuŵavwiya,+
19 awisi ndi anyina amukongi pajanja ndi kuluta nayu kwa ŵara pageti la tawuni yaki,
20 ndipu akambiyengi ŵara a tawuni yaki kuti, ‘Mwana widu ngwamtafu kweniso ngwakugaruka. Iyu wakana kutivwiya. Ndi munkharyi+ ndipuso muloŵevu.’+
21 Pavuli paki, anthulumi wosi a mutawuni yaki amuponyengi ndi mya kuti wafwi. Mwaviyo, mutenere kutuzgapu chinthu chiheni pakati pinu ndipu Ayisirayeli wosi avwengi ndi kuchita mantha.+
22 “Asani munthu wachita ubudi wo chilangu chaki ndi nyifwa ndipu wabayika+ ndi kupayikika pachimiti,+
23 thupi laki lingajanga pachimiti usiku wosi cha.+ Mumalu mwaki, mutenere kumuŵika zuŵa lenilo, chifukwa munthu yo wapayikika pachimiti ngwakutembeka ndi Chiuta,+ ndipu mutenere cha kufipiska charu cho Yehova Chiuta winu watikupaskani kuti chije chihara chinu.+
Mazu Ngam'mphata
^ Tholi ndi mwana wa ng’ombi.
^ Ili ndi dambu lo lija ndi maji mu nyengu ya vuwa pe.
^ Mazu ngaki chayingu, “we ndi anthukazi ŵaŵi, yo watimuyanja ndi yo watimutinkha.”
