Dotoronome 16:1-22
16 “Musungengi mwezi wa Abibu,* ndipu muchitiyengi Yehova Chiuta winu phwandu la Pasika,+ pakuti mu mwezi wa Abibu, Yehova Chiuta winu wangukutuzgani mucharu cha Ijipiti ndi usiku.+
2 Ndipu mutenere kupereka sembi ya Pasika kwaku Yehova Chiuta winu,+ kutuliya pa mbereri zinu, mbuzi zinu kweniso ng’ombi zinu.+ Sembi yeniyi mutenere kuyipereke kumalu ngo Yehova wasankha kuti kujengi zina laki.+
3 Mutenere cha kurya sembi yeniyi limoza ndi chinthu chechosi chakusazgaku chakutupisa.+ Kwa mazuŵa 7 muryengi viŵandi vambula chakutupisa, viŵandi va suzgu, chifukwa mungutuwa mucharu cha Ijipiti mwaliŵiliŵi.+ Muchitengi venivi kuti mukumbukengi zuŵa lo mungutuliya mucharu cha Ijipiti nyengu yosi yo mujaliyengi ndi umoyu.+
4 Kwa mazuŵa 7, muchigaŵa chinu chosi mungasanirikanga fulawu wakukasa wakusazgaku chakutupisa cha,+ kweniso nyama yeyosi yo mwayipereka sembi ndi mazulu pa zuŵa lakwamba, mungayisunganga cha usiku wosi mpaka kufika ndi mlenji.+
5 Muzomerezeka cha kupereka sembi ya Pasika mutawuni ŵaka yeyosi, pa matawuni ngo Yehova Chiuta winu watikupaskani.
6 Kweni muyiperekiyengi kumalu ngo Yehova Chiuta winu wasankha kuti kujengi zina laki. Mutenere kupereka sembi ya Pasika ndi mazulu asani lumwi lasere ŵaka,+ pa nyengu yakuŵikika yo mungutuliya mucharu cha Ijipiti.
7 Mutenere kuyibikiya ndipuso kuyiryiya+ kumalu ngo Yehova Chiuta winu wasankha,+ ndipu ndi mlenji mungawere kumahema nginu.
8 Kwa mazuŵa 6, muryengi viŵandi vambula chakutupisa, ndipu pa zuŵa la 7, muchitiyengi Yehova Chiuta winu unganu wapade. Mungagwiranga ntchitu yeyosi cha.+
9 “Muŵerengengi masabata 7. Muyambengi kuŵerenga masabata 7 ngenanga pa zuŵa lo mwayambiya kuvuna mbewu zinu.*+
10 Pavuli paki, muchitiyengi Yehova Chiuta winu Phwandu la Masabata,+ ndipu muzengi ndi vinthu vo mupereka mwakukhumba mwija vakutuliya mu janja linu, mwakukoliyana ndi mo Yehova Chiuta winu wakutumbikiyani.+
11 Ndipu mukondwengi pa masu paku Yehova Chiuta winu, yimwi, ŵana ŵinu anthulumi, ŵana ŵinu anthukazi, akapolu ŵinu anthulumi, akapolu ŵinu anthukazi, Alevi wo aja mumatawuni* nginu, alendu, ŵana alanda* ndipuso vyoko vo vija pakati pinu, kumalu ngo Yehova Chiuta winu wasankha kuti kujengi zina laki.+
12 Mukumbukengi kuti mwenga akapolu ku Ijipiti,+ ndipu musungengi ndi kulondo fundu zenizi.
13 “Muchitengi Phwandu la Misasa+ kwa mazuŵa 7 pa nyengu yo muwunjika mbewu kutuliya pamalu nginu ngakukhwemiyapu mbewu, ndipuso asani muto mafuta kutuliya pamalu nginu ngakukamiyapu mafuta kweniso vinyu kutuliya pamalu nginu ngakukandiyapu mphereska.
14 Mukondwengi pa nyengu yo muchita phwandu linu,+ yimwi, ŵana ŵinu anthulumi, ŵana ŵinu anthukazi, akapolu ŵinu anthulumi, akapolu ŵinu anthukazi, Alevi, alendu, ŵana alanda ndipuso vyoko vo vija mumatawuni nginu.
15 Kwa mazuŵa 7, muchitiyengi Yehova Chiuta winu phwandu+ kumalu ngo Yehova wasankha, pakuti Yehova Chiuta winu watumbika vinthu vosi vo mwavuna kweniso vosi vo mwachita,+ ndipu mukondwengi ukongwa.+
16 “Katatu pa chaka, anthulumi wosi pakati pinu awonekiyengi pa masu paku Yehova Chiuta winu kumalu ngo wasankha: pa Phwandu la Viŵandi Vambula Chakutupisa,+ pa Phwandu la Masabata,+ kweniso pa Phwandu la Misasa.+ Ndipu palivi yo watenere kuwoneke pa masu paku Yehova ndi manja ngaŵaka.
17 Mphasu yo munthu weyosi watenere kupereka yikoliyanengi ndi mo Yehova Chiuta winu wamutumbikiya.+
18 “Mutenere kusankha akweruzga+ ndipuso ŵara ŵa fuku lelosi mumatawuni ngosi ngo Yehova Chiuta winu watikupaskani, ndipu atenere kuyeruzga ŵanthu mwaurunji.
19 Mungabendezganga urunji cha,+ kwanjiya+ pamwenga kulonde vinyeda, pakuti vinyeda vijala masu munthu wazeru+ ndipuso vitimbanyizga mazu nga munthu murunji.
20 Urunji, urunji pe ndiwu mulondongi,+ kuti mulutirizgi kuja ndi umoyu kweniso kuti muto charu cho Yehova Chiuta winu watikupaskani.
21 “Mungapandanga chimiti chechosi cha kuti chije polu lakupaturika*+ pafupi ndi guŵa la sembi laku Yehova Chiuta winu lo mwapanga.
22 “Kweniso mungajimikiyanga chipilala chakupaturika cha,+ chinthu cho Yehova Chiuta winu watinkha.
Mazu Ngam'mphata
^ Wonani Fundu Zakukumaliya B15.
^ Mazu ngaki chayingu, “pa zuŵa lo mwayambiya kuŵika chisenga pa mbewu zinu.”
^ Mazu ngaki chayingu, “ŵana ambula awusewu.”
^ Mazu ngaki chayingu, “mumageti.”
^ Wonani Mazu ngo Ngakonkhoskeka.
