Dotoronome 15:1-23
15 “Kukumaliya kwa vyaka 7 vevosi, ŵanthu azifwatulikengi.+
2 Ŵanthu azifwatulikengi mu nthowa iyi: Munthu weyosi wazifwatuwengi munyaki yo we nayu ndi ngongoli. Watenere cha kuzichichizga munthu yo waja nayu pafupi pamwenga mubali waki kuti wawezi ngongoli yaki, pakuti wazamupharazga pa masu paku Yehova kuti munthu yo wafwatulika.+
3 Mulendu ungazimuchichizga kuti wakuweze ngongoli yaku,+ kweni mubali waku uzimufwatuwengi ku ngongoli yeyosi yo wangaŵa nayu kwaku yiwi.
4 Pakati pinu pangazisanirikanga munthu mukavu cha, pakuti Yehova wazakukutumbika+ mucharu cho Yehova Chiuta waku watikupaska kuti chije chaku nge chihara,
5 kweni venivi vazamuchitika pijapija asani wazamuvwiya mwakuphwere mazu ngaku Yehova Chiuta waku ndi kusunga marangu ngosi ngo nditikupaska msanawale.+
6 Pakuti Yehova Chiuta waku wazakukutumbika nge mo wakukulayizgiya ndipu wazamubwerekesanga vinthu* ku mitundu yinandi, kweni yiwi wazamubwerekanga vinthu cha;+ wazamuja ndi mazaza pa mitundu ya ŵanthu, kweni mitundu ya ŵanthu yazamuja ndi mazaza cha paku yiwi.+
7 “Asani yumoza mwa abali ŵaku wakavuka pakati pinu mu yimoza mwa matawuni nga mucharu cho Yehova Chiuta winu watikupaskani, ungazinonopesanga mtima waku cha pamwenga kuja mukaka ku mubali waku mukavu.+
8 Mwemosi mo vinthu vingazijaliya, uzimujuliyengi janja laku ndi mtima wosi+ ndipu uzimubwerekesengi* chechosi cho wakhumba pamwenga cho wasoŵa.
9 Uziphwere kuti mumtima mwaku uzileki kuja ndi maŵanaŵanu ngaheni ngakuti, ‘Chaka cha 7, cho ntchaka chakufwatuliya ŵanthu, chafika,’+ mbwenu utimulereska ŵaka mubali waku kwambula kumupaska chechosi. Asani iyu wazikuliriya kwaku Yehova, yiwi wazamuja ndi ubudi.+
10 Uzimupaskengi ndi mtima wosi,+ ungazimupaskanga mwakwesa kuchichizgika cha, pakuti venivi vazamuchitiska kuti Yehova Chiuta waku watumbiki ntchitu zaku zosi kweniso vosi vo uchita.+
11 Pakuti mucharu cho, mwazamusanirikanga akavu nyengu zosi.+ Ndichu chifukwa chaki nditikulamula kuti, ‘Uzimujuliyengi janja laku ndi mtima wosi munthu yo wasuzgika ndipuso mubali waku yo ndi mukavu mucharu chaku.’+
12 “Asani yumoza mwa abali ŵaku, kwali ndi Mheberi munthulumi pamwenga munthukazi, wagulisika kwaku yiwi ndipu wakuteŵete kwa vyaka 6, mu chaka cha 7 uzimufwatuwengi.+
13 Asani wamufwatuwa, ungazimuwezanga ndi manja ngaŵaka cha.
14 Uzimupaskengi zinyaki mwa mbereri zaku, mbewu zakutuliya pamalu ngaku ngakukhwemiyapu mbewu, mafuta ngakutuliya pamalu ngaku ngakukamiyapu mafuta kweniso vinyu wakutuliya pamalu ngaku ngakukandiyapu mphereska. Uzimupaskengi mwakukoliyana ndi mo Yehova Chiuta waku wakutumbikiya.
15 Ukumbukengi kuti wenga kapolu mucharu cha Ijipiti ndipuso kuti Yehova Chiuta waku wakukuwombo. Ndichu chifukwa chaki msanawale nditikulamula kuti uzichitengi venivi.
16 “Kweni asani kapolu yo watikukambiya kuti, ‘Ndituwengeku cha kwaku yimwi!’ chifukwa chakuti watikuyanja kweniso watanja banja laku, pakuti wajanga nayu umampha,+
17 mbwenu uzilutengi nayu pakhomu ndipu uzitolongi gutu laki ndi chitungu. Iyu wazamuja kapolu waku kwa umoyu waki wosi. Venivi ndivu so uzichitiyengi kapolu waku munthukazi.
18 Ungazisuzgikanga cha kumufwatuwa kuti wakengi, chifukwa wakuteŵete kwa vyaka 6, ndipu malipiru ngaki ngatingi ngayananengi ndi malipiru nga ŵanthu ŵaŵi aganyu kweniso chifukwa chakuti Yehova Chiuta waku wakutumbika pa vosi vo wachita.
19 “Uzitowesengi mwana wakwamba munthulumi wa ng’ombi zaku ndipuso wa mbereri zaku, kuti waje waku Yehova Chiuta waku.+ Mwana wakwamba wa ng’ombi zaku, ungazimugwiriskanga ntchitu yeyosi cha, ndipu mwana wakwamba wa mbereri zaku ungazimumetanga cha weya.
20 Yiwi ndi a munyumba yaku muziryiyengi nyama yaki pa masu paku Yehova Chiuta waku chaka ndi chaka, pamalu ngo Yehova wazamusankha.+
21 Kweni asani nyama yo ye ndi kalema, kwali njakupunduka, njachibulumutiya pamwenga ye ndi chilema chinyaki chechosi, utenere cha kuziyipereka nge sembi kwaku Yehova Chiuta waku.+
22 Uziyiryiyengi mutawuni yinu,* munthu wakufipiskika ndipuso wambula kufipiskika aziryengi, nge mo muryiya mbaŵa pamwenga mphoyu.+
23 Kweni ungaryanga cha ndopa zaki;+ utenere kuzidira pasi nge maji.+
Mazu Ngam'mphata
^ Pamwenga kuti, “wazamubwerekesanga vinthu pa chikoli.”
^ Pamwenga kuti, “uzimubwerekesengi pa chikoli.”
^ Mazu ngaki chayingu, “mugeti linu.”
