Dotoronome 13:1-18
-
Vo atenere kuchita ndi ŵanthu akugaruka (1-18)
13 “Asani pakati pinu pabuka mchimi pamwenga munthu yo wawona vamunthazi kuziya mu malotu, ndipu wakulongoni chisimikizu pamwenga chakuziziswa chakuloske vamunthazi,
2 ndipu chisimikizu pamwenga chakuziziswa cho chafiskika, ndipu iyu wakamba kuti, ‘Tiyeni tilondo achiuta anyaki, achiuta wo mukuŵaziŵapu cha, tiyeni tiŵateŵete,’
3 mungavwiyanga cha mazu nga mchimi yo pamwenga wakulota malotu yo,+ pakuti Yehova Chiuta winu watikuyesani+ kuti wawoni asani mutanja Yehova Chiuta winu ndi mtima winu wosi kweniso umoyu winu wosi.+
4 Mulondongi Yehova Chiuta winu, mumuwopengi, musungengi marangu ngaki, muvwiyengi mazu ngaki; muteŵetiyengi iyu ndipuso mumumeremetiyengi.+
5 Kweni mchimi yo pamwenga wakulota malotu yo watenere kubayika,+ chifukwa chakuti wakukambiyaningi kuti mugarukiyi Yehova Chiuta winu, yo wakukutuzgani mucharu cha Ijipiti ndi kukuwomboni munyumba ya ukapolu. Iyu wakhumbanga kukupatuskani pa nthowa yo Yehova Chiuta winu wakulamulani kuti muyendengepu. Ndipu mutenere kutuzgapu chinthu chiheni pakati pinu.+
6 “Asani mubali waku, mwana munthulumi wa anyoku, pamwenga mwana waku munthulumi, pamwenga mwana waku munthukazi, pamwenga muwolu waku wakwanjiwa, pamwenga mubwezi waku wapamtima, wakunyenga kumphepeti, ndipu wakamba kuti, ‘Tiyeni tikateŵete achiuta anyaki,’+ achiuta wo yiwi pamwenga apapi ŵaku akali mukuŵaziŵapu cha,
7 achiuta a ŵanthu wo akuzunguliya, kwali ŵanthu wo ŵe pafupi ndi yiwi pamwenga ŵe kutali, kwambiya kuchigoti cha charu cho mpaka kuchigoti chinyaki,
8 ungakoliyananga nayu cha pamwenga kumuvwiya,+ ungamuchitiyanga chitima cha pamwenga kumulenge lisungu ndipuso kumuvikiliya;
9 mumalu mwaki, utenere kumubaya kwambula kutondeka.+ Udankhi ndiwi kumuponya ndi mya kuti wafwi, pavuli paki ŵanthu wosi.+
10 Utenere kumuponya ndi mya kuti wafwi+ chifukwa chakuti wakhumbanga kukupatuska kwaku Yehova Chiuta waku yo wakukutuzga mucharu cha Ijipiti, munyumba ya ukapolu.
11 Pavuli paki, Ayisirayeli wosi avwengi ndipu achitengi mantha. Yiwu achitengi so cha chinthu chiheni nge ichi pakati pinu.+
12 “Asani mu yimoza mwa matawuni ngo Yehova Chiuta winu watikupaskani kuti mukajengemu, mwavwa kuti,
13 ‘Pakati pinu pabuka ŵanthu abwekabweka kuti apatuski ŵanthu mumatawuni ngawu, ndipu akamba kuti, “Tiyeni tikateŵete achiuta anyaki,” achiuta wo yimwi mukuŵaziŵapu cha,’
14 mutenere kuyiwona umampha nkhani yo, muyifufuzengi mwakuphwere ndipuso mufumbisisengi;+ ndipu asani mwasimikiza kuti chinthu chaukazuzi ichi chachitika nadi pakati pinu,
15 mutenere kubaya ŵanthu a mutawuni yo ndi lipanga kwambula kutondeka.+ Mubwanganduwengi tawuni yo ndipuso munangengi+ ndi lipanga chinthu chechosi cho che mwenimo, kusazgapu viŵetu.
16 Pavuli paki, vinthu vosi va mutawuni yo, muviwunjikengi pakati pa balaza la tawuni ndipu muwotchengi tawuni yo ndi motu. Vinthu vosi va mutawuni yo, vijengi nge sembi yamphumphu yakuperekeka kwaku Yehova Chiuta winu. Tawuni yo yijengi ndundu ya mahami ngamuyaya. Yingazengekanga so cha.
17 Mungatonga chinthu chechosi cha cho chitenere kunangika,+ kuti ukali wakukole waku Yehova utuwepu paku yimwi, kuti wakuchitiyeni lisungu ndipuso kuti wakuyandaniseni, nge mo wakulapizgiya kwa apapi ŵinu akali.+
18 Pakuti mutenere kuvwiya* Yehova Chiuta winu mwakusunga marangu ngaki ngosi ngo nditikulamulani msanawale. Asani mwachita viyo, ndikuti muchita cho ntchakwenere mu masu mwaku Yehova Chiuta winu.+
Mazu Ngam'mphata
^ Pamwenga kuti, “kuvwiya mazu ngaku.”
