Dotoronome 1:1-46
1 Yanga ndi mazu ngo Mozesi wangukambiya Ayisirayeli wosi muchigaŵa cha Yorodani muchipululu, muvidika,* mwakulereskana ndi Sufi, pakati pa Parani, Tofeli, Labani, Hazeroti ndi Dizahabu.
2 Kutuliya ku Horebu kufika ku Kadeshi-baniya,+ pe mtunda wakwenda mazuŵa 11 kuziya nthowa ya ku Phiri la Seiri.
3 Mu chaka cha 40,+ mu mwezi wa 11, pa zuŵa lakwamba la mwezi wo, Mozesi wangulongoro ndi Ayisirayeli* mwakukoliyana ndi vosi vo Yehova wangumulamula kuti waŵakambiyi.
4 Venivi vinguchitika wati wathereska Sihoni,+ fumu ya Aamori, yo wajanga ku Heshiboni, ndipuso Ogi,+ fumu ya ku Bashani, yo wajanga ku Ashitaroti, ku Edireyi.+
5 Muchigaŵa cha Yorodani mucharu cha Mowabu, Mozesi wangwamba kukonkhoska Dangu lenili,+ ndipu wanguti:
6 “Pa nyengu yo tajanga ku Horebu, Yehova Chiuta widu wangutikambiya kuti, ‘Mwajaliska muchigaŵa chamapiri ichi.+
7 Sokani, lutani kuchigaŵa chamapiri cha Aamori+ ndipu lazgiyani kuvigaŵa vo ve pafupi ndi yiwu, chigaŵa cha Araba,+ chigaŵa chamapiri, Shefela, Negebu ndipuso mumphepeti mwa nyanja,+ mucharu cha Akanani kweniso Lebanoni,*+ mpaka kumsinji ukulu, msinji wa Yufureti.+
8 Awonani, ndakupaskani charu ichi. Sereni mucharu cho ndipu mukachito kuti chije chinu. Charu cho Yehova wangulapizga kwa awusemwi, kwaku Abrahamu, Isaki+ ndi Yakobe,+ kuti wachiperekengi kwaku yiwu ndi ku mphapu* yawu.’+
9 “Pa nyengu yeniyo, ndingukukambiyani kuti, ‘Ndingafiska cha kukunyamuwani ndija.+
10 Yehova Chiuta winu wachitiska kuti muyandani, ndipu sonu mwe anandi ukongwa nge nyenyezi zakuchanya.+
11 Yehova, Chiuta wa apapi ŵinu, wakuyandaniseni+ maulendu 1,000 kuluska mo muliri sonu, ndipuso wakutumbikeni nge mo wakukulayizgiyani.+
12 Kumbi ndingafiska wuli kukunyamuwani pakuti ndimwi mphingu ndipuso katundu muzitu, ndipu ndingachita wuli ndi mphindanu zinu?+
13 Sankhani anthulumi azeru, akuwamu ndipuso akuziŵa vinthu kutuliya mu mafuku nginu ndipu ndiŵaŵikengi kuti aje alongozgi ŵinu.’+
14 Yimwi mungundimuka kuti, ‘Vo mwatikambiya vamampha.’
15 Mwaviyo, ndinguto alongozgi a mafuku nginu, anthulumi azeru kweniso akuziŵa vinthu, ndipu ndinguŵaŵika kuti aje alongozgi ŵinu. Ndinguŵaŵika kuti aje alongozgi a magulu nga ŵanthu 1,000, alongozgi a magulu nga ŵanthu 100, alongozgi a magulu nga ŵanthu 50, alongozgi a magulu nga ŵanthu 10 ndipuso ŵara a mafuku nginu.+
16 “Pa nyengu yeniyo, ndingukambiya akweruzga ŵinu kuti, ‘Asani muyeruzga milandu ya pakati pa abali ŵinu, muyeruzgengi mwaurunji+ pakati pa munthu ndi mubali waki pamwenga mulendu yo waja pakati pinu.+
17 Mungayanjiyanga cha pakuyeruzga.+ Kwali munthu yo ngwakuzirwa pamwenga ngwambula kuzirwa, muyeruzgengi mwakuyanana.+ Mungawopanga ŵanthu cha+ pakuti cheruzgu ntchaku Chiuta.+ Ndipu asani mulandu wo ngwakusuzga ukongwa kwaku yimwi, muzengi nawu kwaku ini kuti ndiyeruzgi.’+
18 Pa nyengu yeniyo, ndingukukambiyani vosi vo mutenere kuchita.
19 “Pavuli paki, tingutuwaku ku Horebu ndipu tingwenda muchipululu chikulu kweniso chakofya+ cho munguwona munthowa pakuluta kuchigaŵa chamapiri cha Aamori,+ nge mo Yehova Chiuta widu wangutilamuliya, ndipu pakumaliya tingufika ku Kadeshi-baniya.+
20 Sonu ndingukukambiyani kuti, ‘Mwafika muchigaŵa chamapiri cha Aamori cho Yehova Chiuta widu watitipaska.
21 Awonani, Yehova Chiuta winu wakupaskani charu ichi. Lutani, mukachito kuti chije chinu, nge mo Yehova Chiuta wa apapi ŵinu wakukambiyani.+ Mungawopanga cha pamwenga kuchita mantha.’
22 “Kweni mosi munguza kwaku ini ndipu mungundikambiya kuti, ‘Tiyeni titumi anthulumi kuti akafufuzi charu cho ndi kuzitikambiya nthowa yakuti tiyendi ndipuso mo matawuni nga kweniko ngaliri.’+
23 Ndinguwona kuti sachizgu linu lenga lamampha. Mwaviyo, ndingusankha anthulumi 12 pakati pinu, munthulumi yumoza pa fuku lelosi.+
24 Anthulumi wo, anguluta kuchigaŵa chamapiri+ ndipu angufika ku Dambu* la Eshikolo ndi kufufuza charu cho.
25 Yiwu angutoku vinyaki mwa vipasu va mucharu cho, ndipu anguza navu kwaku isi. Yiwu angutikambiya kuti, ‘Charu cho Yehova Chiuta widu wakhumba kutipaska ntchamampha.’+
26 Kweni mungukana kuluta ndipu mungugarukiya dangu laku Yehova Chiuta winu.+
27 Mwadinginyikanga mumahema nginu ndipu mwakambanga kuti, ‘Ntchifukwa chakuti Yehova wangutitinkha lekani wakutituzga mucharu cha Ijipiti kuti watipereki mu manja mwa Aamori kuti watimali.
28 Ntcharu cha mtundu wuli cho tilutaku? Abali ŵidu anguchitiska kuti mitima yidu yisongonoki*+ ndipu angukamba kuti, “Ŵanthu akweniko mbakuluakulu kweniso mbatali kuluska isi, ndipu matawuni ngawu ngakulu kweniso nga mipanda yakukho ndipuso yitali mpaka kufika kuchanya,*+ kweniso tinguwona Aanaki+ kweniko.”’
29 “Mwaviyo, ndingukukambiyani kuti, ‘Mungawopanga cha pamwenga kuchita mantha chifukwa chaku yiwu.+
30 Yehova Chiuta winu wakulongozgeningi ndipu wakuchitiyeningi* nkhondu+ nge mo wanguchitiya ku Ijipiti yimwi muchiwona.+
31 Ndipu muchipululu, munguwona mo Yehova Chiuta winu wangukunyamuliyani kwekosi ko mwalutanga mpaka po mwafikiya pamalu nganu. Iyu wangukunyamuwani nge mo ada anyamuliya mwana wawu.’
32 Chinanga kuti wangukuchitiyani vosi ivi, kweni munguvwana cha mwaku Yehova Chiuta winu,+
33 yo wakulongozganingi munthowa kuti wakufufuziyeni malu ngakuti mujinthepu mahema. Iyu wakuwonekiyaningi muchipilala cha motu ndi usiku kweniso muchipilala cha mtambu ndi msana, kuti wakulongoni nthowa yakuti muyendemu.+
34 “Pa nyengu yosi yeniyi, Yehova wavwanga vo yimwi mwakambanga ndipu wangukwiya ndi kulapizga+ kuti,
35 ‘Palivi chinanga njumoza wa ŵanthu a mugonezi uheni uwu, yo wazamuwona charu chamampha cho ndikulapizga kwa awusemwi,+
36 kupatuwaku Kalebe mwana waku Yefune. Iyu wakuchiwona ndipu charu cho wangwendamu ndichiperekengi kwaku iyu ndipuso ku ŵana ŵaki, chifukwa chakuti walondo Yehova ndi mtima waki wosi.+
37 (Yehova wangundikwiyiya chifukwa chaku yimwi, ndipu wangukamba kuti, “Yiwi nawi userengi cha mucharu cho.+
38 Yoswa mwana waku Nuni, yo watikuteŵete,+ ndiyu wamusere mucharu cho.+ Umukhwimisi,*+ pakuti iyu ndiyu walongozgengi Ayisirayeli kuti akahari charu cho.”)
39 Kweniso ŵana ŵinu wo mungukamba kuti arwani ŵinu akukuphangani+ ndipuso ŵana ŵinu wo sonu aziŵa cha chamampha pamwenga chiheni, ŵenaŵa ndiwu amusere. Ndiŵapaskengi charu chenichi kuti chije chawu.+
40 Kweni yimwi weleriyani, ndipu seleriyani kuchipululu kuziya nthowa ya ku Nyanja Yiyera.’+
41 “Mwati mwavwa venivi mungundikambiya kuti, ‘Tabudiya Yehova. Sonu tilutengi kuti tikachiti nkhondu nge mo Yehova Chiuta widu watilamuliya!’ Mwaviyo, weyosi waku yimwi wangunyamuwa vidya vaki vankhondu ndipu mwaŵanaŵananga kuti chiŵengi chipusu kukwera phiri.+
42 Kweni Yehova wangundikambiya kuti, ‘Uŵakambiyi kuti: “Mungakweranga cha muphiri kuti mukachiti nkhondu chifukwa ndiŵengi namwi cha.+ Asani mulutengi arwani ŵinu akukuthereskani.”’
43 Mwaviyo, ndingukukambiyani kweni mungundivwiya cha. Mumalu mwaki, mungugarukiya dangu laku Yehova ndipu chifukwa cha kujikuzga mungwamba kukwera phiri.
44 Pavuli paki, Aamori wo ajanga muphiri lo angutuwa kuti akumani namwi ndipu angukutchimbizani nge mo njuchi zichitiya. Yiwu angukumbininiskiyani ku Seiri mpaka ku Horima.
45 Mwaviyo, munguweku ndipu mungwamba kuliriya Yehova, kweni Yehova wanguvwa cha kuliya kwinu pamwenga kukutoliyaniku kanthu.
46 Ndichu chifukwa chaki munguja nyengu yitali ku Kadeshi.
Mazu Ngam'mphata
^ Mazu ngaki chayingu, “muvidika vachipalamba.”
^ Mazu ngaki chayingu, “ŵana aku Isirayeli.”
^ Viwoneka kuti akamba mapiri nga ku Lebanoni.
^ Mazu ngaki chayingu, “mbewu.”
^ Ili ndi dambu lo lija ndi maji mu nyengu ya vuwa pe.
^ Pamwenga kuti, “kuti tichiti mantha.”
^ Kung’anamuwa mipanda yakuthopoka.
^ Pamwenga kuti, “wakurwiyeningi.”
^ Yapa pangafwatulikiya so kuti, “Chiuta wamukhwimisa.”
