Kalata Yakuluta kwa Aroma 9:1-33
9 Ndikamba uneneska mwaku Khristu; ndipusika cha, nge mo njuŵi yangu yitindichitiya ukaboni mwakukoliyana ndi mzimu wakupaturika,
2 kuti nde ndi chitima chikulu ndipuso urwirwi wambula kumala mumtima.
3 Pakuti ndingayanja kuti ndituzgikeku kwaku Khristu nge munthu wakutembeka chifukwa cha abali ŵangu, ŵeniwo mbanthu amtundu wangu,
4 Ayisirayeli. Chiuta wanguŵasankha kuti aje ŵana ŵaki+ ndipu wanguŵapaska unkhankhu, mapanganu,+ Dangu,*+ uteŵeti wakupaturika+ kweniso malayizgu.+
5 Yiwu akutuwa mwa apapi ŵidu akali,+ ndipu Khristu nayu so wakutuwa mwaku yiwu pa nyengu yo wenga munthu.+ Wathamikiki mpaka muyaya Chiuta mweniyo ngwapachanya kuluska vosi. Ame.
6 Kweni ivi ving’anamuwa ku ti mazu ngaku Chiuta ngawa paŵaka cha. Chifukwa ndi wosi cha wo atuliya mwaku Isirayeli wo “Mbayisirayeli” nadi.+
7 Ndipuso ndi wosi cha ŵeniwo mbana aku Chiuta chifukwa chakuti ndi mphapu* yaku Abrahamu,+ kweni kukulembeka kuti: “Yo yazamudanika kuti mphapu* yaku yazamutuliya mwaku Isaki.”+
8 Ivi ving’anamuwa kuti ŵana akuliŵavu mbana aku Chiuta chayiwu cha,+ kweni ŵana a layizgu+ ndiwu watiŵakamba kuti mphapu.*
9 Pakuti mazu nga layizgu ngenga ngakuti: “Ndazamukuza pa nyengu nge yeniyi ndipu Sara wazamukuŵa ndi mwana munthulumi.”+
10 Mphanyengu yeniyi pe cha, kweni pa nyengu so yo Rabeka wanguja ndi nthumbu ya ŵana amuwoli, kutuliya kwaku Isaki, mpapi widu wakali;+
11 pakuti ŵechendaweku ndipuso ŵechendachitepu chinthu chechosi, chamampha pamwenga chiheni, kuti khumbu laku Chiuta lakusankha lilutiriyi kwambula kuthemba ntchitu, kweni kuthemba Yo wadana,
12 iyu wangukambiya Rabeka kuti: “Mura wazamukuŵa kapolu wa mumana.”+
13 Ivi viyanana ndi vo vikulembeka kuti: “Ndingwanja Yakobe, kweni Esawu ndingumutinkha.”+
14 Sonu tingakambanji? Kumbi Chiuta ngwambula urunji? Awa!+
15 Chifukwa iyu wangukambiya Mozesi kuti: “Yo ndakhumba kumulongo lisungu ndimulongongi lisungu ndipu yo ndakhumba kumuchitiya chitima ndimuchitiyengi chitima.”+
16 Mwaviyo, vithemba kukhumba kwa munthu cha pamwenga phamphu laki,* kweni Chiuta mweniyo we ndi lisungu.+
17 Pakuti lemba lingukambiya Farawo kuti: “Ndakuleka wamoyu pa chifukwa ichi: kuti ndilongo nthazi zangu chifukwa chaku yiwi ndipuso kuti zina langu lipharazgiki pacharu chosi chapasi.”+
18 Mwaviyo, iyu wachitiya lisungu munthu weyosi yo wakhumba, kweni wazomereza munthu weyosi yo wakhumba kuti wanonopi mtima.+
19 Yiwi ungandifumba kuti: “Ntchifukwa wuli iyu weche kusaniriya vifukwa ŵanthu? Pakuti ndiyani wangasuskana ndi khumbu laki?”
20 Kweni wamunthu yiwi, ndiwi yani kuti umukengi Chiuta?+ Kumbi chinthu chakuwumbika chingakambiya wakuwumba kuti: “Ntchifukwa wuli ukundiwumba viyo?”+
21 Kumbi asi wakuwumba ndiyu we ndi wanangwa wakuwumba chiyaŵi chakuzirwa ndi chambula kuzirwa kutuliya ku bulunga limoza la dongu?+
22 Sonu wuli asani Chiuta wangulekere mwakuzikira viyaŵi va ukali vo vitenere kunangika, chinanga kuti wangakhumba kulongo ukali waki ndi nthazi zaki?
23 Ndipu asani wanguchita venivi kuti walongo chuma cha unkhankhu waki pa viyaŵi va lisungu+ vo wakuvinozge limu kuti vije vaunkhankhu,
24 kung’anamuwa isi wakutidana mu mtundu wa Ayuda pe cha, kweni mu mitundu yakupambanapambana,+ vingaŵa wuli?
25 Ve nge mo iyu wangukambiya kuporote mwaku Hoseya kuti: “Ŵanthu wo ŵenga ŵangu cha,+ ndazakuŵadana kuti ‘ŵanthu ŵangu,’ ndipu munthukazi yo wayanjikanga cha ndazakumudana kuti, ‘wakwanjiwa’;+
26 ndipu pamalu ngo ndinguŵakambiya kuti, ‘Ndimwi ŵanthu ŵangu cha,’ penipo ndipu ndazakuŵadana kuti, ‘ndimwi ŵana aku Chiuta wamoyu.’”+
27 Kweniso Yesaya wadaniriza vakukwaskana ndi Ayisirayeli kuti: “Chinanga kuti ŵana aku Isirayeli angaŵa anandi nge mchenga wa kunyanja, kweni mbakujaku pe wo azamutaskika.+
28 Pakuti Yehova* wazakuchimba mulandu charu, wazakuchiyeruzga ndipu wazamuswera cha.”*+
29 Nge mo Yesaya wangukambiya so limu kuti: “Yehova* wa mizinda wakalekengi kusiyaku mphapu,* mphanyi taja nge Sodomu, ndipuso mphanyi tayanana ndi Gomora.”+
30 Sonu tingakambanji? Tingakamba kuti ŵanthu amitundu yinyaki chinanga kuti alondo urunji cha, kweni akusaniya urunji,+ wo usanirika chifukwa cha chivwanu.+
31 Kweni Ayisirayeli chinanga kuti alondonga dangu laurunji, akulisaniya cha dangu lo.
32 Chifukwa wuli? Chifukwa chakuti angulilondo ndi chivwanu cha, kweni ndi ntchitu. Anguguŵa pa “mwa wakuguŵiska”;+
33 nge mo vikulembeke kuti: “Awonani ndiŵika mwa+ wakuguŵiska mu Ziyoni ndipuso jalawi lakuwisa, kweni munthu yo chivwanu chaki che pajalawi lo, wazamuguŵa cha.”+
Mazu Ngam'mphata
^ Wonani Mazu ngo Ngakonkhoskeka.
^ Mazu ngaki chayingu, “mbewu.”
^ Mazu ngaki chayingu, “mbewu.”
^ Mazu ngaki chayingu, “mbewu.”
^ Mazu ngaki chayingu, “vithemba munthu yo wakhumba cha pamwenga munthu yo watchimbiya.”
^ Wonani Fundu Zakukumaliya A5.
^ Mazu ngaki chayingu, “wazakuchimaliza ndipu wazakuchifupikisa.”
^ Wonani Fundu Zakukumaliya A5.
^ Mazu ngaki chayingu, “mbewu.”
