Kalata Yakuluta kwa Aroma 16:1-27
16 Nditikuziŵisani va mzichi widu Febi, mweniyo wateŵete mu mpingu wo we ku Kenkereya.+
2 Ndachitiya kuti mumulondere mwa Ambuya nge mo muchitiya ndi akupaturika ndipuso mumupaski chovyu chechosi cho wangakhumbika,+ pakuti nayu so pakuyija wayesesa kuvikiliya abali anandi kusazgapu ini.
3 Mundipereke moni kwaku Purisika ndi Akula,+ antchitu anyangu mwaku Khristu Yesu.
4 Yiwu anguŵika umoyu wawu pa ngozi* chifukwa chaku ini,+ kweniso ŵeniwo ini limoza ndi mipingu yosi ya ŵanthu amitundu yinyaki titiŵawonga.
5 Tawuzgani so mpingu wo uwu ngana munyumba mwawu.+ Tawuzgani wakwanjiwa wangu Epineto, mweniyo ntchipasu chakwamba chaku Khristu mu Asia.
6 Tawuzgani Mariya yo wakugwiriyani ntchitu mwaphamphu.
7 Tawuzgani Anduroniko ndi Yuniya wo mbabali ŵangu+ ndipuso akayidi anyangu. Yiwu mbanthulumi akuziŵika umampha kwa akutumika kweniso aja akukoliyana ndi Khristu kwa nyengu yitali kuluska ini.
8 Mundipereke moni kwaku Ampuliyatu, wakwanjiwa wangu mwa Ambuya.
9 Tawuzgani Uribano wantchitu munyidu mwaku Khristu kweniso wakwanjiwa wangu Sitaku.
10 Tawuzgani Apele, wakwanjiwa mwaku Khristu. Tawuzgani a munyumba yaku Arisitobulo.
11 Tawuzgani mubali wangu Herodiyoni. Tawuzgani a munyumba yaku Narikiso ŵeniwo ŵe mwa Ambuya.
12 Tawuzgani Turufena ndi Turufosa, anthukazi wo agwira ntchitu mwaphamphu mwa Ambuya. Tawuzgani Pesisi, wakwanjiwa widu pakuti ndi munthukazi yo wagwira ntchitu mwaphamphu mwa Ambuya.
13 Tawuzgani Rufu, wakusankhika mwa Ambuya. Mutawuzgi so anyina ŵeniwo nani so mbama.
14 Tawuzgani Asunkirito, Filego, Heme, Paturoba, Hemasi kweniso abali wo ŵe nawu.
15 Tawuzgani Filologo, Juliya, Nereya ndi mzichi* waki kweniso Olumpa limoza ndi akupaturika wosi wo ŵe nawu.
16 Tawuzganani ndi kufyofyonthana mwakupaturika. Mipingu yosi yaku Khristu yitikutawuzgani.
17 Sonu abali nditikupemphani kuti muphwere ukongwa ndi ŵanthu wo achitiska kuti ŵanthu agawukani kweniso wo aŵika vakuguŵiska, chifukwa venivi visuskana ndi vo mukusambira. Mwaviyo muŵakhwechengi.+
18 Pakuti ŵanthu aviyo mbakapolu ŵa Ambuyafwi Khristu cha, kweni mbakapolu a makhumbiru* ngawu. Ndipu chifukwa cha kulongoro kwawu mwakukopa ndipuso mwauryarya, anyenga mitima ya ŵanthu ambula kalema.
19 Ŵanthu wosi aziŵa kuti mwe akuvwiya ndipu mutindikondwesa ukongwa chifukwa cha venivi. Ndikhumba kuti muje azeru pa vinthu vamampha, kweni muje abulu pa vinthu viheni.+
20 Ndipu Chiuta yo wapereka chimangu wazamuphwanya Satana+ kusi kwa maphazi nginu pambula kuswera yapa. Wezi ukulu wa Ambuyafwi Yesu, uŵi namwi.
21 Timote wantchitu munyangu watikutawuzgani. Lusiyasi, Yasoni ndipuso Sosipatara wo mbabali ŵangu,+ nawu atikutawuzgani.
22 Ini Teritiyo yo walemba kalata yeniyi, nditikutawuzgani mwa Ambuya.
23 Gayo+ mweniyo wandilondere kuja mulendu waki kweniso yo walondere mpingu wosi, watikutawuzgani. Erasito yo wasunga* chuma cha tawuni, watikutawuzgani. Mubali waki Kwarito, nayu watikutawuzgani.
24 * ——
25 Sonu kwaku Chiuta mweniyo wangakuwovyani kuti muje akukho mwakukoliyana ndi uthenga wamampha kweniso upharazgi wakukamba vakukwaskana ndi Yesu Khristu, ndipuso mwakukoliyana ndi kuvumbulika kwa chisisi chakupaturika+ cho chabisika kwa nyengu yitali ukongwa,
26 cho sonu chawoneke* ndipu chaziŵika kuporote mu Malemba nga uchimi mu mitundu yosi ya ŵanthu, mwakukoliyana ndi dangu laku Chiuta wamuyaya, kuti ŵanthu aje akuvwiya chifukwa cha chivwanu;
27 kwaku Chiuta yija yo ngwazeru,+ kuŵi unkhankhu kwamuyaya kuporote mwaku Yesu Khristu. Ame.
Mazu Ngam'mphata
^ Mazu ngaki chayingu, “anguŵika makhosi ngawu pa ngozi.”
^ Mzichi yo wakambika yapa ndi munthukazi.
^ Pamwenga kuti, “malufu.”
^ Pamwenga kuti, “yo wawonere.”
^ Wonani Fundu Zakukumaliya A3.
^ Pamwenga kuti, “chavumbulika.”
