Kalata Yakuluta kwa Aroma 15:1-33
15 Kweni isi anthazi, titenere kunyamuwa masuzgu nga ŵanthu wo alivi nthazi,+ ndipuso tingajikondwesanga tija cha.+
2 Weyosi waku isi wakondwesi munyaki mwakumuchitiya vamampha kuti wamuchiski.+
3 Pakuti chinanga ndi Khristu nayu wangujikondwesa yija cha,+ kweni wanguchita nge mo vikulembeke kuti: “Mazu ngakunyoza nga ŵanthu wo atikunyozani ngawiya ini.”+
4 Pakuti vinthu vo vikulembeka kali, vikulembeke kuti vitisambizi,+ ndi chilatu chakuti tije ndi chilindizga+ chifukwa cha kukunthiyapu+ ndipuso kupembuzgika ndi Malemba.
5 Chiuta yo watitiwovya kuti tikunthiyengepu kweniso yo watitipembuzga, wakupaskeni maŵanaŵanu ngakuyanana ndi ngo Khristu Yesu wenga nangu,
6 kuti mwakukoliyana+ kweniso ndi mazu ngamoza,* mukankhuski Chiuta, Wusewu wa Ambuyafwi Yesu Khristu.
7 Mwaviyo londiyanani+ nge mo Khristu nayu wakulonde yimwi,+ kuti unkhankhu uluti kwaku Chiuta.
8 Chifukwa nditikukambiyani kuti Khristu wanguja mteŵeti wa ŵanthu akudumulika+ pakuti Chiuta ndi muneneska. Iyu wanguchita ivi kuti wasimikizi vo Chiuta wangulayizga apapi ŵawu akali,+
9 ndipuso kuti mitundu yinyaki yikankhuski Chiuta chifukwa cha lisungu laki.+ Nge mo vikulembeke kuti: “Ndichu chifukwa chaki ndikuzomereningi pakweru pakati pa mitundu, ndipu ndimbengi sumu zakuthamika zina linu.”+
10 Ndipu wangukamba so kuti: “Kondwani yimwi mitundu limoza ndi ŵanthu ŵaki.”+
11 Ndipuso kuti: “Thamikani Yehova* yimwi mitundu yosi, ndipu ŵanthu wosi amuthamiki.”+
12 Ndipuso Yesaya wangukamba kuti: “Pazamukuŵa msisi waku Jese,+ munthu yo wazamuyuka kuti walamuliyi mitundu+ ndipu mitundu yo yazakumulindizga.”+
13 Chiuta yo wapereka chilindizga, wakuzazeni ndi likondwa likulu kweniso chimangu chifukwa chakuti mutimuthemba, ndi chilatu chakuti muzaziki ndi chilindizga kuziya mu nthazi ya mzimu wakupaturika.+
14 Sonu, ini ndisimikiza kuti yimwi abali ŵangu muchita vinthu vinandi vamampha, muziŵa vinthu vinandi ndipuso kuti mulunguchizgana.*
15 Kweni ndakulembiyani fundu zinyaki mwambula kubisa, kuti ndikukumbuseni so chifukwa cha wezi ukulu wo ndikupaskika ndi Chiuta
16 kuti ndije mteŵeti waku Khristu Yesu ku mitundu.+ Ndigwira ntchitu yakupaturika ya uthenga wamampha waku Chiuta,+ kuti mitundu yeniyi yije chakupereka chakuzomerezeka kweniso chakutoweseka ndi mzimu wakupaturika.
17 Mwaviyo, nde ndi chifukwa chakukondwe mwaku Khristu Yesu chifukwa cha vinthu vakukwaskana ndi Chiuta.
18 Pakuti ndingayese dala cha kukamba kanthu kekosi kupatuwaku vinthu vija vo Khristu wachita kuporote mwaku ini, kuti mitundu yije yakuvwiya kuziya mu mazu ngangu ndipuso mu vakuchita vangu,
19 mu nthazi ya visimikizu ndi vakuziziswa,+ kweniso mu nthazi ya mzimu waku Chiuta. Ndipu ivi vachitiska kuti ndipharazgi mwakukwana uthenga wamampha wakukwaskana ndi Khristu kutuliya ku Yerusalemu ndi kuzunguliya mpaka kuchifika ku Iluriko.+
20 Mwaviyo, ndingusimikiza kuti ndileki kupharazga uthenga wamampha muvigaŵa vo zina laku Khristu laziŵikanga kali, kuti ndileki kuzenga pafawundeshoni ya munthu munyaki.
21 Kweni ndinguchita mwakukoliyana ndi mo vikulembeke kuti: “Wo ŵechendalondiyepu chipharazgu chakukwaskana ndi iyu, azamuwona ndipu wo akuvwapu cha, azamuvwisa.”+
22 Chenichi so ndichu chifukwa chaki nyengu zinandi ndatondekanga kuza kwaku yimwi.
23 Kweni sonu palivi malu ngo ndaleka kukwaskaku muvigaŵa ivi, ndipu kwa vyaka vinandi* ndaja ndichikhumbisiska kuza kwaku yimwi.
24 Mwaviyo, ndikhumba kuti ndizikuwoneni ndichiluta ku Sipeni, ndipu asani ndazichezapu namwi kwa kanyengu, mwazakundiperekeza panthowa.
25 Kweni sonu nde pafupi kuluta ku Yerusalemu kuti nkhateŵete akupaturika.+
26 Pakuti abali a ku Makedoniya ndi ku Akaya angukhumbisiska kupereka vinthu vawu kwa akupaturika wo mbakavu ku Yerusalemu.+
27 Angukhumbisiska nadi kuŵachitiya viyo ndipu kukamba uneneska ŵenga ndi ngongoli kwa akupaturika; chifukwa asani ŵanthu amitundu yinyaki alondiyaku vinthu vauzimu kwa akupaturika, ndikuti yiwu nawu akhumbika kuweza mwakuŵateŵete ndi vinthu vo ŵe navu.+
28 Asani ndamaliza kuchita venivi ndipuso asani ndachiŵapaska mphasu zenizi,* ndazamupitiya kwinu ndichiluta ku Sipeni.
29 Kweniso ndiziŵa kuti po ndiziyengi kwaku yimwi, ndizengi ndi vitumbiku vosi vakutuliya kwaku Khristu.
30 Sonu nditikuŵeyeriyani abali kuporote mwaku Yesu Khristu Ambuyafwi, kweniso kuporote mu chanju cha mzimu kuti mufwiyepu kundipemphere kwaku Chiuta nge mo ndichitiya ndamweni,+
31 kuti nditaskiki+ ku ŵanthu ambula kugomezga a ku Yudeya ndipuso kuti uteŵeti wangu wo ndichita mumalu mwa akupaturika a ku Yerusalemu, uzomerezeki kwaku yiwu,+
32 kuti mwa khumbu laku Chiuta ndizizi kwaku yimwi mwalikondwa kweniso kuti tosi tizisisipuliki.
33 Chiuta yo wapereka chimangu waŵi namwi mosi.+ Ame.
Mazu Ngam'mphata
^ Mazu ngaki chayingu, “ndi mulomu umoza.”
^ Wonani Fundu Zakukumaliya A5.
^ Pamwenga kuti, “mutcheŵeskana.”
^ Yapa pangafwatulikiya so kuti, “kwa vyaka vinandiku.”
^ Mazu ngaki chayingu, “chipasu chenichi.”
