Kalata Yakuluta kwa Aroma 11:1-36
11 Sonu ndifumbi, Kumbi Chiuta wakuŵakana ŵa nthu ŵaki?+ Awa! Pakuti ini nani nde Myisirayeli, wa mu mphapu* yaku Abrahamu, wakutuliya mu fuku laku Benjamini.
2 Chiuta wakuŵakana cha ŵanthu ŵaki wo wangudankha kuŵaziŵa.+ Kumbi muziŵa cha vo lemba likamba vakukwaskana ndi Eliya, po waŵeyeriyanga Chiuta mwakususkana ndi Ayisirayeli?
3 Iyu wangukamba kuti: “Yehova,* abaya achimi ŵinu, agumuwa maguŵa nginu nga sembi ndipu ndajapu ini pe, ndipu sonu apenja kuti andibayi.”+
4 Kweni kumbi Chiuta wangumukambiyanji? Wangumukambiya kuti: “Ndajisungiya anthulumi 7,000 wo makongonu ngawu ngechendajikamiyepu Bala.”+
5 Mwakuyanana ŵaka, pasonu panu napu, pe akujaku+ wo akusankhika chifukwa cha wezi ukulu.
6 Sonu asani akusankhika chifukwa cha wezi ukulu,+ mbwenu ntchifukwa cha ntchitu cha,+ asani vingaŵa viyo, ndikuti wezi ukulu ungaŵa so wezi ukulu cha.
7 Sonu tikambenji? Chinthu cho Ayisirayeli atichipenja ndi mtima wosi, achisaniya cha, kweni akusankhika akuchisaniya.+ Anyaki wosi maŵanaŵanu ngawu ngangubulumutizgika,+
8 nge mo kukulembeke kuti: “Chiuta waŵapaska mzimu wa tulu tikulu,+ masu ngambula kuwona ndi makutu ngambula kuvwa mpaka kufika msanawale.”+
9 Ndipuso Davidi wangukamba kuti: “Thebulu lawu lisambuki chisali, chiŵana, chinthu chakuguŵiska kweniso chibalu kwaku yiwu.
10 Masu ngawu ngachiti mdima kuti aleki kuwona ndipu mukotamisi misana yawu nyengu zosi.”+
11 Sonu ndifumbi, Kumbi anguguŵa mpaka kuwiya limu? Awa! Kweni chifukwa chakuti yiwu avwiya cha dangu, ŵa nthu amitundu yinyaki ataskika, kuti yiwu achiti sanji.+
12 Sonu asani kuleka kuvwiya kwawu kuchitiska kuti charu chikhupuki ndipuso kusika kwa chiŵerengeru chawu kuchitiska kuti ŵanthu amitundu yinyaki akhupuki,+ nanga kwe wuli po chiŵerengeru chawu chiŵiyengi chakukwana!
13 Sonu ndikamba ndi yimwi mwaŵanthu amitundu yinyaki. Chifukwa chakuti nde wakutumika ku ŵanthu amitundu yinyaki,+ ndikankhuska* uteŵeti wangu,+
14 kuti ndiwoni kuti panyaki mu nthowa yinyaki ndingachitiska sanji ŵanthu amtundu wangu* ndi kutaskapu anyaki pakati pawu.
15 Asani charu chayanjanisika ndi Chiuta chifukwa chakuti yiwu waŵataya,+ mbwenu kulondereka kwawu mbumoyu kutuliya ku nyifwa.
16 Kweni asani chigaŵa cha bulunga la fulawu wakukasa cho chatoleka kuja nge vipasu vakwamba ntchakupaturika, mbwenu bulunga losi ndakupaturika ndipu asani msisi ngwakupaturika, ndikuti mphanda zosi zakupaturika.
17 Kweni asani mphanda zinyaki zikudumulika kuti zituweku kuchimiti cha maolivi, ndipu yiwi chinanga kuti ndiwi chimiti cha maolivi chamudondu, ukubatikika pamphanda zakujaku, ndipu usangana nazu nyata yakutuliya kumisisi ya vimiti va maolivi,
18 ungamalikiyanga mphanda zo cha. Asani utizimalikiya,+ kumbuka kuti ndiwi cha upinga misisi, kweni misisi ndiyu yipinga yiwi.
19 Sonu ukambengi kuti: “Mphanda zikudumulikaku kuti ini ndibatikikeku.”+
20 Mbuneneska nadi! Pakuti yiwu akudumulikaku chifukwa cha kuŵavi chivwanu,+ kweni yiwi utuma chifukwa cha chivwanu.+ Ungajikuzganga cha, kweni ja ndi mantha.
21 Pakuti asani Chiuta wanguzilekere cha mphanda zachilengedu, yiwi nawi, wazakukulekere cha.
22 Mwaviyo, ŵanaŵaniya wezi waku Chiuta+ kweniso chilangu chaki. Ŵanthu wo ŵawa alonde chilangu,+ kweni yiwi walonde wezi waku Chiuta, ndipu lutirizga kuja mu wezi waki. Chifukwa asani waleka kuchita viyo, nawi wazamudumulika.
23 Ndipuso yiwu nawu asani angaja so ndi chivwanu, azamubatikikaku,+ chifukwa Chiuta wangaŵabatika so.
24 Pakuti asani yiwi ungudumulika kuchimiti cha maolivi chamudondu ndipu mwakupambana ndi chilengedu ungubatikika kuchimiti chakupanda cha maolivi, ndikuti mphanda zaki chayizu zo zingudumulikaku nazu zazamusuzga cha kubatikika so kuvimiti vaki va maolivi!
25 Pakuti ndikhumba cha abali kuti muje ambula kuziŵa chisisi chakupaturika ichi,+ kuti muleki kujiwona kuti mwe azeru: Ayisirayeli anyaki abulumutizgika mpaka po chiŵerengeru cha ŵanthu amitundu yinyaki chakwaniya,
26 ndipu mu nthowa yeniyi Ayisirayeli wosi+ azamutaskika. Nge mo kukulembeke kuti: “Mtaski wazamutuliya mu Ziyoni+ ndipu ntchitu ziheni zazamutuzgikaku kwaku Yakobe.
27 Ndipu lenili ndi phanganu langu ndi yiwu,+ po ndazamutuzgiyapu maubudi ngawu.”+
28 Kukamba uneneska, pa nkhani ya uthenga wamampha, yiwu mbarwani aku Chiuta chifukwa chaku yimwi; kweni pa nkhani ya kusankha kwaku Chiuta, mbakwanjiwa aku Chiuta chifukwa cha apapi ŵawu akali.+
29 Pakuti Chiuta wazamudandawula cha chifukwa cha mphasu zaki kweniso chifukwa chakuti wakuŵadana.
30 Pakuti nge mo yimwi mwenge ambula kuvwiya Chiuta nyengu yinyaki,+ kweni sonu mwalongoreka lisungu+ chifukwa cha kuleka kuvwiya kwawu,+
31 yiwu nawu aja ambula kuvwiya sonu ndipu venivi vachitiska kuti yimwi mulongoreki lisungu, ndi chilatu chakuti sonu yiwu ŵeneku nawu alongoreki lisungu.
32 Pakuti wosi Chiuta waŵasiya mu ukayidi wa kuleka kuvwiya,+ kuti wosi waŵalongo lisungu.+
33 Mbunandi waki cha wa chuma chaku Chiuta, zeru zaki zapachanya ukongwa ndipu waziŵa vinthu ukongwa! Palivi yo wangafiska kufufuza vyeruzgu vaki kweniso palivi yo wangabowozga nthowa zaki!
34 Pakuti “ndiyani yo waziŵa maŵanaŵanu ngaku Yehova,* pamwenga ndiyani yo watimulunguchizga?”+
35 Pamwenga “ndiyani yo wakupaskapu chinthu Chiuta, kuti nayu wamuweze?”+
36 Pakuti vinthu vosi vituliya kwaku iyu, vilipu chifukwa chaku iyu kweniso vaki. Kwaku iyu kuŵi unkhankhu kwamuyaya. Ame.
Mazu Ngam'mphata
^ Mazu ngaki chayingu, “mbewu.”
^ Wonani Fundu Zakukumaliya A5.
^ Pamwenga kuti, “ndikuzga.”
^ Mazu ngaki chayingu, “mnofu wangu.”
^ Wonani Fundu Zakukumaliya A5.
