Buku Lachiŵi la Samuyeli 1:1-27

  • Davidi watuvwa kuti Sauli wafwa (1-16)

  • Sumu yamaliru yo Davidi wangumbiya Sauli ndi Yonatani (17-27)

1  Sauli wati wafwa, Davidi wanguja ku Zikilagi+ kwa mazuŵa ngaŵi wati wawe kuchithereska* Aamaleki.  Pa zuŵa lachitatu, munthu munyaki wangutuwa kumsasa waku Sauli, wangukeruwa vakuvwala vaki kweniso wangujidiriya fuvu kumutu. Wati wafika kwaku Davidi wanguwa pasi ndipu wangujikama mpaka chisku chaki pasi.  Davidi wangumufumba kuti: “Utuliya pani?” Iyu wangumuka kuti: “Ndathaŵa kumsasa wa Ayisirayeli.”  Davidi wangumufumba kuti: “Vinthu vayenda wuli? Chondi ndikambiyi.” Iyu wangumuka kuti: “Ŵanthu athaŵa ku nkhondu ndipu anandi awa ndi kufwa. Sauli ndi mwana waki Yonatani, nawu afwa.”+  Sonu Davidi wangufumba mnyamata yo wanguza ndi uthenga kuti: “Yiwi waziŵa wuli kuti Sauli ndi mwana waki Yonatani afwa?”  Mnyamata yo wangumuka kuti: “Vinguchitika ŵaka kuti nani ndenga pa Phiri la Gilibowa+ pa nyengu yeniyi, ndipu ndinguwona Sauli wanyekeza pamkondu waki. Ŵanthu wo angukwera pamagaleta ndipuso wo angukwera pamahachi angumusaniya.+  Sauli wati wang’anamuka, ndipuso wati wandiwona, wangundidana, ndipu ini ndingukamba kuti, ‘Ndini panu!’  Iyu wangundifumba kuti: ‘Ndiwi yani?’ Ini ndingumuka kuti ‘Nde munthu wa mu banja laku Amaleki.’+  Pavuli paki, iyu wangundikambiya kuti: ‘Chondi iza pafupi yapa undibayi, pakuti nde mu urwirwi wakasaza cha, kweni ndeche wamoyu.’ 10  Mwaviyo, ndinguza pafupi ndipu ndingumubaya,+ chifukwa ndinguziŵa kuti wachirengi cha pakuti wangupwetekeka ukongwa. Pavuli paki, ndinguto chisoti cha ufumu cho chenga pamutu waki ndipuso goza* lo lenga pajanja laki, ndipu ndaza navu kunu kwaku yimwi ambuya.” 11  Davidi wati wavwa venivi, wanguko vakuvwala vaki, wanguvikeruwa ndipu anthulumi wo wenga nawu, nawu so anguchita viyo. 12  Yiwu angutenje, anguliya kweniso angufunga+ mpaka mazulu, chifukwa Sauli, mwana waki Yonatani, ŵanthu aku Yehova ndipuso ŵanthu a munyumba yaku Isirayeli,+ angubayika ndi lipanga. 13  Davidi wangufumba mnyamata yo wanguza ndi uthenga kuti: “Kwinu ndi nunkhu?” Iyu wangumuka kuti: “Nde mwana wa mulendu, yo wakutuliya mu banja laku Amaleki.” 14  Sonu Davidi wangumufumba so kuti: “Ntchifukwa wuli ungopa cha kusoska janja laku kuti ubayi wakusankhika waku Yehova?”+ 15  Pavuli paki, Davidi wangudana mnyamata waki yumoza ndi kumukambiya kuti: “Iza panthazi yapa umukhati.” Sonu iyu wangumukhata ndipu wangufwa.+ 16  Davidi wangukambiya mnyamata yo wanguza ndi uthenga kuti: “Ndopa zaku ziwere pa mutu waku, chifukwa mulomu waku wakuchitiya ukaboni pakuti wakamba wija kuti, ‘Ini ndini ndabaya wakusankhika waku Yehova.’”+ 17  Pavuli paki, Davidi wangumba sumu iyi yakumba pakuliya, wachiliriya Sauli ndi mwana waki Yonatani.+ 18  Iyu wangukamba kuti ŵanthu a ku Yuda asambiziki sumu iyi yo yadanikanga kuti “Uta” ndipu yingulembeka mubuku laku Yasha:+ 19  “Yiwi Isirayeli, ŵanthu akuzirwa, aŵabaya pamalu ngapachanya.+ Ndipu ŵanthu anthazi awa! 20  Venivi mungavikambanga cha ku Gati;+Mungavipharazganga cha mumisewu ya ku Ashikeloni,Asani po cha, ŵana anthukazi ŵa Afilisiti akondwengi,Kweniso ŵana anthukazi a ŵanthu ambula kudumulika, ajikuzgengi. 21  Yimwi mapiri nga Gilibowa,+Pachanya pinu pangawanga dungwi cha pamwenga vuwa,Minda nayu yingaperekanga cha vinthu vaki vakupaturika,+Chifukwa paku yimwi ndipu chishangu cha ŵanthu anthazi chafipiskikiya,Chishangu chaku Sauli chipakika so mafuta cha. 22  Uta waku Yonatani wawenga ŵaka cha,+Ndipu lipanga laku Sauli nalu lawenga ŵaka cha,+Ku ndopa za ŵanthu wo abayika, ku mafuta nga ŵanthu anthazi. 23  Sauli ndi Yonatani,+ akwanjiwa ndipuso akukondwesa pa umoyu wawu.Ndipu pa nyifwa napu angutayana cha.+ Yiwu atchimbiyanga ukongwa kuluska nombu,+Ndipuso ŵenga anthazi kuluska nkharamu.+ 24  Yimwi ŵana anthukazi aku Isirayeli, liriyani Sauli,Yo wakuvwalikaningi vakuvwala viyera kweniso vamampha,Yo wadyoŵanga vakuvwala vinu ndi golidi. 25  Munthu wanthazi wawa pa nkhondu! Yonatani wabayika pamalu ngaku ngapachanya!+ 26  Ndasuzgika maŵanaŵanu chifukwa chaku yiwi mubali wangu Yonatani;Wenga wakwanjiwa ukongwa kwaku ini.+ Ndipu chanju chaku chenga chapade kwaku ini, kuluska chanju cha anthukazi.+ 27  Ŵanthu anthazi awa,Ndipu vidya vankhondu vanangika!”

Mazu Ngam'mphata

Pamwenga kuti, “kuchibaya.”
Chibangili cho mafumu ngavwala.