Kalata Yachiŵi Yaku Peturo 3:1-18
3 Akwanjiwa, iyi ndi kalata yachiŵi sonu kukulembiyani. Nge mo ndingukulembiyani mukalata yangu yakwamba, ndisukunyisa lusu linu la kuŵanaŵana umampha mwa kukukumbusani,+
2 kuti mukumbukengi mazu ngo ngakukambika kali* ndi achimi akupaturika ndipuso dangu la Ambuya kweniso Mtaski, kuporote mwa akutumika ŵinu.
3 Chakwamba, ziŵani kuti mu mazuŵa ngakumaliya, akunyoza azamukuza ndi kunyoza kwawu ndipu azamulutirizga kuchita vinthu mwakukoliyana ndi makhumbiru ngawu.+
4 Yiwu azamukambanga kuti: “Kwe pani kuŵapu kwaki kwakulayizgika?+ Chifukwa kwambiya pa zuŵa lo apapi ŵidu akali akufwiya, vinthu vilutirizga kuŵa nge mo venge kutuliya po chilengedu chikwambiya.”+
5 Pakuti akaniya dala fundu yauneneska yakuti, kali kwenga kuchanya kweniso charu chapasi cho chingutumphuka pachanya pa maji ndipu chenga pakati pa maji chifukwa cha mazu ngaku Chiuta.+
6 Chifukwa cha mazu ngenanga, charu cha mu nyengu yo, chingunangika chati chazaza ndi maji.+
7 Kweni chifukwa cha mazu ngenanga so, kuchanya ndi charu chapasi vo viliku sonu vasungikiya motu ndipu vilutirizga kusungika mpaka pa zuŵa la cheruzgu ndipuso pa zuŵa la kunangika kwa ŵanthu ambula kopa Chiuta.+
8 Akwanjiwa, ndikhumba cha kuti muleki kuziŵa kuti kwaku Yehova,* zuŵa limoza le nge vyaka 1,000, ndipu vyaka 1,000 ve nge zuŵa limoza.+
9 Yehova* waswera cha kufiska layizgu laki+ nge mo ŵanthu anyaki aŵanaŵaniya kuti waswera. Iyu wazikira namwi chifukwa wakhumba cha kuti weyosi wanangiki, kweni wakhumba kuti weyosi walapi.+
10 Kweni zuŵa laku Yehova*+ lizengi nge munkhungu,+ penipo kuchanya kwazamutuwapu mwakupoma,+ kweni vinthu vo vipanga kuchanya ndi charu chapasi vazamusongonoka chifukwa cha kotcha kwanthazi, ndipu charu chapasi limoza ndi ntchitu zaki vazamuwoneke pakweru.+
11 Pakuti vinthu vosi venivi vazamusongonoka mu nthowa yeniyi, ŵanaŵaniyani mtundu wa munthu yo mutenere kuŵa. Mutenere kuŵa ndi nkharu yakupaturika kweniso muchitengi vinthu vakulongo kuti mwe akujipereka kwaku Chiuta,
12 muchilindizga kweniso muchilutirizga kukumbuka* kuŵapu kwa zuŵa laku Yehova,*+ penipo kuchanya kwazamunangika+ ndi motu ndipuso vinthu vo vipanga kuchanya ndi charu chapasi vazamusongonoka chifukwa cha kotcha kwanthazi!
13 Kweni mwakukoliyana ndi layizgu laki,+ tilindizga kuchanya kufya ndi charu chapasi chifya, ndipu mwenumu mwazamuja urunji.+
14 Mwaviyo, akwanjiwa, pakuti mulindizga vinthu venivi, ŵikanipu mtima kuti pakumaliya iyu wazikusaniyeni ambula donthu, ambula kalema ndipuso mwe mu chimangu.+
15 Kweniso, muwonengi kuti kuzikira kwa Ambuyafwi mbutaski, nge mo Paulo mubali widu wakwanjiwa wakulembe mwakukoliyana ndi zeru zo wangupaskika.+
16 Iyu wakulongoro vakukwaskana ndi vinthu venivi mumakalata ngaki ngosi. Kweni vinthu vinyaki vo ve mumakalata ngo, vakusuzga kuvivwisa ndipu ŵanthu abulu* kweniso ambula kujalikiskika ativibendezga nge mo achitiya so ndi Malemba nganyaki ngosi, ndipu atijidaniya pharanyiku.
17 Mwaviyo, yimwi akwanjiwa, pakuti mwaziŵiya limu, jani masu kuti ŵanthu wo aleka kuvwiya marangu aleki kukulandizgani ndi ubudi wawu, kweniso kuti mulutirizgi kuŵa akukho.*+
18 Kweni lutirizgani kukuwa mu wezi ukulu kweniso kuziŵa Ambuyafwi ndi Mtaski widu Yesu Khristu. Kwaku iyu kuŵi unkhankhu sonu mpaka muyaya. Ame.
Mazu Ngam'mphata
^ Pamwenga kuti, “vinthu vo vikukambikiya limu.”
^ Wonani Fundu Zakukumaliya A5.
^ Wonani Fundu Zakukumaliya A5.
^ Wonani Fundu Zakukumaliya A5.
^ Pamwenga kuti, “muchikhumbisiska.” Mazu ngaki chayingu, “muchithaŵirizga.”
^ Wonani Fundu Zakukumaliya A5.
^ Pamwenga kuti, “ambula kusambizika.”
^ Pamwenga kuti, “kuti muleki kusukunyika.”
