Kalata Yachiŵi Yaku Peturo 2:1-22
2 Kweni panguza achimi aboza pakati pa ŵanthu nge mo so pazamuŵiya asambizi aboza pakati pinu.+ Yiwu azamusereza mwachisisi timagulu takugaruka takupweteka ndipu azamufika mpaka pakukana mweneku yo wakuŵagula.+ Venivi vazamuchitiska kuti ajidaniyi pharanyiku mwaliŵi.
2 Ndipuso, anandi azakuŵalondo pakuchita jalidu liheni mwambula soni*+ ndipu chifukwa chaku yiwu, ŵanthu azamunyoza nthowa ya uneneska.+
3 Kweniso, mwambunu azakukugololiyani mwakugwiriskiya ntchitu mazu ngachinyengu. Kweni cheruzgu chawu cho chikupangika kali,+ chituza kamanakamana cha, ndipu pharanyiku lawu ligona cha.+
4 Kukamba uneneska, Chiuta wanguleka cha kulanga angelu wo angubuda,+ kweni wakuŵaponya mu Tatalasi,*+ wakuŵamanga simbi* mu mdima wakuti bii* ndipu alindizga cheruzgu.+
5 Ndipuso wanguleka cha kulanga charu chakali,+ kweni wangutaska Nowa mupharazgi wa urunji+ limoza ndi ŵanthu anyaki 7,+ pa nyengu yo wanguchitiska chigumula pacharu cha ŵanthu ambula kopa Chiuta.+
6 Wanguwotcha Sodomu ndi Gomora mpaka kuja vyotu pe, wangususka matawuni ngenanga,+ ndipu wangupereka chakuwoniyapu cha vinthu vo viziyengi ŵanthu ambula kopa Chiuta.+
7 Ndipu wangutaska munthu murunji Loti+ mweniyo wasuzgikanga maŵanaŵanu, chifukwa chakuti ŵanthu ambula kuvwiya marangu achitanga jalidu liheni mwambula soni,*
8 pakuti zuŵa lelosi munthu murunji mwenuyu wasuzgikanga ukongwa chifukwa cha vinthu viheni vo ŵanthu ambula kuvwiya marangu achitanga, vo wawonanga ndi kuvwa pa nyengu yo wajanga pakati pawu.
9 Mwaviyo, Yehova* waziŵa kutaska ŵanthu akujipereka kwaku iyu asani ayeseka,+ kweni wasunga ŵanthu ambula urunji kuti azinangiki* pa zuŵa la cheruzgu,+
10 ukongwa wo akhumba kufipiska maliŵavu nga anyawu+ kweniso wo ayuyuwa ŵanthu amazaza.*+
Mwakuchitiya dala kweniso mwakujikuzga, atopa cha kunyoza ŵanthu aunkhankhu.
11 Penipo angelu chinanga kuti angachita vikulu kweniso mbanthazi kuluska yiwu, kweni atiŵamangala mwakunyoza cha, chifukwa chakuti atumbika Yehova.*+
12 Ŵanthu ŵenaŵa mwakuyanana ndi vinyama vo viŵanaŵana cha, vo vichita ŵaka vinthu mwakawi kweniso vo vikuwaku kuti viwonjeki ndi kubayika, anyoza vinthu vo ativiziŵa cha.+ Azamunangika chifukwa cha vinthu viheni vo achita,
13 azamukumana ndi masuzgu nge mphotu ya vakuchita vawu viheni.
Awona kuti kuchita makhumbiru nga liŵavu nkhwakukondwesa,+ chinanga angachita ndi msana. Yiwu ndi midonthu kweniso vilema ndipu akondwa ukongwa* asani atikusambizani visambizu vawu vakulandizga achirya namwi mu maphwandu.+
14 Masu ngawu ngazaza chigololu+ ndipu atondeka kujikaniza kuchita ubudi ndipuso anyengere ŵanthu ambula kujalikiskika. Ŵe ndi mtima wakusambizika mbunu. Yiwu mbana akutembeka.
15 Aleka nthowa yakunyoloka ndipu alandizgika. Yiwu alondo nthowa yaku Balamu+ mwana waku Beyori, yo wangwanja mphotu ya kuchita vinthu viheni.+
16 Kweni wanguchenyeka chifukwa cha kunanga vinthu vamampha.+ Nyama yakunyamuwa katundu yo yilongoro cha, yingulongoro nge munthu ndipu yingutondekesa vakuchita vauzereza va mchimi yo.+
17 Yiwu mbakasupi ambula maji ndipuso nyankhuŵinda wakututuzgika ndi chimphepu chanthazi, ndipu yiwu aŵasungiya mdima wakuti bii.*+
18 Yiwu alongoro mwakujikuzga vinthu vambula phindu. Anyengere ŵanthu wo athaŵa ŵaka sonu ku ŵanthu wo achita vinthu viheni+ ndipu atiŵakopa ndi makhumbiru nga liŵavu+ kweniso ndi mijalidu yiheni yo achita mwambula soni.*
19 Penipo atiŵalayizga wanangwa, yiwu ŵeneku mbakapolu a kunangika;+ pakuti asani munthu wathereskeka ndi munthu munyaki, watuŵa kapolu waki.*+
20 Kukamba uneneska, asani atuwaku ku vinthu vakufipiska va charu ichi+ chifukwa cha kuŵaziŵa umampha Ambuya ndipuso Mtaski, Yesu Khristu, mbwenu awere so ku vinthu viheni ndi kuthereskeka, umaliru wawu uja uheni ukongwa kuluska po ŵenge pakwamba.+
21 Vatingi viŵaŵiyengi umamphaku asani anguleka kuyiziŵa umampha nthowa yaurunji, kuluska kuti pavuli pakuyiziŵa, atuweku ku dangu lakupaturika lo akulonde.+
22 Vo nthanthi yauneneska yikamba ndivu vaŵachitikiya vakuti: “Galu wawere kumawukuzi ngaki ndipu nkhumba yo yingusambisika yaluta so kuchikunkhuluka mumawulambwi.”+
Mazu Ngam'mphata
^ Mu Chigiriki, a·sel′gei·a. Wonani Mazu ngo Ngakonkhoskeka.
^ Wonani Mazu ngo Ngakonkhoskeka.
^ Yapa pangafwatulikiya so kuti, “wakuŵaŵika muvimazenji.”
^ Pamwenga kuti, “mdima wamunkhorwi.”
^ Mu Chigiriki, a·sel′gei·a. Wonani Mazu ngo Ngakonkhoskeka.
^ Wonani Fundu Zakukumaliya A5.
^ Mazu ngaki chayingu, “azidumuliki.”
^ Pamwenga kuti, “wo adelera alongozgi.”
^ Wonani Fundu Zakukumaliya A5.
^ Pamwenga kuti, “ndipu akondwa kuchita vinthu mwambula kujiko.”
^ Pamwenga kuti, “mdima wamunkhorwi.”
^ Mu Chigiriki, a·sel′ gei·a. Wonani Mazu ngo Ngakonkhoskeka.
^ Pamwenga kuti, “asani munthu wathereskeka ndi chinthu chinyaki, ndi kapolu wa chinthu cho.”
