Buku Lachiŵi la Mbiri 16:1-14

  • Asa wachita phanganu ndi ŵanthu a ku Siriya (1-6)

  • Hanani wachenya Asa (7-10)

  • Nyifwa yaku Asa (11-14)

16  Mu chaka cha 36 cha ulamuliru waku Asa, Basha fumu+ ya ku Isirayeli wanguza kuziyukiya Yuda, ndipu wangwamba kuzenga* Rama,+ kuti ŵanthu alekengi kutuwa pamwenga kuluta kwaku* Asa fumu ya ku Yuda.+  Ivi vati vachitika, Asa wanguto siliva kweniso golidi muvipinda vakusungamu chuma va munyumba yaku Yehova+ kweniso va munyumba ya fumu* ndipu wanguvitumiza kwaku Beni-hadadi fumu ya ku Siriya+ yo wajanga ku Damasiko. Ndipu Asa wangukamba kuti:  “Pe phanganu pakati paku ini ndi yiwi kweniso pakati pa ada ndi awusu. Ndakutumiziya siliva kweniso golidi. Iza uziswi phanganu lo le pakati paku yiwi ndi Basha fumu ya ku Isirayeli, kuti iyu watuweku kwaku ini.”  Beni-hadadi wanguvwiya Fumu Asa ndipu wangutuma ŵara ŵa asilikali ŵaki kuti akachiti nkhondu ndi matawuni nga ku Isirayeli. Yiwu anguyukiya Iyoni,+ Dani,+ Abelu-mayimu kweniso malu ngosi ngakusungamu vinthu nga mumatawuni nga ku Nafutali.+  Basha wati wavwa ŵaka venivi, nyengu yeniyo wanguleka kuzenga* Rama ndipu wangujowo ntchitu yaki.  Pavuli paki, Fumu Asa yingudanisa Ayuda wosi, ndipu yiwu anguchinyamuwa mya kweniso mathabwa ngo Basha wazengiyanga ku Rama.+ Vinthu venivi Fumu Asa yinguzenge*+ tawuni ya Geba+ ndi ya Mizipa.+  Pa nyengu yeniyi, Haneni+ yo wenga wakuwona* wanguza kwaku Asa fumu ya ku Yuda ndipu wangumukambiya kuti: “Chifukwa chakuti unguthemba* fumu ya ku Siriya ndipu unguthemba* Yehova Chiuta waku cha, asilikali a fumu ya ku Siriya, athaŵa mu manja mwaku.+  Asi asilikali a ku Ifiyopiya ndi a ku Libiya ŵenga anandi ukongwa ndipuso ŵenga ndi magaleta nganandi kweniso ŵanthu akukwera pa mahachi? Kweni chifukwa chakuti unguthemba Yehova, iyu wanguŵapereka mu manja mwaku.+  Pakuti masu ngaku Yehova ngatendatenda pacharu chosi,+ kuti walongo nthazi zaki pakovya ŵanthu wo mtima wawu ngwamphumphu* kwaku iyu.+ Yiwi wachita vinthu mwauzereza pa nkhani iyi. Kwamba sonu paŵengi nkhondu zakulimbana nawi.”+ 10  Kweni Asa wangumukwiyiya ukongwa wakuwona* ndipu wangumuŵika mujeri,* pakuti wangumufyiya mtima chifukwa cha venivi. Ndipu pa nyengu yeniyi Asa wangwamba kuchitiya nkhaza ŵanthu anyaki. 11  Mbiri yaku Asa kutuwa pakwamba mpaka pakumaliya, yikulembeka mu Buku la Mafumu nga ku Yuda ndi nga ku Isirayeli.+ 12  Mu chaka cha 39 cha ulamuliru waku Asa, maphazi ngaki nganguchita matenda, mpaka wangutama ukongwa. Kweni chinanga mphanyengu yo watamanga, iyu wangung’anamukiya kwaku Yehova cha, kweni ku ŵanthu akuchizga. 13  Pavuli paki, Asa wangugona kuti wapumuwi limoza ndi apapi ŵaki akali.+ Iyu wangufwa mu chaka cha 41 cha ulamuliru waki. 14  Mwaviyo, angumuŵika mumuwunda ukulu wo wangujikumbiya mu Tawuni yaku Davidi+ ndipu angumugoneka pabedi lo angudapu mafuta nga basamu ndi mafuta ngapade ngo angupanga mwakusazga vinthu vakupambanapambana.+ Kweniso angumupembe chimotu chikulu pa maliru ngaki.*

Mazu Ngam'mphata

Pamwenga kuti, “wanguzenga mpanda wakukho wa tawuni ya; wanguzenga so.”
Pamwenga kuti, “kutuwa pamwenga kuluta muchigaŵa chaku.”
Pamwenga kuti, “munyumba yachifumu.”
Pamwenga kuti, “kuzenga mpanda wakukho wa tawuni ya; kuzenga so.”
Pamwenga kuti, “yinguzenge mpanda wakukho wa; yinguzenge so.”
Mazu ngaki chayingu, “ungunyekeze.”
Mazu ngaki chayingu, “ungunyekeze.”
Pamwenga kuti, “ukujipereka wosi.”
Mazu ngaki chayingu, “munyumba ya matangaza.”
Kung’anamuwa kuti anguwotcha thupi laku Asa cha, kweni anguwotcha vinthu vinandi vakununkhira.