Kalata Yakwamba Yakuluta Kwaku Timote 5:1-25
5 Munthu mura ungamususkanga mwakukalipa cha.+ Kweni umuchiskengi nge wusu, ndipu anyamata nge aku ŵaku pamwenga avurwa ŵaku,
2 anthukazi arara nge anyoku, asungwana nge azichi ŵaku, ndipu ungaŵanga ndi maŵanaŵanu ngaheni cha.
3 Uŵanaŵaniyengi* vyoko vo ndi vyoko nadi.*+
4 Kweni asani choko chinyaki che ndi ŵana pamwenga azuku, ŵenaŵa ndiwu asambiri dankha kujipereka kwaku Chiuta munyumba mwawu+ ndipuso kuweze apapi ŵawu ndi ambuyawu vo vitiŵayenere,+ pakuti chenichi ntchakuzomerezeka pa masu paku Chiuta.+
5 Sonu munthukazi yo ntchoko nadi ndipu walivi chechosi, wathemba Chiuta+ ndipu walutirizga kuŵeyere ndi kupemphera msana ndi usiku.+
6 Kweni yo watanja kukhorwesa makhumbiru ngaki, ngwakufwa chinanga kuti ngwamoyu.
7 Mwaviyo lutirizga kuŵapaska ulongozgi wenuwu,* kuti aleki kuja ndi kafukwa.
8 Ndipu kukamba uneneska, asani munthu watiŵaphwere cha wo mbaki, ukongwa a munyumba yaki, wakana chivwanu ndipu ndi muheni ukongwa kuluska munthu wambula chivwanu.+
9 Choko cho chingaŵikika pamundandanda, chije munthukazi wa vyaka 60 kuluta kunthazi, ndipuso wakuti wenga muwolu wa munthulumi yumoza,
10 waje ndi mbiri yakuti wangugwira ntchitu zamampha,+ wakulera umampha ŵana ŵaki,+ walondiyanga alendu,+ wasambisanga maphazi nga akupaturika,+ wawovyanga akusuzgika+ kweniso wajiperekanga pa ntchitu yeyosi yamampha.
11 Kweni vyoko visungwana vingaŵikikanga pamundandanda cha, pakuti khumbiru lakugonana la anthukazi ŵenaŵa litiŵachitiska kuti aleki Khristu, ndipu akhumba kuyirwa.
12 Yiwu azamuyeruzgika chifukwa ajowo chivwanu cho anguchilongo pakwamba.*
13 Pa nyengu yeniyo pe asambira ulesi, ayingayinga ŵaka munyumba zakupambanapambana. Yiwu aja ŵaka alesi cha, kweni akamba so va anyawu ŵeneku kulivi. Aselere pa nkhani zaŵeni zo zitiŵakwaska cha,+ kweniso akamba vinthu vakuti atenere cha kuvikamba.
14 Mwaviyo, ndikhumba kuti vyoko visungwana viyirwengi,+ vibalengi ŵana,+ viphweriyengi nyumba zawu, kuti wakususka waleki kusaniya mpata wakuvinene.
15 Ndipu anyaki alandizgika kali, mwakuti alondo Satana.
16 Asani munthukazi wakugomezga we ndi abali ŵaki wo ndi vyoko, waŵawovyi kuti mpingu uleki kuja ndi mphingu. Ndipu asani vaŵa viyo, mpingu ungaphwere wo ndi vyoko nadi.*+
17 Ŵara wo alongozga umampha+ apaskiki ulemu ukulu,+ ukongwa ŵeniwo achita phamphu kulongoro ndi kusambiza.+
18 Pakuti lemba likamba kuti, “Asani ng’ombi yikhwema mbewu, ungayimanganga kumulomu cha.”+ Likamba so kuti, “Wantchitu watenere kulonde malipiru ngaki.”+
19 Ungazomeranga cha kuyeruzga mulandu wo munthu mura* wambika asani palivi ukaboni wa ŵanthu ŵaŵi pamwenga atatu.+
20 Ŵanthu wosi wo achita ubudi uŵachenyengi+ pakweru,+ kuti anyaki wosi asambirepu kanthu.*
21 Nditikulamula mwanthazi pa masu paku Chiuta, paku Khristu Yesu kweniso pa angelu akusankhika, kuti usungengi ulongozgi wenuwu kwambula sankhu pamwenga kwanjiya.+
22 Ungathaŵiriyanga cha kuŵika manja pa munthu weyosi;*+ kweniso ungatongaku cha maubudi nga ŵanthu anyaki. Lutirizga kuja wambula kufipiskika.
23 Ungamwanga so maji cha,* kweni umwengepu vinyu mumanavi chifukwa cha mumoyu mwaku ndipuso kutamatama kwaku.
24 Maubudi nga ŵanthu anyaki ngawoneka pakweru, ndipu ngachitiska kuti ayeruzgiki, penipo nga ŵanthu anyaki ngataziziŵika pavuli.+
25 Mwakuyanana ŵaka, ntchitu zamampha nazu ziwoneka pakweru,+ kweni zamampha zo zileka kuwoneka, zingalutiriya cha kubisika.+
Mazu Ngam'mphata
^ Mazu ngaki chayingu, “Utumbikengi.”
^ Pamwenga kuti, “vyoko vo vikavu nadi”; kung’anamuwa, vyoko vo vilivi munthu wakuviwovya.
^ Pamwenga kuti, “kuŵapaska marangu ngenanga.”
^ Pamwenga kuti, “ajowo layizgu lawu lakwamba.”
^ Pamwenga kuti, “vyoko vo vikavu nadi”; kung’anamuwa, vyoko vo vilivi munthu wakuviwovya.
^ Pamwenga kuti, “wakususkana ndi mura.”
^ Mazu ngaki chayingu, “kuti anyaki wosi aje ndi mantha.”
^ Kung’anamuwa, kusankha munthu mwakuthaŵiriya.
^ Pamwenga kuti, “Ungamwanga maji pe cha.”
