Buku Lakwamba la Samuyeli 25:1-44
25 Pati pajumpha nyengu, Samuyeli wangufwa;+ ndipu Ayisirayeli wosi anguwungana kuti amuliyi kweniso kuti amuŵiki panyumba yaki ku Rama.+ Pavuli paki, Davidi wangusoka ndi kuluta kuchipululu cha Parani.
2 Sonu ku Mawoni+ kwenga munthu munyaki yo wagwiriyanga ntchitu yaki ku Karimeli.*+ Munthu mwenuyu wenga wakukhupuka ukongwa. Iyu wenga ndi mbereri 3,000 ndi mbuzi 1,000, ndipu pa nyengu iyi wasenganga mbereri zaki ku Karimeli.
3 Munthu yo, wadanikanga kuti Nabala,+ ndipu muwolu waki wadanikanga kuti Abigelu.+ Munthukazi wenga wazeru kweniso wakutowa, kweni munthulumi wenga mukali ndipuso wankharu yabwekabweka.+ Munthulumi uyu wenga wa mu banja laku Kalebe.+
4 Davidi wanguvwa we muchipululu kuti Nabala wasenga mbereri zaki.
5 Sonu Davidi wangutuma anyamata ŵaki 10 kwaku Nabala, ndipu wangukambiya anyamata wo kuti: “Lutani ku Karimeli ndipu asani mwafika kwaku Nabala, mukamutawuzgi mu zina langu.
6 Pavuli paki, mukamukambiyi kuti, ‘Uje ndi umoyu utali kweniso uje ndi umoyu wamampha,* nyumba yaku yosi yije ndi umoyu wamampha kweniso vosi vo we navu vije ndi umoyu wamampha.
7 Sonu ndavwa kuti usenga mbereri zaku. Pa nyengu yo aliska ŵaku ŵenga ndi isi, tinguŵachitiya chiheni chechosi cha,+ kweniso pengavi kanthu kawu kekosi ko kangusoŵa pa nyengu yosi yo ŵenga ku Karimeli.
8 Uŵafumbi anyamata ŵaku ndipu akukonkhoskiyengi. Anyamata ŵangu asaniyi wezi pa masu paku chifukwa taza pa nyengu ya likondwa.* Chondi, Davidi mwana waku kweniso ateŵeti ŵaku uŵapaskeku chechosi cho ungaŵa nachu.’”+
9 Sonu anyamata aku Davidi anguluta ndi kuchimukambiya venivi Nabala mu zina laku Davidi. Ŵati amaliza kumukambiya,
10 Nabala wangumuka ateŵeti aku Davidi kuti: “Davidi ndiyani, ndipu mwana waku Jese ndiyani? Mazuŵa nganu ateŵeti anandi athaŵa ambuyawu.+
11 Kumbi ndikhumbika kuto chiŵandi changu ndi nyama yo ndabayiya ŵanthu wo atindisenge mbereri zangu ndi kupereka ku ŵanthu ambula kuziŵika ko atuliya?”
12 Anyamata aku Davidi anguweku ndipu angukambiya Davidi mazu ngosi ngenanga.
13 Nyengu yeniyo, Davidi wangukambiya anthulumi wo wenga nawu kuti: “Weyosi wamangiriyi lipanga laki!”+ Mwaviyo, yiwu angumangiriya malipanga ngawu, ndipu Davidi nayu wangumangiriya lipanga laki. Anthulumi pafufupi 400 angulutiya limoza ndi Davidi, ndipu anthulumi 200 anguja kuti aphwere katundu.
14 Pa nyengu iyi, mteŵeti munyaki waku Nabala wangukambiya Abigelu muwolu waku Nabala kuti: “Awonani! Davidi wangutuma ŵanthu kutuwa kuchipululu kuti azikhumbiyi vamampha ambuyafwi, kweni ambuyafwi aŵanyoza ukongwa.+
15 Ŵanthu ŵenaŵa angutichitiya vamampha ukongwa. Yiwu angutipweteka cha ndipuso pengavi chinthu chidu chechosi cho chingusoŵa pa nyengu yosi yo tenga nawu kudondu.+
16 Yiwu ŵenga nge mpanda wakutizunguliya wo wativikiliyanga msana ndi usiku, pa nyengu yosi yo tenga nawu tichiliska mbereri.
17 Sonu muwoni cho mungachita, pakuti soka liwiyengi ambuya ndi nyumba yawu yosi,+ kweniso ambuya ndi munthu wabwekabweka*+ ukongwa mwakuti munthu wangakamba nawu cha.”
18 Sonu Abigelu+ wanguto viŵandi 200, misuku yikuluyikulu yiŵi ya vinyu, wangubaya mbereri zinkhondi, wanguto so mbewu zakukazinga zakukwana miyesu yinkhondi ya seya,* makeki 100 nga mphereska zakumira kweniso makeki 200 nga mkuyu wakukanyata pamoza, ndipu vosi wanguvikweza pa abulu.+
19 Pavuli paki wangukambiya ateŵeti ŵaki kuti: “Danjiyanipu, ndipu ini ndikulondoningi.” Kweni mulumu waki Nabala wangumukambiya chechosi cha.
20 Abigelu we pabulu wachisika mumapiri, Davidi ndi ŵanthu ŵaki nawu asikanga mumapiri kulazga kwaku iyu, ndipu Abigelu wangukumana nawu.
21 Sonu Davidi wakambanga kuti: “Ndingugwira ntchitu paŵaka pa nyengu yo ndinguvikiliya vinthu va munthu uyu muchipululu. Pengavi chinthu chaki chechosi cho chingusoŵa,+ mbwenu iyu watindiweze viheni pa vamampha.+
22 Chiuta waŵalangi arwani aku Davidi* kweniso wasazgiyeku* asani kufika mlenji ndizomerezengi kuti munthulumi* chinanga njumoza wa munyumba ya munthu uyu waje ndi umoyu.”
23 Abigelu wati wawona Davidi, wangusika mwaliŵiliŵi pabulu. Iyu wangujikamiya Davidi ndipu wangujikama mpaka chisku chaki pasi.
24 Pavuli paki iyu wanguwiya pamaphazi ngaku Davidi ndi kukamba kuti: “Ambuya mulandu uje paku ini; ndizomerezeni ndamteŵeti winu munthukazi kuti ndilongoro namwi, ndipu chondi vwisiyani mazu nga mteŵeti winu munthukazi.
25 Chondi ambuya, mungaŵanaŵaniyanga cha vinthu vo munthu wabwekabweka uyu Nabala wakamba,+ pakuti iyu we nge mo zina laki liliri. Zina laki ndi Nabala,* ndipu iyu ndi muzereza. Kweni ini ndamteŵeti winu munthukazi, ndinguŵawona cha anyamata wo mungutuma.
26 Ambuya, ndilapizga mu zina laku Yehova Chiuta wamoyu, kweniso nge mo yimwi muliri amoyu, Yehova ndiyu wakuwezani+ kuti muleki kuja ndi mulandu wakubaya munthu+ kweniso kuti muleki kuweze* ndi manja nginu. Arwani ŵinu wosi ndipuso ŵanthu wo akhumba kukupwetekani ambuya, aje nge Nabala.
27 Sonu zomerezani kuti mphasu iyi yo*+ ndamteŵeti winu munthukazi ndaza nayu, yiperekeki kwa anyamata wo alondo yimwi ambuya.+
28 Chondi, ndigowokiyeni maubudi ngangu ndamteŵeti winu munthukazi, pakuti Yehova watondekengi cha kukuzengiyani nyumba ambuya,+ yo yijengeku mpaka muyaya. Ve viyo chifukwa chakuti yimwi ambuya muchita nkhondu zaku Yehova,+ ndipu palivi kanthu kaheni kekosi ko kasanirika mwaku yimwi mu mazuŵa nginu ngosi.+
29 Asani munthu munyaki wakuyukiyeningi ndi kukhumba kukubayani, Yehova Chiuta winu wavikiliyengi umoyu wa ambuya mwakuwuvunga muthumba la umoyu, kweni maumoyu nga arwani ŵinu wangaponyengi nge mya yo yaponyeka ndi chakuponye mya.
30 Asani Yehova wazikuchitiyani yimwi ambuya vinthu vosi vamampha vo wakulayizga, ndipuso asani wazikusankhani kuja mulongozgi wa Ayisirayeli,+
31 mwazamuja ndi chitima cha pamwenga kudandawula* chifukwa cha kubaya munthu kwambula chifukwa, kweniso chifukwa chakuzomereza kuti janja linu liweze.*+ Asani Yehova wazikuchitiyani vamampha ambuya, muzindikumbuki ndamteŵeti winu munthukazi.”
32 Davidi wangumuka Abigelu kuti: “Watumbikiki Yehova Chiuta waku Isirayeli yo wakutuma msanawale kuti uzikumani ndi ini!
33 Nawi so utumbikiki chifukwa cha zeru zaku! Utumbikiki chifukwa wandiweza msanawale kuti ndileki kubaya munthu+ kweniso kuti ndileki kuweze* ndi manja ngangu.
34 Kweni ndilapizga mu zina laku Yehova Chiuta waku Isirayeli yo wandiweza kuti ndileki kukupweteka,+ kuti ukalekengi kuza liŵi kuzikumana nani,+ palivi munthulumi* chinanga njumoza wa munyumba yaku Nabala yo watingi wajengi ndi umoyu kufika mawa ndi mlenji.”+
35 Davidi wati wakamba ivi, wangulonde vo Abigelu wangumupingiya ndipu wangumukambiya kuti: “Luta kunyumba yaku mwachimangu. Awona, ini ndakuvwiya ndipu ndazakukuchitiya vo wapempha.”
36 Pavuli paki, Abigelu wanguwere kwaku Nabala, yo pa nyengu iyi wachitanga phwandu nge fumu munyumba yaki. Nabala wangukondwa* ukongwa ndipu wanguloŵe ukongwa. Abigelu wangumukambiya chechosi cha mpaka mlenji.
37 Kwati kwacha, moŵa wati wamala mumutu mwaku Nabala, muwolu waki wangumukambiya chechosi. Sonu mtima waku Nabala unguja nge wa munthu wakufwa, ndipu wangumila nge mwa.
38 Pati pajumpha mazuŵa 10, Yehova wangulanga Nabala, ndipu wangufwa.
39 Davidi wati wavwa kuti Nabala wafwa wangukamba kuti: “Watumbikiki Yehova, yo wandiyeruzgiya mulandu wangu+ wakunyozeka ndi Nabala+ ndipuso wachitiska kuti mteŵeti waki waleki kuchita chinthu chiheni.+ Yehova wasisiya pamutu waku Nabala vinthu viheni vo wanguchita!” Pavuli paki, Davidi wangutuma ŵanthu kuti akamukhumbiyi Abigelu kuti waje muwolu waki.
40 Mwaviyo, ateŵeti aku Davidi anguluta kwaku Abigelu ku Karimeli ndipu angumukambiya kuti: “Davidi watituma kuti tizikuto kuti ukaje muwolu waki.”
41 Nyengu yeniyo, Abigelu wangusoka ndipu wangujikama mpaka chisku chaki pasi ndipu wangukamba kuti: “Ini kapolu winu nde panu, ndijengi mteŵeti wakusambisa maphazi+ nga ateŵeti ŵa ambuya.”
42 Sonu Abigelu+ wangusoka mwaliŵiliŵi ndi kukwera pabulu; iyu wenga ndi ateŵeti ŵaki anthukazi ankhondi wo azanga muvuli mwaki. Abigelu wangulongozgana ndi ŵanthu wo Davidi wangutuma ndipu iyu wanguja muwolu waki.
43 Davidi wanguto so Ahinowamu+ wa ku Yezereli,+ ndipu anthukazi wosi ŵaŵi yaŵa anguja awolu ŵaki.+
44 Kweni Sauli wangupereka mwana waki Mikala,+ muwolu waku Davidi kwaku Paliti.+ Paliti wenga mwana waku Layishi, munthu wa ku Galimu.
Mazu Ngam'mphata
^ Tawuni ya ku Yuda; ndi Phiri la Karimeli cha.
^ Pamwenga kuti, “uje ndi chimangu.”
^ Mazu ngaki chayingu, “pa zuŵa lamampha.”
^ Pamwenga kuti, “muzeleza.”
^ Mwesu umoza wa seya wayanananga ndi malita 7.33. Wonani Fundu Zakukumaliya B14.
^ Yapa pangafwatulikiya so kuti, “walangi Davidi.”
^ Mazu ngaki chayingu, “Chiuta waŵachitiyi viyo arwani aku Davidi ndipuso wasazgiyeku.”
^ Mazu ngaki chayingu, “weyosi yo wakoze chimati.” Mazu nga njerengu nga Chiheberi ngo ngang’anamuwa anthulumi.
^ Kung’anamuwa kuti, “Muzeleza; Wambula Zeru.”
^ Pamwenga kuti, “kutaska.”
^ Mazu ngaki chayingu, “thumbiku ili lo.”
^ Mazu ngaki chayingu, “mwazamupenthyapenthya cha pamwenga kuguŵa.”
^ Pamwenga kuti, “litaski.”
^ Pamwenga kuti, “kutaska.”
^ Mazu ngaki chayingu, “weyosi yo wakoze chimati.” Mazu nga njerengu nga Chiheberi ngo ngang’anamuwa anthulumi.
^ Mazu ngaki chayingu, “Mtima waku Nabala ungukondwa.”
