Buku Lakwamba la Samuyeli 2:1-36

  • Pempheru laku Hana (1-11)

  • Maubudi nga ŵana anthulumi ŵaŵi aku Eli (12-26)

  • Yehova wayeruzga nyumba yaku Eli (27-36)

2  Sonu Hana wangupemphera kuti: “Mtima wangu ukondwere mwaku Yehova;+Sengwi langu* likwezeka ndi Yehova. Ndijula mulomu wangu mwakususkana ndi arwani ŵangu,Pakuti ndikondwa ndi ntchitu zinu za utaski.   Palivi wakupaturika nge Yehova,Palivi munyaki wakuyanana namwi,+Ndipu palivi jalawi lakuyanana ndi Chiuta widu.+   Mungalutirizganga cha kulongoro mwakujikuzga;Pamulomu pinu pangatuwanga chechosi cha chakulongo kujikuzga,Pakuti Yehova ndi Chiuta yo waziŵa vinthu,+Ndipu vakuchita vosi wativipima umampha.   Mauta nga ŵanthu anthazi ngavikitika,Kweni wo aguŵa apaskika nthazi.+   Ŵanthu wo aryanga umampha, atenere kugwira ganyu kuti asaniyi chakurya,Kweni anja, nja yawu yamala.+ Chumba chabala ŵana 7,+Kweni yo wenga ndi ŵana anandi walivi.*   Yehova wabaya, ndipuso wasunga umoyu;*Wasisiya ku Dindi,* ndipuso wayuska.+  Yehova wakavusa, ndipuso wasakatisa;+Iyu wasiska, ndipuso wakweza.+   Iyu wasoska munthu wakusika kutuliya pafuvu;Ndipu wasoska mukavu kutuliya pandundu ya vyotu,*+Kuti waŵajaliki pamoza ndi alongozgi,Kweniso kuti waŵapaski malu nga ulemu. Ntchindamilu za charu, zaku Yehova,+Ndipu charu wachijalika pachanya paku izu.   Iyu wavikiliya malundi nga ŵanthu ŵaki akugomezgeka,+Kweni munthu muheni wachetamisikengi mu mdima,+Munthu wathereska chifukwa cha nthazi cha.+ 10  Yehova wavikitengi ŵanthu wo alimbana nayu;*+Iyu wagululusengi kutuwa kuchanya kuti walimbani nawu.+ Yehova wayeruzgengi mpaka kuvigoti va charu chapasi,+Iyu wapaskengi nthazi fumu yaki+Ndipu wakwezengi sengwi la* wakusankhika waki.”+ 11  Pavuli paki, Elikana wanguluta kunyumba yaki ku Rama, kweni mwana yo wanguja mteŵeti waku* Yehova+ pa masu paku Eli wasembi. 12  Ŵana aku Eli ŵenga aheni+ ndipu amutumbikanga cha Yehova. 13  Ivi ndivu achitanga ndi vinthu vo asembi akhumbikanga kulonde kutuwa ku ŵanthu:+ Asani munthu waza kuzipereka sembi, mteŵeti wa wasembi wazanga ndi chifoloku cha minyu ngatatu nyama yichibwata, 14  ndipu iyu wachiserezanga munkhali, muchipotu cha vikoleru viŵi, mumumphika pamwenga muchipotu cha chikoleru chimoza. Chechosi cho chifoloku cho chazuwuwa, wasembi watonga kuti ntchaki. Venivi ndivu achitiyanga Ayisirayeli wosi wo azanga ku Shilo. 15  Ndipuso munthu wakupereka sembi wechendapirizi mafuta,+ mteŵeti wa wasembi wazanga ndi kuzimukambiya kuti: “Mupaski nyama wasembi kuti wawotchi. Iyu walondengeku cha nyama yakubika kwaku yiwi, umupaski yiŵisi.” 16  Asani munthu yo wakamba kuti: “Ima dankha apirizi dankha mafuta,+ pavuli paki ungato yeyosi yo wakhumba,” iyu wakambanga kuti: “Awa, undipaski sonu, asani po cha, ndichitengi kuphanga!” 17  Mwaviyo, ubudi wa ateŵeti ungukuwa ukongwa pa masu paku Yehova,+ pakuti ŵanthu ŵenaŵa ayitumbikanga cha sembi yaku Yehova. 18  Sonu Samuyeli wateŵetiyanga+ pa masu paku Yehova ndipu iyu wavwalanga efodi wasalu+ chinanga kuti wenga munamana. 19  Chaka chechosi, anyina amusoniyanga mkhanju wapanthuwa ndipu amupingiyanga achiza ndi alumu ŵawu kuzipereka sembi ya chaka ndi chaka.+ 20  Eli wangutumbika Elikana ndi muwolu waki ndipu wangukamba kuti: “Yehova wakupaski mwana kutuliya mu muwolu waku uyu mumalu mwaku yo mwamupereka* kwaku Yehova.”+ Pavuli paki, yiwu anguwere kunyumba. 21  Yehova wangukumbuka Hana mwakuti wangwamba kubala.+ Iyu wangubala so ŵana anthulumi atatu kweniso ŵana anthukazi ŵaŵi. Ndipu mnyamata yo Samuyeli wangulutirizga kukuwa pa masu paku Yehova.+ 22  Sonu Eli wenga wakukota, kweni wavwanga vosi vo ŵana ŵaki achitiyanga+ Ayisirayeli wosi, kweniso kuti agonananga ndi anthukazi wo ateŵetiyanga pakhomu la chihema chakukumanaku.+ 23  Iyu waŵakambiyanga kuti: “Ntchifukwa wuli mulutirizga kuchita viyo? Pakuti vinthu vo ndituvwa ku ŵanthu wosi vakukwaskana ndi yimwi, vamampha cha. 24  Awa mwaŵana ŵangu, nkhani yo yivwika pakati pa ŵanthu aku Yehova, njamampha cha. 25  Asani munthu wabudiya munthu munyaki, munyaki wangamuŵeyere kwaku Yehova;* kweni asani munthu wabudiya Yehova,+ ndiyani yo wangamupemphere.” Kweni yiwu angukana kuvwiya awusewu, pakuti Yehova wangusimikiza kuti waŵabayi.+ 26  Samuyeli wakuwanga mu msinkhu ndipu wayanjikanga ndi Yehova kweniso ŵanthu.+ 27  Munthu waku Chiuta wanguza kwaku Eli ndipu wangumukambiya kuti: “Ivi ndivu Yehova wakamba; ‘Asi ndingujivumbuwa pakweru kunyumba ya awusu pa nyengu yo ŵenga ku Ijipiti nge akapolu kunyumba yaku Farawo?+ 28  Ndipu awusu ndinguŵasankha kutuwa pakati pa mafuku ngosi nga Ayisirayeli+ kuti ateŵetiyengi nge wasembi wangu, kweniso kuti alutengi paguŵa la sembi+ kuchipereka sembi ndi sembi za vakununkhira* ndipuso kuti avwalengi efodi pa masu pangu. Ndipu nyumba ya awusu ndinguyipaska sembi zosi zakotcha pamotu za Ayisirayeli.*+ 29  Ntchifukwa wuli mwaŵanthu yimwi munyoza* sembi ndipuso vakupereka vangu vo ini ndikulamula kuti ŵanthu aperekengi mumalu ngangu ngakujamu?+ Ntchifukwa wuli utumbika ŵana ŵaku kuluska ini mwakujitutuŵisa mwaŵeni ndi vigaŵa vamampha va sembi yeyosi yo ŵanthu ŵangu Ayisirayeli apereka?+ 30  “‘Ndichu chifukwa chaki Yehova Chiuta waku Isirayeli wakamba kuti: “Ndingukamba nadi kuti nyumba yaku kweniso nyumba ya awusu yiyendengi pa masu pangu mpaka muyaya.”+ Kweni sonu Yehova watiti: “Ndizomerezengi so cha kuti venivi vilutirizgi kuchitika, chifukwa wo atinditumbika, nani so ndiŵatumbikengi,+ kweni wo atindiyuyuwa, nani so ndiŵayuyuwengi.” 31  Awona! Mazuŵa ngatuza po ndazamudumuwa nthazi zaku kweniso za* nyumba ya awusu, ndi chilatu chakuti paziŵevi munthu wa munyumba yaku yo wazamuja ndi umoyu mpaka kukota.+ 32  Pa vinthu vosi vamampha vo vichitikiya Isirayeli, yiwi wazamuwonanga ŵaka murwani mumalu ngangu ngakujamu.+ Ndipu mwazamuŵavi munthu wakukota munyumba yaku. 33  Munthu wa munyumba yaku yo ndimulekesengi cha kuteŵete paguŵa langu la sembi, wazamuchitiska kuti masu ngaku ngaje ngachibulumutiya ndipuso wazakukuchitiska chitima,* kweni ŵanthu anandi a munyumba yaku azamukufwa ndi lipanga la ŵanthu.+ 34  Vo vichitikiyengi ŵana ŵaku ŵaŵi Hofini ndi Finihasi, viŵengi chisimikizu kwaku yiwi: Wosi ŵaŵi afwengi pa zuŵa limoza.+ 35  Ndipu ndazakujiyuskiya wasembi wakugomezgeka.+ Iyu wazamuchita mwakukoliyana ndi vo mtima wangu ukhumba;* ndipu ndazakumuzenge nyumba yambula kumala, kweniso wazamukwenda pa masu pa wakusankhika wangu nyengu zosi. 36  Weyosi yo wajengeku munyumba yaku, wazengi ndi kuzijikama kwaku iyu kuti wamupaski ndalama ndi chakurya, ndipu wazamukamba kuti: “Chondi, ndiŵikeni pa udindu wa wasembi kuti ndisaniyengeku chakurya.”’”+

Mazu Ngam'mphata

Pamwenga kuti, “Nthazi zangu.” Wonani Mazu ngo Ngakonkhoskeka.
Mazu ngaki chayingu, “wafota.”
Pamwenga kuti, “waweze ku umoyu.”
Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
Yapa pangafwatulikiya so kuti, “pankhandu.”
Yapa pangafwatulikiya so kuti, “Wo alimbana ndi Yehova achitengi mantha.”
Pamwenga kuti, “nthazi za.” Wonani Mazu ngo Ngakonkhoskeka.
Pamwenga kuti, “wateŵetiyanga.”
Mazu ngaki chayingu, “mwamubwelekesa.”
Yapa pangafwatulikiya so kuti, “Chiuta wangachiŵeyere mumalu mwaku iyu.”
Yapa pangafwatulikiya so kuti, “kuchichitiska sembi za josi kukwera kuchanya.”
Mazu ngaki chayingu, “ŵana aku Isirayeli.”
Mazu ngaki chayingu, “mupafuwa.”
Mazu ngaki chayingu, “ndazamudumuwa janja laku kweniso la.”
Pamwenga kuti, “wazamuchitiska kuti umoyu waku usuzgiki.”
Pamwenga kuti, “vo ve mumtima mwangu.”