Buku Lakwamba la Mafumu 7:1-51

  • Nyumba yachifumu yaku Solomoni (1-12)

  • Hiramu yo wenga walusu watovya Solomoni (13-47)

    • Vipilala viŵi vamkuŵa (15-22)

    • Nyanja yachisulu chakusongono (23-26)

    • Vakunyamuliya 10 kweniso mabeseni ngamkuŵa (27-39)

  • Amaliza kupanga vinthu vinyaki vagolidi (48-51)

7  Solomoni wanguzenga nyumba yaki yachifumu,+ ndipu yingumutole vyaka 13 kuti wamalizi chechosi.+  Iyu wanguzenga so nyumba yo yadanikanga kuti Nyumba ya Lisuwa la Lebanoni.+ Nyumba iyi yenga mamita pafufupi 45 mu utali, mamita pafufupi 22 mu usani, kweniso mamita pafufupi 13 kutuwa pasi kufika kuchanya.* Iyu wanguyizenga pachanya pa mapolu nga sidara* ngo ngenga nge ntchindamilu ndipu angungajintha mumizeri yinayi. Pachanya pa mapolu ngenanga anguyalapu vimiti vinyaki va sidara.+  Nyumba iyi anguyizenga mwakugwiriskiya ntchitu mathabwa nga sidara* ngo angungakhoma kwambiya pachanya pa mathabwa ngo nganguyalika pamapolu. Mapolu yanga ngengapu 45 ndipu pamzeri wewosi angujinthapu mapolu 15.  Kutuwa pasi kuluta kuchanya, penga mizeri yitatu ya mawindu ngo ngenga ndi mafulemu ndipu windu lelosi anguliŵika pachanya pa windu linyaki mumizeri yitatu yeniyi.  Makhomu ngosi ngenga ndi mafulemu ngo ngayanananga muvigaŵa vosi vinayi,* nge mo so nge nge mawindu ngo ngenga mumizeri yitatu.  Iyu wanguzenga so Holu ya* Vipilala yo yenga mamita pafufupi 22 mu utali kweniso mamita pafufupi 13 mu usani, ndipu kumasu kwaki kwenga khondi lo lenga ndi vipilala ndipuso denga.  Wanguzenga so Holu ya* Mpandu Waufumu+ yo wayeruzgiyangamu milandu ndipu yaziŵikanga so kuti Holu ya Cheruzgu.+ Holu iyi yenga ya mathabwa nga sidara* kutuliya pasi mpaka kuchanya.  Solomoni wanguzenga so nyumba* yakuti wajengemu kuvuli kwa Holu, ndipu wanguyizenga mwakuyanana ndi Holu.* Nyumba iyi wanguyizenga mubalaza linyaki.+ Mwana munthukazi waku Farawo yo wangumuto kuti waje muwolu waki,+ wangumuzenge so nyumba yakuyanana ndi Holu yeniyi.  Nyumba zosi izi, kutuwa pafawundeshoni mpaka muchanya, ndipuso kubwalu mpaka kubalaza likulu,+ anguzenge mya yakudula+ yo anguyisema mwakukoliyana ndi mo angupimiya, kweniso anguyicheketereza ndi masowu ngakucheke mya, mukati ndi kubwalu viyo. 10  Fawundeshoni anguzenge mya yikuluyikulu kweniso yakudula. Mya yinyaki yenga yikulu mamita pafufupi nganayi* ndipu yinyaki yafikanga mamita pafufupi ngatatu ndi hafu.* 11  Pachanya pa mya yeniyi, penga mya yinyaki yakudula yo anguyisema mwakukoliyana ndi mo angupimiya, kweniso penga mathabwa nga sidara.* 12  Chimati chosi cha balaza likulu chinguzengeka ndi mizeri yitatu ya mya yakusema kweniso mzeri umoza wa mathabwa nga sidara* nge mo lenge balaza lamukati+ la nyumba yaku Yehova kweniso khondi+ la nyumba. 13  Fumu Solomoni yingudanisa Hiramu+ ndipu anguza nayu kutuliya ku Turo. 14  Iyu wenga mwana wa choko chinyaki cha mu fuku laku Nafutali. Awisi ŵenga a ku Turo ndipu apanganga vinthu vakupambanapambana vamkuŵa.+ Hiramu wenga ndi lusu ukongwa, wavwisanga vinthu,+ ndipuso waziŵanga vinandi pa ntchitu yakupanga vinthu vamkuŵa. Sonu iyu wanguza kwa Fumu Solomoni, ndipu wangwamba kugwira ntchitu yosi yo wangupaskika. 15  Iyu wangupanga vipilala viŵi vamkuŵa,+ ndipu chipilala chechosi chenga mamita pafufupi 8* kutuwa pasi kufika pachanya. Kweniso kuzunguliya chipilala chechosi, pakhumbikanga chingwi chakupimiya cha mamita pafufupi ngankhondi.*+ 16  Iyu wangupanga so mitu yiŵi yamkuŵa ndipu wanguyiŵika pachanya pa vipilala venivi. Mutu umoza wenga utali mamita pafufupi ngaŵi* ndipu unyaki nawu wenga utali mamita pafufupi ngaŵi. 17  Mutu wewosi wachipilala anguwutowesa ndi vilepa vakulukanalukana nge matcheni.+ Mutu umoza wenga ndi vilepa 7 ndipu unyaki nawu wenga ndi vilepa 7. 18  Wangupanga so mizeri yiŵi ya vipasu va pomegiraneti* kuzunguliya chilepa chechosi kuti wajali mitu yo yenga pachanya pa vipilala. Mitu yosi yiŵi wanguchita nayu venivi. 19  Mitu yo yenga pachanya pa vipilala vo venga pakhondi, yawonekanga nge maluŵa ndipu yenga yitali mamita pafufupi ngaŵi.* 20  Mitu iyi anguyijalika pa vipilala viŵi, pachanya pa chigaŵa chakuzunguliya cho chakwaskananga ndi vilepa, ndipu penga vipasu 200 va pomegiraneti* vo vinguŵikika mumizeri kuzunguliya mutu wewosi.+ 21  Iyu wangumika vipilala venivi pakhondi la nyumba yakusopiyamu.*+ Chipilala chimoza wanguchimika kumaryi* ndipu wanguchipaska zina lakuti Yakini,* chinyaki wanguchimika kumazge,* ndipu wanguchipaska zina lakuti Bowazi.*+ 22  Vipilala ivi vawonekanga nge luŵa pachanya. Ntchitu yakupanga vipilala yingumaliya penapa. 23  Pavuli paki wangupanga Nyanja yachisulu* chakusongono.+ Nyanja iyi yenga yakuzunguliya, ndipu kutuwa sirya linyaki la mulomu waki kufika sirya linyaki penga mamita pafufupi nganayi* kweniso yenga mamita pafufupi ngaŵi* kutuwa pasi kufika pachanya. Kupima Nyanja yeniyi mwakuzunguliya, yakwananga chingwi chakupimiya cha mamita pafufupi 13.*+ 24  Kuzunguliya mumphata mosi mwa mulomu waki, mwenga vakutowese vakuwoneka nge mphonda.*+ Pa kachigaŵa ka masentimita pafufupi 45,* pajanga mphonda 10. Mphonda zenizi zenga mumizeri yiŵi ndipu wanguziwumbiya kumoza ndi Nyanja yo. 25  Nyanja iyi anguyijalika pachanya pa ng’ombi zinthulumi 12.+ Zitatu zingulereska kunkhondi,* zitatu zingulereska kuzambwi,* zitatu zingulereska kumwera ndipu zinyaki zitatu zingulereska kuvuma.* Nyanja anguyijalika pachanya pa ng’ombi zenizi, ndipu michiya ya ng’ombi zosi, yingulazgiya mukati. 26  Ukhomi wa chisulu cha Nyanja iyi wenga masentimita pafufupi 7.* Mulomu waki wenga nge mulomu wa kapu, ndipu wenga wakupambanuka nge luŵa. Mu Nyanja iyi mwaserenga maji ngakukwana mabati 2,000.* 27  Pavuli paki wangupanga vakupingapu 10+ vamkuŵa.* Chakupingapu chechosi chenga mamita pafufupi ngaŵi* mu utali, mamita pafufupi ngaŵi mu usani kweniso pafufupi mita yimoza* kutuwa pasi kufika pachanya. 28  Vakupingapu venivi wanguvipanga viyo: Mumphepeti wanguŵikamu timabokosi to wangutiphatika pakati pa visulu vo vingupinjikana. 29  Pa timabokosi teniti to wangutiphatika pakati pa visulu vakupinjikana, pangujambulika nkharamu,+ ng’ombi zinthulumi, kweniso akerubi.+ Vithuzi venivi vingujambulika so pavisulu vo vingupinjikana. Pachanya kweniso pasi pa vithuzi va nkharamu ndi ng’ombi zinthulumi, pangujambulika maluŵa. 30  Chakupingapu chechosi chenga ndi mateyala nganayi ngamkuŵa mumakona kweniso chenga ndi masipindulu ngamkuŵa. Mumakona ngaki nganayi mwenga vinthu vo venga nge ntchindamilu. Kusi kwa beseni kwenga vinthu vo vawovyanga kuti beseni lileki kundengandenga, ndipu mumphepeti mwa vinthu venivi mungujambulika maluŵa. 31  Mulomu wa beseni ili wenga mukati mwa mkomberu, ndipu kutuwa pasi pa beseni kufika po mkomberu wayambiyanga penga masentimita pafufupi 45.* Mulomu waki wenga wakuzunguliya ndipu beseni ili lenga litali masentimita pafufupi 67.* Mumphepeti mwa mulomu mungujambulika vakutowese. Timabokosi to tinguŵikika mumphepeti mwaki tenga takuzunguliya cha, kweni tenga takuyanana vigaŵa vosi vinayi. 32  Mateyala nganayi ngenga kusi kwa timabokosi to wanguphatika mumphepeti, ndipu vinthu vo wangumangiriyaku mateyala wangupangiya kumoza ndi chakupingapu. Teyala lelosi lenga litali masentimita pafufupi 67. 33  Mateyala ngenanga, ngangupangika nge mateyala nga galeta. Vinthu vo angumangiriyaku mateyala yanga, marimu* ngaki, masipoku kweniso mahabu, venga vavisulu. 34  Chakupingapu chechosi chenga ndi vinthu vinayi vakumangiriyaku mateyala, ndipu chechosi chenga pakona limoza. Vinthu vakumangiriyaku mateyala venivi vingupangikiya kumoza* ndi chakupingapu. 35  Pachanya pa chakupingapu penga chibandi chakuzunguliya, cho chenga masentimita pafufupi 22 kutuwa pasi kufika pachanya. Pachanya pa chakupingapu, mafulemu ngaki kweniso timabokosi to anguŵika mumphepeti, vingupangikiya kumoza* ndi chakupingapu. 36  Pamafulemu kweniso patimabokosi to tinguŵikika mumphepeti, iyu wangujambulapu akerubi, nkharamu ndipuso vimiti va kantchindi mwakukoliyana ndi usani waki. Wangujambula so maluŵa kuzunguliza chakupingapu chosi.+ 37  Viyo ndimu wangupangiya vakupingapu vosi 10.+ Vosi venga vakuyanana,+ ukulu waki kweniso kawonekeru vayanananga. 38  Iyu wangupanga mabeseni 10 ngamkuŵa,+ ndipu beseni lelosi mwaserenga maji ngakukwana mabati 40. Beseni lelosi lenga mamita pafufupi ngaŵi.* Chakupingapu chechosi chenga ndi beseni laki. 39  Pavuli paki wanguŵika vakupingapu vinkhondi kumaryi kwa nyumba, kweniso vinyaki vinkhondi kumazge kwa nyumba. Nyanja wanguyiŵika kumaryi kwa nyumba, kulazgiya kumwera chakuvuma.*+ 40  Hiramu+ wangupanga so mabeseni, mafosholu+ ndi mbali zabakuli.+ Mwaviyo, Hiramu wangumaliza ntchitu yosi yo wagwiriyanga Fumu Solomoni panyumba yaku Yehova.+ Iyu wangupanga: 41  vipilala viŵi+ kweniso mitu yiŵi yo yawonekanga nge mbali zabakuli yo yinguŵikika pachanya pa vipilala viŵi; vilepa viŵi vakulukanalukana+ vo vingubenekere mitu yiŵi yo yawonekanga nge mbali zabakuli, yo yenga pachanya pa vipilala; 42  vipasu 400 va pomegiraneti*+ vo wanguviŵika pa vilepa viŵi vakulukanalukana, pachilepa chechosi penga mizeri yiŵi ya mapomegiraneti, ndipu vipasu venivi vajalanga mitu yiŵi yo yawonekanga nge mbali zabakuli yo yenga pachanya pa vipilala viŵi; 43  vakupingapu 10+ kweniso mabeseni 10+ ngo ngenga pachanya pa vakupingapu; 44  Nyanja+ kweniso ng’ombi zinthulumi 12 zo angujalikapu Nyanja; 45  vakuyole vyotu, mafosholu, mbali zabakuli kweniso viyaŵi vosi vo Hiramu wangupanga mwakugwiriskiya ntchitu mkuŵa wamampha ukongwa. Iyu wangupangiya Fumu Solomoni vinthu venivi kuti vigwirengi ntchitu panyumba yaku Yehova. 46  Fumu yinguwumba vinthu venivi muvikomboli vadongu muchigaŵa cha Yorodani pakati pa Sukoti ndi Zaretani. 47  Solomoni wangupima cha uzitu wa viyaŵi vosi, chifukwa vengapu vinandi ukongwa. Mwaviyo uzitu wa mkuŵa wo angugwiriskiya ntchitu unguziŵika cha.+ 48  Viyaŵi vosi va panyumba yaku Yehova vo Solomoni wangupanga ndi ivi: Guŵa la sembi+ lagolidi; thebulu lagolidi+ lo aŵikangapu viŵandi vakulongo;* 49  vakuŵikapu nyali+ vagolidi chayiyu, vinkhondi kumaryi, vinyaki vinkhondi kumazge pafupi ndi chipinda chamukati ukongwa; kweniso maluŵa,+ nyali, vakuŵaniya, vosi venivi venga vagolidi;+ 50  mabeseni, vakuzimwiya nyali,+ mbali zabakuli, makapu+ ndi vakupaliya motu,+ vosi venivi venga vagolidi chayiyu; vinthu vo angujinthamu visasa va nyumba yamukati+ kung’anamuwa Malu Ngakupaturika Ukongwa, kweniso vo angujinthamu visasa va nyumba yakusopiyamu,+ vosi venivi venga vagolidi. 51  Mwaviyo, Fumu Solomoni yingumaliza ntchitu yosi yo yakhumbikanga kugwira panyumba yaku Yehova. Pavuli paki Solomoni wanguto vinthu vo awisi a Davidi anguvitowesa,+ ndipu wanguza navu munyumba yaku Yehova.+ Wanguŵika so siliva, golidi kweniso vinthu vinyaki muvipinda vakusungamu chuma munyumba yeniyi.

Mazu Ngam'mphata

Mazu ngaki chayingu, “manja 100 mu utali, manja 50 mu usani kweniso manja 30 kutuwa pasi kufika kuchanya.” Janja limoza layanananga ndi masentimita 44.5. Wonani Fundu Zakukumaliya B14.
Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
Pamwenga kuti, “ngo vigaŵa viŵi venga vakuyanana ndipuso vigaŵa vinyaki viŵi venga vakuyanana.”
Pamwenga kuti, “Khondi la.”
Pamwenga kuti, “Khondi la.”
Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
Pamwenga kuti, “nyumba yachifumu.”
Mazu ngaki chayingu, “nyumba ya Holu.”
Mazu ngaki chayingu, “manja 10.”
Mazu ngaki chayingu, “manja 8.”
Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
Mazu ngaki chayingu, “manja 18.”
Mazu ngaki chayingu, “manja 12.”
Mazu ngaki chayingu, “manja ngankhondi.”
Anyaki atividana kuti vingoma vachizungu, chifukwa chakuti nje zaki ziwoneka nge vingoma.
Mazu ngaki chayingu, “manja ngaŵi.”
Anyaki atividana kuti vingoma vachizungu, chifukwa chakuti nje zaki ziwoneka nge vingoma.
Yapa pang’anamuwa Malu Ngakupaturika.
Pamwenga kuti, “chakumwera.”
Kung’anamuwa kuti, “Iyu [Yehova] Wajalikiski Mwakukho.”
Pamwenga kuti, “chakumpotu.”
Panyaki kung’anamuwa kuti, “Mwanthazi.”
Pamwenga kuti, “chakusungamu maji chachisulu.”
Mazu ngaki chayingu, “manja 10.”
Mazu ngaki chayingu, “manja 5.”
Mazu ngaki chayingu, “manja 30.”
Anyaki akamba kuti mungu.
Mazu ngaki chayingu, “janja limoza.”
Anyaki akamba kuti, “kumpotu.”
Pamwenga kuti, “ko kuselere lumwi.”
Pamwenga kuti, “ko kutuliya lumwi.”
Mazu ngaki chayingu, “chikufi chimoza.” Chikufi chimoza chenga masentimita pafufupi 7.4. Wonani Fundu Zakukumaliya B14.
Bati yimoza yakwananga malita 22. Wonani Fundu Zakukumaliya B14.
Pamwenga kuti, “ngolu 10 zamkuŵa za maji.”
Mazu ngaki chayingu, “manja nganayi.”
Mazu ngaki chayingu, “manja ngatatu.”
Mazu ngaki chayingu, “janja limoza ndi hafu.”
Mazu ngaki chayingu, “janja limoza ndi hafu.”
Pamwenga kuti, “chingelengeri.”
Pamwenga kuti, “venga chinthu chimoza.”
Pamwenga kuti, “venga chinthu chimoza.”
Mazu ngaki chayingu, “manja nganayi.”
Pamwenga kuti, “cha ko kutuliya lumwi.”
Anyaki atividana kuti vingoma vachizungu, chifukwa chakuti nje zaki ziwoneka nge vingoma.