Yuda 1:1-25

  • Moni (1, 2)

  • Asambizi aboza azamuyeruzgika nadi (3-16)

    • Mikayeli ndi Dyaboli apambana maŵanaŵanu (9)

    • Uchimi waku Enoki (14, 15)

  • Lutirizgani kuchita vinthu vo vingawovya kuti Chiuta wakuyanjeningi (17-23)

  • Chiuta ngwakwenere unkhankhu (24, 25)

 Ini Yuda kapolu waku Yesu Khristu, kweniso mvurwa waku Yakobe, ndilembe akudanika, wo atanjika ndi Chiuta Awusefwi ndipuso wo asungika chifukwa mbabali aku Yesu Khristu kuti:  Lisungu, chimangu ndipuso chanju vakutuliya kwaku Chiuta visazgikiyeku kwaku yimwi.  Akwanjiwa, chinanga kuti ndinguyesesa kukulembiyani vakukwaskana ndi utaski wo tosi tenawu, ndawona kuti nkhwakwenere kukuchiskani kuti muyesesi kufwiyapu kuti muvikiliyi chivwanu cho chikuperekeka kamoza pe mbwenu mpaka muyaya kwa akupaturika.  Ndakamba ivi, chifukwa ŵanthu anyaki asere mwachisisi mukati mwinu, wo Malemba ngakukambiya limu kuti Chiuta wazakuŵayeruzga. Ŵanthu ŵenaŵa atopa Chiuta cha ndipu asaniriyapu mwaŵi pa wezi ukulu waku Chiuta widu kuti achitengi jalidu liheni mwambula soni* ndipuso akana Ambuyafwi Yesu Khristu.  Chinanga kuti mutiviziŵa umampha vosi ivi, kweni ndikhumba kukukumbusani kuti Yehova wati wataska ŵanthu ŵaki ku Ijipiti, pavuli paki wangunanga wo ŵengavi chivwanu.  Angelu wo anguleka kusunga malu ngawu ngakwamba, kweni akusiya malu ngo ajangaku, wakuŵamanga ndi simbi ndi kuŵajaliya kwamuyaya mu mdima wakuti bii* kuti aziyeruzgiki pa zuŵa likulu.  Mwakuyanana ŵaka, ŵanthu a ku Sodomu ndi Gomora kweniso ŵanthu a mumatawuni ngapafupi nawu, achitanga mwakujumphiska malusu ngaheni ngakugonana* ndipu afiskanga makhumbiru ngawu ngaheni mu nthowa yachilendu. Yiwu akuyeruzgika ndi cheruzgu cha motu wamuyaya ndipu ŵe nge chakuwoniyapu chakutitcheŵeska.  Chinanga kuti ve viyo, ŵanthu ŵenaŵa mbakwanja malotu, afipiska maliŵavu ngawu, adelera ŵanthu wo ŵe ndi mazaza ndipuso anyoza ŵanthu aunkhankhu.  Kweni chinanga kuti Mikayeli, mura wa angelu wangupambana maŵanaŵanu ndi Dyaboli pa nkhani yakukwaskana ndi thupi laku Mozesi, wangumuyeruzga mwakunyoza cha, kweni wangukamba kuti: “Yehova wakuchenyi.” 10  Kweni ŵanthu ŵenaŵa alongoro mwakunyoza vinthu vosi vo aleka kuvivwisa. Ndipu pa vinthu vosi vo achitiyamu ŵaka mwambula kuŵanaŵana, nge mo zichitiya nyama, atijinanga navu ŵeneku. 11  Soka kwaku yiwu, chifukwa alondo nthowa yaku Kayini ndipu atchimbiriya mu nthowa yakulandizga yaku Balamu kuti asaniyi mphotu, ndipuso ataya maumoyu ngawu chifukwa cha kulongoro vinthu mwakugaruka nge mo wanguchitiya Kora! 12  Yiwu ndi mya yakubisika pasi pa maji asani aturya namwi pa maphwandu ngakulongo kuti mutanjana ngo muchita; mbaliska wo atijiliska kwambula mantha, ŵe nge mitambu yambula maji yo yipingikapingika ndi mphepu; ŵe nge vimiti vo vileka kupasa pa nyengu yaki, vo vafwiya limu* ndipu vachesulika. 13  Yiwu ndi mayiŵa ngakari ngo ngachita phovu ndipu litutumiya kulikumba ndi vinthu vakuchitiska soni, ŵe nge nyenyezi zo zalanda ndipu zazamusungika mu mdima wakuti bii* kwamuyaya. 14  Enoki wamugonezi wa 7 kutuliya paku Adamu, wangukambiya limu vakukwaskana ndi yiwu kuti: “Awonani! Yehova wanguza ndi masawuzandi nganandi nga akupaturika ŵaki 15  kuti waziyeruzgi ŵanthu wosi ndi kuŵasaniya ndi mulandu wosi wo aleka kopa Chiuta chifukwa cha vakuchita vawu viheni vo anguvichita kweniso vinthu vosi viheni vo amukambanga.” 16  Ŵanthu ŵenaŵa mbakwanja kudinginyika kweniso kudandawula vakukwaskana ndi umoyu wawu, alondo makhumbiru ngawu ndipu alongoro mwakujikuzga, alumba ŵanthu ndi chilatu chakuti asaniriyepu kanthu kanyaki. 17  Kweni yimwi akwanjiwa, kumbukani vo vikukambika kali ndi akutumika ŵa Ambuyafwi Yesu Khristu. 18  Yiwu ayanjanga kukukambiyani kuti: “Mu mazuŵa ngakumaliya kwazamuja akunyoza, wo azamuchitanga vinthu vakunyoza Chiuta mwakulondo makhumbiru ngawu.” 19  Ŵanthu ŵenaŵa agawuska ŵanthu, achita vinthu nge nyama ndipu alivi mzimu waku Chiuta. 20  Kweni yimwi akwanjiwa, jizengeni pa chivwanu chinu chakupaturika ukongwa ndipu mupempherengi mwakukoliyana ndi mzimu wakupaturika,* 21  kuti mulutirizgi kuchita vinthu vo vingawovya kuti Chiuta wakuyanjeningi muchilindizga lisungu la Ambuyafwi Yesu Khristu kuti lizikujuliyeni nthowa ya ku umoyu wamuyaya. 22  Kweniso lutirizgani kuŵalongo lisungu ŵanthu wo akayikakayika; 23  ataskeni mwakuŵakwamphuwa pamotu. Lutirizgani so kuchitiya lisungu ŵanthu anyaki, kweni muchitengi viyo mwakuphwere, mutinkhengi malaya ngawu ngo ngafipiskika ndi ntchitu zawu ziheni. 24  Sonu, kwaku Chiuta yo wangakuvikiliyani kuti muleki kuguŵa kweniso yo wangakuwovyani kuti muje ambula kalema pa masu pa unkhankhu waki* kweniso kuti musaniyi likondwa likulu, 25  kwaku iyu pe Mtaski widu kuporote mwaku Yesu Khristu Ambuyafwi, kuŵi unkhankhu, thumbiku, nthazi ndipuso mazaza, kutuliya kali, sonu mpaka muyaya. Ame.

Mazu Ngam'mphata

Mu Chigiriki, a·selʹgei·a. Wonani Mazu ngo Ngakonkhoskeka.
Pamwenga kuti, “mu mdima wamunkhorwi.”
Wonani Mazu ngo Ngakonkhoskeka.
Mazu ngaki chayingu, “vafwa kaŵi.”
Pamwenga kuti, “mu mdima wamunkhorwi.”
Mazu ngaki chayingu, “mzimu.”
Pamwenga kuti, “pakuwoneke kwaki mu unkhankhu.”