Yohane 9:1-41

  • Yesu wachizga wachibulumutiya (1-12)

  • Afarisi afumba munthu yo wanguchizgika (13-34)

  • Uchibulumutiya wa Afarisi (35-41)

9  Wachiyenda munthowa wanguwona munthu yo chiwiyi wenga wachibulumutiya.  Ndipu akusambira ŵaki angumufumba kuti: “Rabi, kumbi ndiyani yo wakubuda kuti munthu uyu wawi wachibulumutiya, ndiyu pamwenga apapi ŵaki?”  Yesu wangumuka kuti: “Ndi munthu uyu cha pamwenga apapi ŵaki, kweni venga viyo kuti ntchitu zaku Chiuta ziwoneke mwaku iyu.  Ntchitu zaku Yo wakundituma titenere kuzigwira kweche msana, pakuti usiku utuza po kwazamuŵavi munthu wakugwira ntchitu.  Penipo ini ndeche mucharu, ndini ukweru wa charu.”  Wati wakamba venivi, wangufunya mata pasi, wangukasa dongu ndi mata ngo ndipu wangulinyeteka mumasu nga munthu yo.  Iyu wangumukambiya kuti: “Luta ukasambi muthaŵali la Silowamu” (kung’anamuwa kuti “Kutumika”). Iyu wanguluta kuchisamba ndipu wanguweku wayamba kuwona.  Pavuli paki ŵanthu wo wajanga nawu kufupi kweniso wo kali amuwonanga wachipemphesa, angwamba kukamba kuti: “Asi munthu uyu ndiyu wayanjanga kuja pasi ndi kupemphesa?”  Anyaki akambanga kuti: “Ndiyu.” Kweni anyaki akambanga kuti: “Awa, wakozgana ŵaka nayu.” Munthu yo wakambanga kuti: “Ndini.” 10  Sonu angumufumba kuti: “Sonu vayenda wuli kuti masu ngaku ngabanuki?” 11  Iyu wangumuka kuti: “Munthu munyaki yo wadanika kuti Yesu wakasa dongu ndi kulinyeteka mumasu ngangu ndipu wandikambiya kuti, ‘Luta kuthaŵali la Silowamu ukasambi.’ Mwaviyo ndinguluta kuchisamba ndipu ndayamba kuwona.” 12  Wati wakamba venivi, angumukambiya kuti: “We pani munthu mweniyo?” Iyu wangukamba kuti: “Ndiziŵa cha.” 13  Ndipu munthu yo kali wenga wachibulumutiya, anguluta nayu kwa Afarisi. 14  Vinguchitika kuti zuŵa lo Yesu wangukasiya dongu ndi kubanuwa masu nga munthu yo, lenga la Sabata. 15  Sonu pa nyengu iyi, Afarisi nawu angwamba kumufumba vo vinguchitika kuti wayambi kuwona. Iyu wanguŵamuka kuti: “Wandinyeteka dongu lakukasa mumasu, ndasamba ndipu ndayamba kuwona.” 16  Anyaki mwa Afarisi angwamba kukamba kuti: “Munthu uyu ngwakutuliya kwaku Chiuta cha, chifukwa wasunga cha Sabata.” Anyaki akambanga kuti: “Kumbi munthu wakubuda, wangachita visimikizu nge ivi?” Mwaviyo angugaŵikana ŵijaŵija. 17  Ndipu angufumba so munthu yo wenga wachibulumutiya kuti: “Sonu yiwi utiti wuli vakukwaskana ndi munthu uyu, pakuti wabanuwa masu ngaku?” Munthu yo wangukamba kuti: “Ndi mchimi.” 18  Kweni Ayuda angugomezga mbwenu cha kuti munthu yo, wenga wachibulumutiya kweniso kuti sonu wayamba kuwona, mpaka po angudaniya apapi a munthu yo sonu wawonanga. 19  Ndipu anguŵafumba kuti: “Kumbi uyu ndi mwana winu yo mukamba kuti wanguwa wachibulumutiya? Sonu vaŵa wuli kuti wayambi kuwona?” 20  Apapi ŵaki angumuka kuti: “Tiziŵa kuti iyu ndi mwana widu kweniso kuti wanguwa wachibulumutiya. 21  Kweni tiziŵa cha vo vachitika kuti wayambi kuwona. Yo wamubanuwa masu, isi titimuziŵa cha. Mufumbeni, ndi mura. Wakambengi yija.” 22  Apapi ŵaki angukamba venivi chifukwa awopanga Ayuda. Pakuti Ayuda angukoliyana kuti munthu weyosi yo wazomereza kuti Yesu ndi Khristu, munthu mweniyo watenere kusezgeka musinagogi. 23  Ndichu chifukwa chaki apapi ŵaki angukamba kuti: “Ndi mura, mufumbeni.” 24  Munthu yo wenga wachibulumutiya, angumudana so kachiŵi ndipu angumukambiya kuti: “Kankhuska Chiuta. Isi tiziŵa kuti munthu uyu ngwakubuda.” 25  Iyu wangumuka kuti: “Kwali ngwakubuda, ini ndiziŵa cha. Cho ini ndiziŵa ntchakuti ndawonanga cha, kweni sonu ndiwona.” 26  Pavuli paki angumukambiya kuti: “Wachitanji nawi? Wabanuwa wuli masu ngaku?” 27  Iyu wanguŵamuka kuti: “Ndakukambiyani kali kweni mutuvwa cha. Mukhumba kuvwanji so? Kumbi namwi mukhumba kuja akusambira ŵaki?” 28  Wati wakamba venivi, angumunyoza kuti: “Yiwi ndiwi wakusambira wa munthu mweniyo, kweni isi te akusambira aku Mozesi. 29  Tiziŵa kuti Chiuta wangulongoro ndi Mozesi, kweni munthu uyu tiziŵaku cha ko wakutuliya.” 30  Munthu yo wanguŵamuka kuti: “Vakuziziswa limu kuti muziŵaku cha ko wakutuliya, kweni munthu yo, wabanuwa masu ngangu. 31  Tiziŵa kuti Chiuta watiŵavwisiya cha ŵanthu akubuda, kweni asani munthu watopa Chiuta ndi kuchita khumbu laki, mweniyo ndiyu watimuvwisiya. 32  Chijaliyi techendavwepu kuti munthu munyaki wabanuwa masu nga munthu yo wanguwa wachibulumutiya. 33  Asani munthu uyu wangutuliya kwaku Chiuta cha, watingi wachitengi kanthu cha.” 34  Yiwu angumumuka kuti: “Wamunthu wakuti ukuwiya mu ubudi pe, mbwenu ungatisambiza?” Ndipu angumutuzgiya kubwalu. 35  Yesu wanguvwa kuti amutuzgiya kubwalu ndipu wati wamusaniya wangumukambiya kuti: “Kumbi we ndi chivwanu mu Mwana wa munthu?” 36  Munthu yo wangumuka kuti: “Munthu yo ndiyani ada, kuti nani ndije ndi chivwanu mwaku iyu?” 37  Yesu wangumukambiya kuti: “Wamuwona, ndipu ndi mweniyo walongoro nawi.” 38  Iyu wangukamba kuti: “Ambuya, ndavwana mwaku iyu.” Ndipu munthu yo wangumugwadiya. 39  Pavuli paki Yesu wangukamba kuti: “Chifukwa cheruzgu cho ndikuziya mucharu ndi ichi, kuti ŵanthu wo aleka kuwona, awoni ndipuso kuti wo awona, aje achibulumutiya.” 40  Anyaki mwa Afarisi wo ŵenga pafupi, anguvwa venivi ndipu angukamba kuti: “Isi nasi te achibulumutiya?” 41  Yesu wanguŵakambiya kuti: “Asani mwenga achibulumutiya, mwatingi muŵengevi ubudi. Kweni sonu mukamba kuti, ‘Tiwona.’ Ubudi winu umalengi cha.”

Mazu Ngam'mphata