Yohane 6:1-71

  • Yesu waryisa anthulumi 5,000 (1-15)

  • Yesu watenda pamaji (16-21)

  • Yesu ndiyu “chiŵandi chakupaska umoyu” (22-59)

  • Ŵanthu anandi aguŵa chifukwa cha mazu ngaku Yesu (60-71)

6  Pavuli paki Yesu wanguluta kusirya linyaki la Nyanja ya Galileya pamwenga kuti Nyanja ya Tiberiya.  Ndipu chigulu cha ŵanthu chamulondonga chifukwa chawonanga visimikizu vakuziziswa vo wachitanga pakuchizga ŵanthu.  Yesu wanguluta paphiri ndipu wanguja pasi penipo ndi akusambira ŵaki.  Sonu phwandu la Ayuda la Pasika lenga pafupi kuchitika.  Yesu wati wayunuka ndi kuwona chigulu cha ŵanthu cho chazanga kwaku iyu, wangufumba Filipu kuti: “Tamugula nunkhu viŵandi vakuryisa ŵanthu yaŵa?”  Kweni wakambanga venivi kuti wamuyesi chifukwa waziŵanga vo wakhumbanga kuchita.  Filipu wangumuka kuti: “Chinanga ndi viŵandi vakukwana madinari 200, vingakwanapu cha ŵanthu wosi yaŵa chinanga nkhamanavi.”  Yumoza wa akusambira ŵaki, Andireya mvurwa waku Simoni Peturo, wangukambiya Yesu kuti:  “Panu pe kamnyamata ko ke ndi viŵandi vinkhondi vabalire ndi tisomba tiŵi. Kweni ndivu vingachitanji pa chigulu chosi ichi?” 10  Yesu wangukamba kuti: “Akambiyeni ŵanthu kuti aje pasi.” Pakuti penga uteka unandi pamalu ngeningo, ŵanthu wo anguja pasi ndipu ŵengapu anthulumi pafufupi 5000. 11  Yesu wanguto viŵandi ndipu wati wawonga Chiuta, wangugaŵiya ŵanthu wo anguja penipo. Wanguchita so viyo ndi tisomba ndipu wosi angulonde vakuti viŵakwani. 12  Kweni ŵanthu wosi ŵati aguta, Yesu wangukambiya akusambira ŵaki kuti: “Wunjikani vibanthu vakujaku kuti kanthu kekosi kaleki kutayika.” 13  Sonu anguviwunjika pamoza ndipu vinguzaza masokola 12. Vibanthu ivi venga vo ŵanthu wo anguryaku viŵandi vinkhondi vabalire, angusiya. 14  Ŵanthu ŵati awona chisimikizu cho wanguchita angukamba kuti: “Uyu ndi Mchimi nadi yo wangukambikiya limu kuti wazengi pacharu chapasi.” 15  Sonu Yesu wati waziŵa kuti akhumba kuzimuko ndi kumuvwalika ufumu, wanguthaŵiya so kuphiri kwakuyija. 16  Kuchifipa, akusambira ŵaki angusikiya kunyanja. 17  Ndipu ŵati akwera boti angulowoke kusirya linyaki la nyanja kuchifika ku Kaperenao. Pa nyengu iyi ndipu kwafipa ukongwa, kweni Yesu wenga kuti wechendafiki kwaku yiwu. 18  Ndipuso nyanja yingwamba kuyuka chifukwa kwaputanga chimphepu. 19  Kweni ŵati avuŵa kwa makilomita pafufupi 5 pamwenga 6,* anguwona Yesu wachiyenda panyanja ndipu wazanga kufupi ndi boti. Yiwu anguchita mantha ukongwa. 20  Kweni iyu wanguŵakambiya kuti: “Ndini, mungawopanga cha!” 21  Angumulonde ndi mtima wosi muboti ndipu panguto nyengu yitali cha mbwenu boti lafika kumutunda ko alutanga. 22  Mawa laki, chigulu cha ŵanthu wo angujaliya kusirya linyaki la nyanja, chinguwona kuti kwengavi boti linyaki lelosi kupatuwaku kaboti kamana pe. Ndipuso ŵanthu wo anguziŵa kuti akusambira ŵaki aluta ŵija, Yesu wakwera nawu cha muboti. 23  Kweni maboti ngakutuliya ku Tiberiya, nganguza pafupi ndi po anguryiya viŵandi Ambuya ŵati awonga kwaku Chiuta. 24  Sonu chigulu cha ŵanthu chati chawona kuti Yesu ndi akusambira ŵaki palivi pamalu ngo, angukwera maboti ngawu ndi kuluta ku Kaperenao kuchipenja Yesu. 25  Ŵati amusaniya kusirya linyaki la nyanja angumufumba kuti: “Rabi, mwaza zuŵanji kunu?” 26  Yesu wanguŵamuka kuti: “Nditikuneneskiyani kuti mutindipenja chifukwa cha visimikizu vo munguwona cha, kweni chifukwa cha viŵandi vo mungurya ndi kuguta. 27  Lekani kugwira ntchitu chifukwa cha chakurya cho chinangika, kweni gwiriyani ntchitu chakurya chambula kumala cho chipaska umoyu wamuyaya. Chakurya chenichi ndichu Mwana wa munthu wakupaskeningi, pakuti ndichu Ada, Chiuta mweneku wakuzomereza mwakuŵikapu chidindu.” 28  Yiwu angumufumba kuti: “Sonu titenere kuchitanji kuti tigwiri ntchitu zaku Chiuta?” 29  Yesu wanguŵamuka kuti: “Iyi ndi ntchitu yaku Chiuta, kuti muje ndi chivwanu mwaku yo wakumutuma.” 30  Pavuli paki angumufumba kuti: “Kumbi muchitengi chisimikizu wuli kuti tichiwoni ndi kukugomezgani? Ndi ntchitu niyi yo muchitengi? 31  Apapi ŵidu akali angurya mana muchipululu nge mo vikulembeke kuti: ‘Wanguŵapaska viŵandi vakutuliya kuchanya kuti ŵaryi.’” 32  Sonu Yesu wanguŵakambiya kuti: “Nditikuneneskiyani, Mozesi wangukupaskani viŵandi vakutuliya kuchanya cha, kweni Ada atikupaskani chiŵandi chayichu chakutuliya kuchanya. 33  Chifukwa mweniyo wasika kutuliya kuchanya ndi kupereka umoyu pacharu chapasi, ndiyu chiŵandi chaku Chiuta.” 34  Sonu angumukambiya kuti: “Ambuya, mutipaskengi chiŵandi chenichi nyengu zosi.” 35  Yesu wanguŵakambiya kuti: “Ini ndini chiŵandi chakupaska umoyu. Weyosi yo watuza kwaku ini wazamuvwapu nja cha, ndipu weyosi yo we ndi chivwanu mwaku ini, wazamuvwapu nyota cha. 36  Kweni nge mo ndakukambiyani kali, ini mwaja muchindiwona kweni mugomezga cha. 37  Ŵanthu wosi wo Ada andipaska, atuza kwaku ini, ndipu weyosi yo watuza kwaku ini ndazakumukanapu cha. 38  Chifukwa ndasika kutuliya kuchanya kuzichita khumbu langu cha, kweni kuzichita khumbu laku yo wakundituma. 39  Khumbu laku yo wakundituma ndakuti ndileki kutayapu weyosi wa ŵanthu wo wandipaska, kweni kuti ndiziŵayuski pa zuŵa lakumaliya. 40  Chifukwa khumbu la Ada ndakuti weyosi yo waziŵa Mwana ndipuso waja ndi chivwanu mwaku iyu walonde umoyu wamuyaya ndipu ndazakumuyuska pa zuŵa lakumaliya.” 41  Pavuli paki, Ayuda angwamba kudinginyika vakukwaskana ndi Yesu chifukwa wangukamba kuti: “Ini ndini chiŵandi chakutuliya kuchanya.” 42  Ndipu angwamba kukamba kuti: “Asi uyu ndi Yesu mwana waku Yosefi yo awisi ndi anyina titiŵaziŵa? Sonu ntchifukwa wuli wakamba kuti, ‘Ndasika kutuliya kuchanya’?” 43  Yesu wanguŵamuka kuti: “Lekani kudinginyika. 44  Palivi munthu yo watuza kwaku ini kwambula kuti Ada wo akundituma amuguza, ndipu ndazakumuyuska pa zuŵa lakumaliya. 45  Kukulembeka mu Vakulemba va Achimi kuti: ‘Wosi azamusambizika ndi Yehova.’ Weyosi yo wavwisiya kwa Ada ndi kusambira, watuza kwaku ini. 46  Palivi munthu yo wakuwonapu Ada, kupatuwaku yumoza pe yo wakutuliya kwaku Chiuta, mwenuyu ndiyu wakuwona Ada. 47  Nditikuneneskiyani kuti weyosi yo wagomezga wazamulonde umoyu wamuyaya. 48  “Ini ndini chiŵandi chakupaska umoyu. 49  Apapi ŵinu akali angurya mana muchipululu kweni akufwa. 50  Ichi ntchiŵandi chakutuliya kuchanya, kuti weyosi yo wangaryaku waleki kufwa. 51  Ini ndini chiŵandi chakupaska umoyu chakutuliya kuchanya. Weyosi yo waturya chiŵandi ichi wazamuja ndi umoyu wamuyaya. Liŵavu langu ndilu chakurya cho ndipereka kuti ŵanthu wosi asaniyi* umoyu.” 52  Sonu Ayuda angwamba kususkana ŵijaŵija kuti: “Munthu uyu wangatipaska wuli liŵavu laki kuti tiryi?” 53  Sonu Yesu wanguŵakambiya kuti: “Nditikuneneskiyani kuti kwambula kuti mwarya liŵavu la Mwana wa munthu ndi kumwa ndopa zaki mwazakuwusaniyapu cha umoyu. 54  Weyosi yo waturya liŵavu langu ndi kumwa ndopa zangu wazamulonde umoyu wamuyaya ndipu ndazakumuyuska pa zuŵa lakumaliya. 55  Pakuti liŵavu langu ntchakurya chayichu ndipu ndopa zangu ntchakumwa chayichu. 56  Weyosi yo waturya liŵavu langu ndi kumwa ndopa zangu, wakoliyana nani ndipu nani ndikoliyana nayu. 57  Nge mo Ada amoyu akunditumiya, ndija ndi umoyu chifukwa cha Ada ndipu weyosi yo waturya ini, wajengi ndi umoyu chifukwa chaku ini. 58  Ichi ntchiŵandi chakutuliya kuchanya. Chiyanana cha ndi cho apapi ŵinu akali angurya ndipu akufwa. Kweni weyosi yo waryaku chiŵandi ichi wazamulonde umoyu wamuyaya.” 59  Iyu wangukamba venivi wachisambiza musinagogi* ku Kaperenao. 60  Anandi mwa akusambira ŵaki ŵati avwa venivi angukamba kuti: “Vo wakamba munthu uyu vakuguŵiska. Ndiyani wangavwa?” 61  Kweni Yesu wati waziŵa kuti akusambira ŵaki adandawula ndi venivi, wanguŵafumba kuti: “Kumbi venivi vakuguŵiskani? 62  Sonu kwe wuli asani mungawona Mwana wa munthu wachikwere ko wenga kali? 63  Mzimu ndiwu upereka umoyu; liŵavu lilivi ntchitu. Vo ndakukambiyani panu, ndivu mzimu kweniso umoyu. 64  Kweni anyaki mwaku yimwi muvwana cha.” Pakuti Yesu wanguziŵa kwamba pakwamba wo azamuleka kuvwana ndipuso yo wazakumupereka. 65  Iyu wangulutirizga kukamba kuti: “Ndichu chifukwa chaki ndakukambiyani kuti palivi munthu yo wangaza kwaku ini kwambula kuti Ada amuzomereza.” 66  Mwaviyo, anandi mwa akusambira ŵaki anguwere ku vinthu vo achitanga kali ndipu anguleka kwenda ndi iyu. 67  Sonu Yesu wangukambiya akutumika 12 kuti: “Kumbi namwi mukhumba kuluta?” 68  Simoni Peturo wangumuka kuti: “Ambuya, tilutengi kwaku yani? Yimwi mwe ndi mazu ngakupaska umoyu wamuyaya. 69  Isi tagomezga kweniso taziŵa kuti yimwi ndimwi Wakupaturika waku Chiuta.” 70  Yesu wanguŵamuka kuti: “Asi ndikusankha yimwi 12? Kweni yumoza waku yimwi ngwakukamba vinthu viheni vakukwaskana ndi anyaki.”* 71  Iyu wakambanga Yudasi mwana waku Simoni wa ku Keriyoti, chifukwa mwenuyu ndiyu watingi wamuperekengi chinanga kuti wenga yumoza wa akutumika 12.

Mazu Ngam'mphata

Mazu ngaki chayingu, “kwa masitadiya pafufupi 25 pamwenga 30.”
Mazu ngaki chayingu, “charu chosi chisaniyi.”
Malu ngo Ayuda awungananga kuti apempheri ndi kuŵerenga Malemba.
Pamwenga kuti, “yumoza waku yimwi ndi dyaboli.”