Yohane 5:1-47

  • Munthu yo watamanga wachizgika pa Betizata (1-18)

  • Yesu wakupaskika udindu ndi Awisi (19-24)

  • Akufwa azamukuvwa mazu ngaku Yesu (25-30)

  • Maukaboni ngakukwaskana ndi Yesu (31-47)

5  Pavuli paki, kwenga phwandu la Ayuda ndipu Yesu wanguluta ku Yerusalemu.  Sonu mu Yerusalemu pa Geti la Mbereri, pe thaŵali lo mu Chiheberi lidanika kuti Betizata, ndipu le ndi makhondi ngankhondi ngavipilala.  Mumakhondi mo mwagonanga chigulu cha ŵanthu akutama, ambula kuwona, vilima, kweniso akufwa* manja ndi malundi.  *——  Kweni penga munthu munyaki yo watamanga kwa vyaka 38.  Yesu wati wawona kuti pagona munthu yo, kweniso chifukwa chakuti wanguziŵa kuti waja wachitama kwa nyengu yitali, wangumufumba kuti: “Kumbi ukhumba kuchira?”  Munthu wakutama yo wangumuka kuti: “Ada, ndilivi munthu wakuti wandibizgi muthaŵali umu asani maji ngavunduka. Kweni asani ndiluta kuti nkhabiremu, mbwenu munyaki wadanjiyapu.”  Yesu wangumukambiya kuti: “Soka, nyamuwa mphasa zaku,* lutanga.”  Munthu yo wanguchira nyengu yeniyo ndipu wangunyamuwa mphasa zaki* ndi kwamba kwenda. Zuŵa lenili lenga la Sabata. 10  Sonu Ayuda angwamba kukambiya munthu yo wanguchizgika kuti: “Ili ndi zuŵa la Sabata ndipu ntchakwenere cha kuti unyamuwi mphasa.”* 11  Kweni iyu wanguŵamuka kuti: “Munthu yo wandichizga ndiyu wandikambiya kuti, ‘Nyamuwa mphasa zaku,* lutanga.’” 12  Yiwu angumufumba kuti: “Ndiyani mweniyo wakukambiya kuti, ‘Zinyamuwi, lutanga’?” 13  Kweni munthu yo wanguziŵa cha kuti ndiyani wamuchizga, pakuti Yesu wangunyeremukapu ndi kusere muchigulu cha ŵanthu cho chenga penipo. 14  Venivi vati vachitika, Yesu wangusaniya munthu yo munyumba yakusopiyamu ndipu wangumukambiya kuti: “Awona, wachira. Ungachitanga so ubudi cha, kuti chinthu chinyaki chiheni ukongwa kuluska nthenda yaku chileki kukuchitikiya.” 15  Munthu yo wangutuwamu ndi kuluta kuchikambiya Ayuda kuti ndi Yesu yo wamuchizga. 16  Ivi vinguchitiska kuti Ayuda asuzgi Yesu, chifukwa wanguchita vinthu venivi pa zuŵa la Sabata. 17  Kweni iyu wanguŵamuka kuti: “Ada ŵeche kugwira ntchitu mpaka sonu, ndipu ini nani ndilutirizga kugwira ntchitu.” 18  Mwaviyo, Ayuda akhumbisiskanga kumubaya, pakuti wagwiranga ntchitu pa zuŵa la Sabata kweniso wakambanga kuti Chiuta Mbawisi, kung’anamuwa kuti wayanana ndi Chiuta. 19  Sonu Yesu wanguŵamuka kuti: “Nditikuneneskiyani kuti Mwana wangachita cha kanthu kekosi pakuyija, kweni wachita vo wawona Awisi achichita. Chifukwa vinthu vo Yiwu achita, Mwana nayu wachita so venivo. 20  Chifukwa Ada atanja Mwana, ndipu atimulongo vinthu vosi vo yiwu achita, kweniso azakumulongo ntchitu zikulu ukongwa kuluska izi, kuti muzizizwi. 21  Chifukwa nge mo Ada ayuskiya akufwa ndi kuŵapaska umoyu, Mwana nayu wapereka umoyu ku munthu weyosi yo iyu wakhumba. 22  Pakuti Ada ayeruzga munthu weyosi cha, kweni udindu wa kuyeruzga apaska Mwana, 23  kuti ŵanthu wosi atumbiki Mwana nge mo atumbikiya Ada. Weyosi yo waleka kutumbika Mwana, ndikuti watiŵatumbika cha Ada wo akumutuma. 24  Nditikuneneskiyani kuti weyosi yo watuvwa mazu ngangu ndi kugomezga Yo wakundituma, we ndi umoyu wamuyaya. Iyu wayeruzgika cha, kweni wajumpha nyifwa ndipu wayambukiya ku umoyu wamuyaya. 25  “Nditikuneneskiyani kuti nyengu yituza ndipu njeniyinu, penipo akufwa azamukuvwa mazu nga Mwana waku Chiuta, ndipu wo avwisiya azamuja ndi umoyu. 26  Nge mo Ada aliri ndi nthazi zakupereke* umoyu, Mwana nayu amupaska nthazi zakuti waperekengi umoyu. 27  Ndipu amupaska udindu wa kuyeruzga, chifukwa ndi Mwana wa munthu. 28  Mungazizwanga cha ndi venivi, chifukwa nyengu yituza yeniyo ŵanthu wosi wo ŵe mumiwunda yachikumbusu, azamukuvwa mazu ngaki 29  ndipu azamutuwamu. Wo anguchita vinthu vamampha azamuyuka kuti alonde umoyu, kweni wo anguchita vinthu viheni azamuyuka kuti ayeruzgiki. 30  Ndingachita cha kanthu kekosi pakundija. Ndiyeruzga nge mo ndavwiya ndipu cheruzgu changu ntchaurunji, chifukwa ndichita khumbu langu cha, kweni laku yo wakundituma. 31  “Asani nditijipereke ukaboni wakukwaskana ndi ndamweni, mbwenu ukaboni wangu ngwauneneska cha. 32  Walipu munyaki yo wapereka ukaboni wakukwaskana ndi ini, ndipu ndiziŵa kuti ukaboni wakukwaskana ndi ini wo iyu wapereka, ngwauneneska. 33  Mungutuma ŵanthu kwaku Yohane ndipu iyu wangupereka ukaboni wauneneska. 34  Kweni ndithemba munthu cha kuti ndiyu wandipereke ukaboni, kweni ndikamba vinthu venivi kuti yimwi mutaskiki. 35  Yohane wenga nyali yakukole ndipuso yakuŵala ndipu kwa nyengu yimanavi, mwakhumbisiskanga kukondwa ukongwa ndi ukweru waki. 36  Chifukwa ndipereka ukaboni ukulu ukongwa kuluska waku Yohane, pakuti ntchitu zo Ada akundipaska kuti ndifiski, ntchitu zenizi zo ndichita ndizu zipereka ukaboni wakuti Ada ndiwu akundituma. 37  Ndipu Ada wo akundituma, akupereka ukaboni wakukwaskana ndi ini. Yimwi mwechendavwepu mazu ngawu chijaliyi, ndipuso mwechendawonepu chisku chawu. 38  Ndipu mwaku yimwi mulivi mazu ngawu, chifukwa mutimugomezga cha yo akutuma. 39  “Mufufuza Malemba pakuti muŵanaŵana kuti mwazamulonde umoyu wamuyaya chifukwa cha Malemba ngo, ndipu yingu* ngapereka ukaboni wakukwaskana ndi ini. 40  Kweni mukhumba cha kuza kwaku ini kuti mulonde umoyu. 41  Ndizomera cha unkhankhu wakutuliya ku ŵanthu, 42  kweni ndiziŵa umampha kuti mutimuyanja cha Chiuta. 43  Ini ndaza mu zina la Ada kweni yimwi mutindilonde cha. Kweni asani munthu munyaki wanguza mu zina laki, mwatingi mumulondiyengi. 44  Kumbi mungagomezga wuli pakuti mupaskana unkhankhu mwijamwija, kweni unkhankhu wakutuliya kwaku Chiuta yija, mutiwupenja cha? 45  Mungaŵanaŵananga cha kuti ndakukukambani kwa Ada, kweni walipu munthu yo watikukambani. Munthu mwenuyu ndi Mozesi yo mutimuthemba. 46  Ndipu asani Mozesi mungumugomezga, nani mwatingi mundigomezgengi, chifukwa iyu wakulemba vakukwaskana ndi ini. 47  Kweni asani muleka kugomezga vo wakulemba, mungagomezga wuli vo ini ndikamba?”

Mazu Ngam'mphata

Pamwenga kuti, “akupunduka.”
Wonani mazu ngamumphata pa Mateyu 17:21.
Pamwenga kuti, “bedi laku.”
Pamwenga kuti, “bedi laki.”
Pamwenga kuti, “bedi.”
Pamwenga kuti, “bedi laku.”
Pamwenga kuti, “ndi mphasu ya.”
Kung’anamuwa kuti, Malemba.