Yohane 3:1-36

  • Yesu ndi Nikodimu (1-21)

    • Kubalika so (3-8)

    • Chiuta wakwanja charu (16)

  • Yohane wapereka ukaboni wakukwaskana ndi Yesu kakumaliya (22-30)

  • Munthu wakutuliya kuchanya (31-36)

3  Kwenga Mfarisi munyaki yo wadanikanga kuti Nikodimu ndipu wenga mulongozgi wa Ayuda.  Iyu wanguza kwaku Yesu ndi usiku, ndipu wangumukambiya kuti: “Rabi, tiziŵa kuti ndimwi msambizi wakutuliya kwaku Chiuta, chifukwa palivi munthu yo wangachita visimikizu vo muchita kwambula kuti Chiuta wenayu.”  Yesu wangumuka kuti: “Nditikuneneske kuti palivi munthu yo wangawona Ufumu waku Chiuta kwambula kuti wabalika so.”*  Nikodimu wangumufumba kuti: “Kumbi munthu mura kali wangabalika so wuli? Kumbi wangasere mumoyu mwa anyina kachiŵi ndi kubalika so?”  Yesu wangumumuka kuti: “Nditikuneneske, munthu wangasere cha mu Ufumu waku Chiuta kwambula kuti wabalika ndi maji kweniso mzimu.  Cho chabalika kutuliya ku liŵavu, ntchaliŵavu, ndipu cho chabalika kutuliya ku mzimu, ntchamzimu.  Ungazizwanga cha chifukwa ndakukambiya kuti: Mwaŵanthu yimwi, mutenere kubalika so.  Mphepu yiputiya ko yakhumba ndipu mutuvwa chiwawa chaki, kweni muziŵa cha ko yatuliya ndi ko yiluta, ndimu so viliri ndi weyosi yo wabalika kutuliya ku mzimu.”  Ndipu Nikodimu wangukamba kuti: “Kumbi vinthu venivi vingachitika wuli?” 10  Yesu wangumuka kuti: “Asi yiwi we msambizi wa Ayisirayeli, sonu utondeka wuli kuziŵa vinthu venivi? 11  Nditikuneneske kuti tikamba vo tavwa ndipu tipereka ukaboni pa vinthu vo tawona, kweni mulonde cha ukaboni wo tipereka. 12  Asani muleka kugomezga vinthu vapacharu chapasi vo ndakukambiyani, mungagomezga wuli asani ndingakukambiyani vinthu vakuchanya? 13  Ndipuso palivi munthu yo wakukwerapu kuchanya, kweni Mwana wa munthu pe, mweniyo wakusika kutuwa kuchanya. 14  Ndipu nge mo Mozesi wangusoske njoka muchipululu, ndimu so Mwana wa munthu wasoskekiyengi, 15  kuti weyosi yo wavwana mwaku iyu waje ndi umoyu wamuyaya. 16  “Pakuti Chiuta wakuchiyanja ukongwa charu, mwakuti wakupereka Mwana waki wapade, kuti weyosi wakuvwana mwaku iyu waleki kunangika, kweni waje ndi umoyu wamuyaya. 17  Chifukwa Chiuta wangutuma Mwana waki mucharu kuti waziyeruzgi charu cha, kweni kuti charu chitaskiki kuporote mwaku iyu. 18  Weyosi yo wavwana mwaku iyu, watenere cha kuyeruzgika. Weyosi yo waleka kuvwana mwaku iyu, wayeruzgika kali, chifukwa wavwana cha mu zina la Mwana wapade waku Chiuta. 19  Sonu chifukwa chakupereke cheruzgu ndi ichi: ukweru waza mucharu, kweni ŵanthu ayanja mdima mumalu mwa ukweru, chifukwa ntchitu zawu zenga ziheni. 20  Pakuti munthu weyosi yo wachita vinthu viheni, watinkha ukweru ndipu watuza cha ku ukweru, kuti ntchitu zaki zileki kuvumbulika. 21  Kweni weyosi yo wachita cho ntchauneneska, watuza ko kwe ukweru, kuti ntchitu zaki ziwoneke kuti zichitika mwakukoliyana ndi Chiuta.” 22  Pavuli paki, Yesu ndi akusambira ŵaki anguluta kumuzi wa Yudeya, angujaku kwa kanyengu ndipu wabatizanga ŵanthu. 23  Kweni Yohane nayu wabatizanga ŵanthu ku Ayinoni pafupi ndi Salimu, chifukwa kweniko kwenga maji nganandi ndipu ŵanthu azanga kuzibatizika. 24  Pa nyengu iyi ndipu Yohane wechendaponyeki mujeri. 25  Sonu akusambira aku Yohane asuskananga ndi Myuda munyaki pa nkhani ya kutoweseka. 26  Yiwu anguza kwaku Yohane ndi kumukambiya kuti: “Rabi, munthu yuwa mwenga nayu kusirya kwa Yorodani, yo mungupereka ukaboni wakukwaskana ndi iyu, awonani, wabatiza ndipu ŵanthu wosi aluta kwaku iyu.” 27  Yohane wangumuka kuti: “Munthu wangalonde kanthu kekosi cha kwambula kuti wapaskika kutuliya kuchanya. 28  Yimwi mwija mutindijaliya ukaboni kuti ndingukamba kuti, ‘Ini ndini Khristu cha, kweni ndikutumika panthazi paku iyu.’ 29  Weyosi yo we ndi mwali, ndi munthulumi mweneku wa nthengwa. Kweni asani mubwezi wa munthulumi mweneku wa nthengwa wasoka ndi kuvwa vo wakamba, watuŵa ndi likondwa likulu ukongwa chifukwa cha kuvwa mazu nga munthulumi mweneku wa nthengwa. Mwaviyo likondwa langu lafiskika. 30  Iyu watenere kulutirizga kukuwa kweni ini nditenere kulutirizga kuja mumana.” 31  Munthu yo watuliya kuchanya, waluska wosi. Munthu yo watuliya kucharu chapasi, ngwakutuliya kucharu chapasi, ndipu walongoro vinthu vakutuliya kucharu chapasi. Yo watuliya kuchanya waluska wosi. 32  Iyu wapereka ukaboni pa vinthu vo wawona ndi kuvwa, kweni palivi munthu yo wazomera ukaboni waki. 33  Munthu weyosi yo wazomera ukaboni waki, waŵikapu chidindu chaki* kuti Chiuta ndi muneneska. 34  Chifukwa munthu yo Chiuta wakumutuma, walongoro mazu ngaku Chiuta, pakuti Chiuta wathena cha* asani wapereka mzimu. 35  Ada atanja Mwana ndipu vinthu vosi avipereka mu manja mwaki. 36  Munthu yo wavwana mu Mwana, we ndi umoyu wamuyaya, ndipu munthu yo waleka kuvwiya Mwana, wazakuwuwona cha umoyu, kweni ukali waku Chiuta ujaliliya paku iyu.

Mazu Ngam'mphata

Panyaki kuti, “wabalika kutuliya kuchanya.”
Pamwenga kuti, “wasimikiza.”
Pamwenga kuti, “wachita kupima pamwesu cha.”