Yohane 21:1-25

  • Yesu wawoneke kwa akusambira ŵaki (1-14)

  • Peturo wasimikiza kuti watanja Yesu (15-19)

    • “Liska ŵana ambereri ŵangu” (17)

  • Umoyu wakunthazi wa wakusambira waku Yesu yo wamuyanjanga ukongwa (20-23)

  • Mazu ngakumaliya (24, 25)

21  Pavuli paki, Yesu wanguwoneke so kwa akusambira ŵaki ku Nyanja ya Tiberiya. Wanguwoneke mu nthowa iyi:  Simoni Peturo, Tomasi (yo wadanikanga kuti Didimu), Natanayeli wakutuliya ku Kana wa ku Galileya, ŵana aku Zebediya, ndi akusambira ŵaki anyaki ŵaŵi ŵenga pamoza.  Simoni Peturo wanguŵakambiya kuti: “Ndiluta kuchibaya somba.” Yiwu angukamba kuti: “Nasi tilutengi nawi.” Yiwu anguluta ndipu angukwera boti, kweni usiku weniwo anguwe ŵaka.  Kweni kuchicha, Yesu wanguma mulikumba, kweni akusambira ŵaki anguziŵa cha kuti ndi Yesu.  Pavuli paki, Yesu wanguŵafumba kuti: “Mwaŵana yimwi, kumbi mwe ndi chakurya chechosi* kuti tiryi?” Yiwu angumuka kuti: “Awa!”  Yesu wanguŵakambiya kuti: “Ponyani mukwawu winu kumaryi kwa boti ndipu mubayengi somba.” Mwaviyo, anguponya mukwawu wo, kweni angutondeka kuwuguza chifukwa wenga ndi somba zinandi.  Ndipu wakusambira yo Yesu wamuyanjanga ukongwa wangukambiya Peturo kuti: “Mbambuya!” Sonu Simoni Peturo, wati wavwa kuti Mbambuya wanguvwala laya laki lakubwalu pakuti wenga nkhuli* ndipu wangundwikiya munyanja.  Kweni akusambira anyaki, anguza paboti limana achiguza mukwawu wo unguzaza somba pakuti ŵenga patali viŵi cha ndi mtunda. Penga mtunda wa mamita pafufupi 90* pe.  Ŵati afika kumtunda, angusaniya chiŵandi kweniso motu wa maka ndipu pamotu wo angulalikapu somba. 10  Yesu wanguŵakambiya kuti: “Zani ndi zinyaki mwa somba zo mwabaya sonu.” 11  Sonu Simoni Peturo wangukwera boti ndi kuchiguziya kumtunda mukwawu wo unguzaza somba zikuluzikulu zakukwana 153. Kweni chinanga kuti somba zo zenga zinandi ukongwa, mukwawu wo unguphumuka cha. 12  Yesu wanguŵakambiya kuti: “Zani muziryi chakurya chamlenji.” Palivi wakusambira yo wanguchita chiganga kumufumba kuti: “Ndimwi ayani?” chifukwa anguziŵa kuti Mbambuya. 13  Yesu wanguza, wanguto chiŵandi ndi kuŵapaska, wanguŵapaska so somba. 14  Yaka kenga kachitatu kuti Yesu wawoneke kwa akusambira ŵaki kutuliya po wanguyuskikiya. 15  Ŵati amaliza kurya chakurya chamlenji, Yesu wangukambiya Simoni Peturo kuti: “Simoni mwana waku Yohane, kumbi utindiyanja kuluska izi?” Iyu wangumumuka kuti: “Hinya Ambuya, namwi muziŵa kuti nditikuyanjani ukongwa.” Yesu wangumukambiya kuti: “Liska ŵana ambereri ŵangu.” 16  Wangumufumba so kachiŵi kuti: “Simoni mwana waku Yohane, kumbi utindiyanja?” Iyu wangumuka kuti: “Hinya Ambuya, namwi muziŵa kuti nditikuyanjani ukongwa.” Iyu wangumukambiya kuti: “Liska ŵana ambereri ŵangu.” 17  Yesu wangumufumba so kachitatu kuti: “Simoni mwana waku Yohane, kumbi utindiyanja ukongwa?” Peturo wanguchita chitima ukongwa pakuti wangumufumba kachitatu kuti: “Kumbi utindiyanja ukongwa?” Mwaviyo wangumukambiya kuti: “Ambuya, muziŵa vinthu vosi ndipu muziŵa kuti nditikuyanjani ukongwa.” Yesu wangumukambiya kuti: “Liska ŵana ambereri ŵangu. 18  Nditikuneneske kuti, po wenga mnyamata, wavwalanga wija ndipu walutanga ko wakhumbanga. Kweni asani wakota, wazamutambasuwa manja ngaku, munthu munyaki wazakukuvwalika ndipu wazamuluta nawi ko uleka kukhumba.” 19  Iyu wangukamba venivi kuti walongo mtundu wa nyifwa yo wazamukankhuska nayu Chiuta. Wati wakamba venivi wangumukambiya kuti: “Lutirizga kundilondo.” 20  Peturo wangung’anamuka ndipu wanguwona kuti muvuli mutuza wakusambira yo Yesu wamuyanjanga ukongwa, yo pa chakurya chamazulu wanguyegeme pachifuŵa chaku Yesu, kweniso yo wangufumba Yesu kuti: “Ambuya, ndiyani yo wakhumba kukuperekani?” 21  Sonu Peturo wati wamuwona wangufumba Yesu kuti: “Ambuya, nanga munthu uyu?” 22  Yesu wangumukambiya kuti: “Asani ndingakhumba kuti waje ndi umoyu mpaka po ndiziyengi, yiwi vitikukwaska wuli? Lutirizga ŵaka kundilondo.” 23  Mwaviyo, nkhani yakuti wakusambira mwenuyu wafwengi cha yinguwanda ukongwa pakati pa abali. Kweni Yesu wangukambapu cha kuti walekengi kufwa, mumalu mwaki wangukamba kuti: “Asani ndingakhumba kuti waje ndi umoyu mpaka po ndiziyengi, yiwi vitikukwaska wuli?” 24  Wakusambira yo ndi mwenuyu wapereka ukaboni wakukwaskana ndi vinthu venivi, kweniso yo wakulemba vinthu venivi, ndipu tiziŵa kuti ukaboni waki ngwauneneska. 25  Kukamba uneneska, pe so vinthu vinandi vo Yesu wanguchita vo asani vingulembeka mwandondomeku yaki yosi, ndiwona kuti charu chatingi chiŵengevi malu ngakukwana kusungamu mipukutu yaki.

Mazu Ngam'mphata

Pamwenga kuti, “mwe ndi somba yeyosi.”
Pamwenga kuti, “pakuti wanguvwala vakuvwala vamukati pe.”
Mazu ngaki chayingu, “manja pafufupi 200.”