Yohane 19:1-42

  • Yesu wakwechulika ndi kunyozeka (1-7)

  • Pilato wafumba so Yesu (8-16a)

  • Yesu wakhomeka pachimiti ku Gologota (16b-24)

  • Yesu wasaniya munthu wakuphwere anyina (25-27)

  • Nyifwa yaku Yesu (28-37)

  • Yesu waŵikika mumuwunda (38-42)

19  Pavuli paki, Pilato wanguto Yesu ndipu wangumukwechuwa.  Sonu asilikali anguluka chisoti chaufumu chaminga ndipu angumuvwalika kumutu kweniso angumuvwalika mukhanju wamtundu wa pepo.  Ndipu azanga kwaku iyu ndi kumukambiya kuti: “Timoneni, yimwi Fumu ya Ayuda!” Ndipuso amupumanga makofi kumasu.  Pilato wangutuliya so kubwalu ndi kuŵakambiya kuti: “Awonani! Ndaza nayu kunu kubwalu kwaku yimwi, kuti muziŵi kuti ndamusaniya ndi mulandu cha.”  Sonu Yesu wangutuliya kubwalu wavwala chisoti chaufumu chaminga kweniso mukhanju wa pepo. Ndipu Pilato wanguŵakambiya kuti: “Awonani! Munthu yuwa ndi uyu!”  Kweni ŵara ŵa asembi ndi asilikali ŵati amuwona angudaniriza kuti: “Wapayikiki pachimiti! Wapayikiki pachimiti!”* Pilato wanguŵakambiya kuti: “Mutoni mwija ndipu mukamubayi,* chifukwa ndamusaniya ndi mulandu cha ini.”  Ayuda angumumuka kuti: “Te ndi dangu ndipu mwakukoliyana ndi dangu lo, watenere kufwa chifukwa wakamba kuti ndi mwana waku Chiuta.”  Pilato wati wavwa vo akambanga, wangwamba kuchita mantha ukongwa.  Iyu wangusere so munyumba ya nduna ndipu wangukambiya Yesu kuti: “Kumbi ukutuliya nunkhu?” Kweni Yesu wangumumuka cha. 10  Sonu Pilato wangumukambiya kuti: “Kumbi ukana kulongoro nani? Uziŵa cha kuti nde ndi mazaza ngakukufwatuwa kweniso ngakukubaya?”* 11  Yesu wangumumuka kuti: “Kwambula kuti mwapaskika mazaza kutuliya kuchanya, mulivi mazaza paku ini. Ndichu chifukwa chaki munthu yo wandipereka kwaku yimwi we ndi ubudi ukulu ukongwa.” 12  Pachifukwa chenichi, Pilato wanguyesesa kusaniya nthowa yakumufwatuliya kweni Ayuda angulutirizga kudaniriza kuti: “Asani mufwatuwa munthu uyu, mbwenu ndimwi bwezi laku Kayisara cha. Weyosi yo watijiwona kuti ndi fumu, wasuskana ndi Kayisara.” 13  Sonu Pilato wati wavwa mazu ngenanga, wangutuzgiya Yesu kubwalu, wanguja pampandu waki wakuyeruzgiyapu milandu pamalu ngo ngadanika kuti Mphara Yamya ndipu mu Chiheberi ngadanika kuti Gabata. 14  Lenili lenga Zuŵa Lakunozgeke Pasika. Mwenga mu ora la 6.* Ndipu Pilato wangukambiya Ayuda kuti: “Awonani! Fumu yinu!” 15  Kweni yiwu angudaniriza kuti: “Mumalani nayu! Mumalani nayu! Mupayikeni* pachimiti!” Pilato wanguŵafumba kuti: “Kumbi ndibayi fumu yinu?” Ŵara ŵa asembi angumuka kuti: “Tilivi fumu yinyaki kweni Kayisara.” 16  Pavuli paki wangumupereka kwaku yiwu kuti akamubayiyi pachimiti. Sonu Yesu wenga mu manja mwa Ayuda. 17  Iyu wangupinga yija chimiti chakutombozgekiyapu* ndipu wanguluta kumalu ngo ngadanika kuti Malu nga Bwaza, penipo mu Chiheberi ngadanika kuti Gologota. 18  Kumalu ngenanga angumukhoma pachimiti limoza ndi ŵanthu anyaki ŵaŵi, munyaki kujanja lamaryi ndipu munyaki kujanja lamazge, Yesu pakati. 19  Pilato wangulemba so zina la udindu ndipu wanguliŵika pachimiti chakutombozgekiyapu.* Lenga lakuti: “Yesu wa ku Nazareti Fumu ya Ayuda.” 20  Ayuda anandi anguŵerenga zina la udindu lenili chifukwa pamalu po Yesu wangukhomeka pachimiti, penga pafupi ndi tawuni ndipuso angulilemba mu Chiheberi, Chilatini ndi Chigiriki. 21  Kweni ŵara ŵa asembi ŵa Ayuda angukambiya Pilato kuti: “Mungalembanga kuti, ‘Fumu ya Ayuda’ cha kweni mulembi kuti wajikambanga kuti, ‘Ndini Fumu ya Ayuda.’” 22  Pilato wangumuka kuti: “Vo ndalemba, ndalemba!” 23  Sonu asilikali ŵati akhoma Yesu pachimiti, anguto malaya ngaki ngakubwalu ndipu angungagaŵa panayi. Msilikali weyosi wanguto chigaŵa chimoza, ndipu anguto so laya laki lamukati. Kweni laya laki lamukati lengavi musonu chifukwa ndimu lingulukikiya kwamba muchanya mpaka mumphata. 24  Sonu angukambiskana kuti: “Tingalipaluwanga cha, kweni tiyeni tichiti mayeri kuti tisaniyi yo liŵengi laki.” Venivi vingufiska lemba lo likamba kuti: “Angugaŵana malaya ngangu ndipu anguchita mayeri pa malaya ngangu.” Venivi ndivu asilikali anguchita nadi. 25  Pafupi ndi chimiti chakutombozgekiyapu* chaku Yesu, panguma anyina ndi mvurwa wa anyina kweniso Mariya muwolu waku Kulopa ndi Mariya wa ku Magadala. 26  Sonu Yesu wati wawona anyina ndi wakusambira waki yo wamuyanjanga ukongwa, ŵama pafupi, wangukambiya anyina kuti: “Ama, wonani! Mwana winu ndi uyu!” 27  Pavuli paki wangukambiya wakusambira yo kuti: “Awona! Anyoku ndi yaŵa!” Ndipu kwamba nyengu yeniyo wakusambira yo wanguŵatole kunyumba kwaki. 28  Pavuli paki Yesu wati waziŵa kuti sonu vinthu vosi vafiskika, kuti lemba lifiskiki wangukamba kuti: “Nde ndi nyota.” 29  Pamalu ngenanga penga msuku wakuzaza vinyu wakunthyanthyama. Sonu anguto buwula ndi kumubizga muvinyu wakunthyanthyama ndipu buwula yo angumuŵika kuphesi la hisopi,* ndipu angusoske kumulomu waku Yesu. 30  Yesu wati walonde vinyu wakunthyanthyama, wangukamba kuti: “Vafiskika!” ndipu wangusindama ndi kupereka mzimu waki.* 31  Chifukwa chakuti lenga Zuŵa Lakunozgeke, kuti mathupi ngaleki kulutirizga kuja pavimiti vakutombozgekiyapu pa zuŵa la Sabata (pakuti lenili lenga Sabata likulu), Ayuda angupempha Pilato kuti malundi ngafyoleki ndipuso kuti mathupi ngawu ngatuzgikepu. 32  Sonu asilikali anguza ndipu angufyo malundi nga munthu wakwamba kweniso nga munthu munyaki yo nayu wangukhomeka pachimiti limoza ndi Yesu. 33  Kweni ŵati aza kwaku Yesu angusaniya kuti wafwa kali ndipu angufyo cha malundi ngaki. 34  Kweni yumoza mwa asilikali, wangumugwaza ndi mkondu mumbaŵala ndipu nyengu yeniyo mungutuwa ndopa ndi maji. 35  Ndipu yo wanguwona venivi wangupereka ukaboni wenuwu, ukaboni waki ngwauneneska ndipu iyu waziŵa kuti vo wakamba vauneneska, kuti yimwi namwi mugomezgi. 36  Kweni vinthu venivi vinguchitika kuti lemba lifiskiki lo likamba kuti: “Palivi chiwanga chaki cho chazamufyoleka.”* 37  Ndipuso lemba linyaki likamba kuti: “Azamulereska ku munthu yo angumugwaza.” 38  Sonu pavuli pa vinthu venivi, Yosefi wa ku Arimatiya yo wenga wakusambira waku Yesu kweni wambula kuziŵika ku ŵanthu chifukwa cha kopa Ayuda, wangupempha Pilato kuti wakato thupi laku Yesu ndipu Pilato wangumuzomereza. Sonu wanguza ndipu wanguto thupi lo. 39  Nikodimu, yo wanguza kwaku Yesu ndi usiku pakwamba, nayu wanguza ndipu wangupinga mule wakusazgana ndi aloye pafufupi mapawundi 100.* 40  Sonu anguto thupi laku Yesu ndipu angulikulunga musalu zo zenga ndi vakununkhira, mwakukoliyana ndi mudawuku wo Ayuda achitanga pakuŵika maliru. 41  Vinguchitika kuti pamalu ngo Yesu angumubayiya* penga munda ndipu mumunda wo mwenga muwunda* wufya, wo munthu weyosi wenga wechendaŵikikemu. 42  Chifukwa chakuti lenga Zuŵa Lakunozgeke la Ayuda ndipuso muwunda wenga pafupi, Yesu angumuŵika mwenimo.

Mazu Ngam'mphata

Pamwenga kuti, “Wabayikiyi pachimiti! Wabayikiyi pachimiti!”
Pamwenga kuti, “Mukamubayiyi pachimiti.”
Pamwenga kuti, “ngakukubayiya pachimiti.”
Cha mu ma 12 koloku msana.
Pamwenga kuti, “Mubayiyeni.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Pamwenga kuti, “kumalizika.”
Pamwenga kuti, “chazamuphwanyika.”
Kung’anamuwa kuti, mapawundi nga Aroma.
Pamwenga kuti, “angumubayiya pachimiti.”
Pamwenga kuti, “muwunda wachikumbusu.”