Yohane 17:1-26

  • Yesu wapemphera kakumaliya ndi akutumika (1-26)

    • Kuziŵa Chiuta mbumoyu wamuyaya (3)

    • Akhristu mbacharu cha (14-16)

    • “Mazu nginu mbuneneska” (17)

    • “Ndaŵaziŵisa zina linu” (26)

17  Yesu wati wamaliza kulongoro vinthu venivi, wangulereska kuchanya ndipu wangukamba kuti: “Ada, nyengu yafika. Kankhuskani mwana winu, kuti mwana winu wakukankhuskeni,  nge mo mwamupaskiya mazaza pa ŵanthu wosi, kuti wapereki umoyu wamuyaya ku ŵanthu wosi wo yimwi mwamupaska.  Azamusaniya umoyu wamuyaya asani aziŵa* yimwi Chiuta yija wauneneska, ndi Yesu Khristu yo mukutuma.  Ndakukankhuskani pacharu chapasi, pakuti ndamaliza ntchitu yo mukundipaska kuti ndigwiri.  Sonu Ada, ndikankhuskeni pamphepeti pinu, mwakundipaska unkhankhu wo ndenga nawu charu chechendaŵeku.  “Ŵanthu wo mwandipaska kutuliya pacharu, ndaŵaziŵisa zina linu. Ŵenga ŵinu kweni mwandipaska ndipu mazu nginu angasunga.*  Ndipu sonu aziŵa kuti vinthu vosi vo mukundipaska, vituliya kwaku yimwi.  Chifukwa ndaŵapaska mazu ngo mukundipaska ndipu angazomera ndipuso aziŵa kuti ndikuza nge wakukumiyani, kweniso agomezga kuti mukundituma.  Nditiŵapemphe, ndipemphe charu cha, kweni ndipemphe wo mwandipaska chifukwa mbinu. 10  Vinthu vinu vosi vangu, ndipu ndakankhuskika pakati pawu. 11  “Ini nde mucharu so cha, kweni yiwu ŵe mucharu, ndipu ini ndituza kwaku yimwi. Ada akupaturika, avikiliyeni chifukwa cha zina linu lo mukundipaska, kuti aŵi amoza* nge mo isi tilili amoza.* 12  Pa nyengu yo ndenga nawu ndaŵavikiliyanga chifukwa cha zina linu lo mukundipaska, ndipu ndaŵavikiliya. Palivi yumoza yo watayika kweni mwana wachitayiku pe, kuti lemba lifiskiki. 13  Kweni sonu ndituza kwaku yimwi, ndipu ndikamba vinthu venivi mucharu kuti yiwu aje ndi likondwa likulu ukongwa. 14  Ndaŵapaska mazu nginu, kweni charu chaŵatinkha, chifukwa yiwu mbacharu cha, nge mo ini ndiliri wacharu cha. 15  “Ndipempha kuti muŵatuzgemu mucharu cha, kweni kuti muŵavikiliyi chifukwa cha muheni yo. 16  Yiwu mbacharu cha, nge mo ini ndiliri wacharu cha. 17  Atoweseni* ndi uneneska, mazu nginu mbuneneska. 18  Nge mo mukunditumiya mucharu, ini nani nditiŵatuma mucharu. 19  Ndipu nditijitowesa chifukwa chaku yiwu, kuti nawu so atoweseki ndi uneneska. 20  “Ndipemphe yaŵa pe cha, kweni ndipemphe so wo mazu ngawu ngalongo kuti ŵe ndi chivwanu mwaku ini, 21  kuti wosi aje amoza, nge mo yimwi Ada muliri akukoliyana ndi ini ndipuso mo ini ndiliri wakukoliyana ndi yimwi, kuti nawu so aje akukoliyana ndi isi ndipuso kuti charu chigomezgi kuti mukundituma. 22  Ndaŵapaska unkhankhu wo mungundipaska, kuti aje amoza nge mo isi tiliri amoza. 23  Ini ndikoliyana ndi yiwu ndipu yimwi mukoliyana ndi ini, kuti aje akukoliyana mwakufikapu ndipuso kuti charu chiziŵi kuti mukundituma, kweniso kuti mutiŵayanja nge mo muyanjiya ini. 24  Ada, ndikhumba kuti ŵanthu wo mwandipaska, azije ko ini ndamuja, kuti aziwoni unkhankhu wangu wo mukundipaska, chifukwa mukundiyanja charu chechendajalikiskiki. 25  Ada arunji, kukamba uneneska, charu chakuziŵani cha, kweni ini ndakuziŵani ndipu yaŵa aziŵa kuti mukundituma. 26  Ndaŵaziŵisa zina linu, ndipu ndazakuliziŵisa so, kuti chanju cho mwandiyanja nachu chije nawu ndipuso kuti ini ndije wakukoliyana nawu.”

Mazu Ngam'mphata

Pamwenga kuti, “asani asambira vaku.”
Pamwenga kuti, “angavwiya.”
Pamwenga kuti, “akukoliyana.”
Pamwenga kuti, “akukoliyana.”
Pamwenga kuti, “apatuweni.”