Yohane 16:1-33

  • Akusambira aku Yesu azamubayika (1-4a)

  • Ntchitu za mzimu wakupaturika (4b-16)

  • Chitima cha akusambira chazamusambuka likondwa (17-24)

  • Yesu wachithereska charu (25-33)

16  “Ndakukambiyani vinthu venivi kuti mungaziguŵanga cha.  Ŵanthu azakukusezgani musinagogi. Kukamba uneneska, nyengu yituza yeniyo weyosi yo wazakukubayani wazamuŵanaŵana kuti wachita uteŵeti wakupaturika kwaku Chiuta.  Kweni azamuchita vinthu venivi chifukwa chakuti atiŵaziŵa cha Ada, ini nani atindiziŵa cha.  Kweni ndakukambiyani vinthu venivi kuti asani nyengu yakuti vichitiki yafika, muzikumbuki kuti ndingukukambiyani vinthu venivi. “Pakwamba ndingukukambiyani cha vinthu venivi, chifukwa chakuti ndenga namwi.  Kweni sonu ndiluta kwaku Yo wakundituma, ndipu palivi yumoza waku yimwi yo watindifumba kuti, ‘Muluta pani?’  Kweni pakuti ndakukambiyani vinthu venivi, mitima yinu yazaza ndi chitima.  Chinanga kuti ve viyo, nditikukambiyani uneneska. Ini ndiluta ndipu yimwi ndimwi muyanduwengi. Chifukwa asani ndaleka kuluta, wakukuwovyani wazengi cha. Kweni asani ndaluta, ndakumutumiza kwaku yimwi.  Ndipu asani mweniyo waza wazakukupaskani ukaboni wakuvwika umampha wakukwaskana ndi ubudi, urunji ndipuso cheruzgu:  wakwamba, wakukwaskana ndi ubudi, chifukwa chakuti alivi chivwanu mwaku ini. 10  Pavuli paki, wakukwaskana ndi urunji, chifukwa chakuti ndiluta kwa Ada ndipu mundiwonengi so cha. 11  Pakumaliya, wakukwaskana ndi cheruzgu, chifukwa wakuwusa charu ichi wayeruzgika. 12  “Ndeche ndi vinthu vinandi vakuti ndikukambiyeni, kweni mungavisunga cha pasonu panu. 13  Kweni asani mweniyo* waza, yo ndi mzimu wa uneneska, wazakukulongozgani mu uneneska wosi, chifukwa iyu wazamulongoro va mumaŵanaŵanu ngaki cha, kweni wazamulongoro vo wavwa ndipu wazakukupharazgiyani vinthu vo vituza. 14  Mweniyo ndiyu wazakundikankhuska, chifukwa wazamulonde vinthu vangu ndipu iyu wazakuvipharazga kwaku yimwi. 15  Vinthu vosi vo Ada ŵe navu vangu, ndichu chifukwa chaki ndakamba kuti iyu walonde vangu ndi kuvipharazga kwaku yimwi. 16  Mu kanyengu kamanavi mundiwonengi so cha, ndipuso mu kanyengu kamanavi mundiwonengi.” 17  Yesu wati wakamba venivi, akusambira ŵaki anyaki angwamba kukambiskana kuti: “Kumbi wang’anamuwanji pakutikambiya kuti, ‘Mu kanyengu kamanavi mundiwonengi so cha, ndipuso mu kanyengu kamanavi mundiwonengi,’ kweniso pakutikambiya kuti, ‘chifukwa chakuti ndiluta kwa Ada’?” 18  Sonu akambanga kuti: “Kumbi wang’anamuwanji pakukamba kuti, ‘kanyengu kamanavi’? Titiviziŵa cha vo wakamba.” 19  Yesu wanguziŵa kuti akhumba kumufumba, sonu iyu wanguŵakambiya kuti: “Kumbi mufumbana mwijamwija chifukwa cho ndakambiya kuti: ‘Mu kanyengu kamanavi mundiwonengi cha, ndipuso mu kanyengu kamanavi mundiwonengi’? 20  Nditikuneneskiyani kuti mwazamuliya ndi kutenje, kweni charu chazamukondwa. Yimwi mwazamuchita chitima, kweni chitima chinu chazamusambusika likondwa. 21  Munthukazi wachibala watuvwa urwirwi chifukwa chakuti nyengu yaki yafika, kweni asani wabala mwana, watingakumbuka so cha masuzgu ngo wenga nangu chifukwa cha likondwa kuti munthu wawaku kucharu. 22  Yimwi namwi, sonu panu mwe ndi chitima, kweni ndizengi so kuzikuwonani, mitima yinu yazamuja ndi likondwa ndipu palivi yo wazakukulondani likondwa linu. 23  Pa zuŵa lo, mwazakundifumba fumbu lelosi cha. Nditikuneneskiyani kuti, asani mupempha chinthu chechosi kwa Ada azakukupaskani mu zina langu. 24  Mpaka sonu panu mwechendapemphepu kanthu chinanga nkhamoza mu zina langu. Pemphani ndipu mulondiyengi, kuti likondwa linu liŵi likulu ukongwa. 25  “Ndakukambiyani vinthu venivi mwakugwiriskiya ntchitu ntharika. Nyengu yituza penipo ndazakukukambiyani mwakugwiriskiya ntchitu ntharika so cha, kweni ndazakukukambiyani vinthu vosi vakukwaskana ndi Ada kwambula kubisa. 26  Mu zuŵa lenilo, mwazamupempha Ada mu zina langu. Po ndikamba ivi, nding’anamuwa kuti ndakukupemphiyani ndini cha. 27  Pakuti Ada atikuyanjani ukongwa chifukwa chakuti mutindiyanja ukongwa ndipuso mwagomezga kuti ndikuza nge wakumiya Chiuta. 28  Ndikuza nge wakumiya Chiuta ndipu ndikuza mucharu. Sonu ndituwamu mucharu ndipu ndiluta kwa Ada.” 29  Akusambira ŵaki angukamba kuti: “Mwawona! Sonu mukamba kwambula kubisa ndipu mugwiriskiya ntchitu ntharika so cha. 30  Sonu taziŵa kuti muziŵa vinthu vosi ndipu mukhaza kuti munthu wachiti kukufumbani cha. Mwaviyo, tagomezga kuti mukutuliya kwaku Chiuta.” 31  Yesu wanguŵamuka kuti: “Kumbi mugomezga sonu? 32  Awonani! Nyengu yituza, ndipu yafika kali, yo mosi mumbininikengi ndipu weyosi wazamuluta kunyumba kwaki ndipu mwazakundileka ndija. Kweni nde ndija cha, chifukwa Ada ŵe nani. 33  Ndakukambiyani venivi kuti kuporote mwaku ini muŵi ndi chimangu. Mukumanengi ndi masuzgu mucharu, kweni khwimani mtima! Ini ndachithereska charu.”

Mazu Ngam'mphata

Mazu ngakuti “mweniyo” ndipuso “iyu” ngo nge muvesi 13 ndi 14, ngamiya “wakukuwovyani” yo wazumbulika muvesi 7. Yesu wangugwiriskiya ntchitu mazu ngakuti “wakukuwovyani” (ngo mu Chigiriki ngamiya chinthu chinthulumi) pakukonkhoska mzimu wakupaturika nge munthu. Mzimu wakupaturika wenuwu ndi munthu cha kweni ndi nthazi ŵaka, ndipu mazu nga Chigiriki ngalongo cha kuti nthazi iyi njinthulumi pamwenga njinthukazi.