Yohane 15:1-27

  • Ntharika ya mphereska (1-10)

  • Dangu lakulongo chanju nge chaku Khristu (11-17)

    • ‘Palivi chanju chikulu kuluska ichi’ (13)

  • Charu chitinkha akusambira aku Yesu (18-27)

15  “Ini ndini mphereska chayiyu ndipu Ada ndiwu alimi.  Yiwu atuzgamu mphanda yeyosi mwaku ini yo yileka kupasa vipasu ndipu atowesa yeyosi yo yipasa vipasu, kuti yipasi vipasu vinandi.  Yimwi mwe akutowa kali chifukwa cha mazu ngo ndakukambiyani.  Lutirizgani kukoliyana ndi ini ndipu ndazamulutirizga kukoliyana ndi yimwi. Mphanda yingapasa cha vipasu pakuyija kwambula kulutirizga kuja muchimiti cha mphereska. Mwakuyanana ŵaka, yimwi namwi mungapasa cha vipasu kwambula kulutirizga kukoliyana ndi ini.  Ini ndini chimiti cha mphereska ndipu yimwi ndimwi mphanda. Weyosi yo walutirizga kukoliyana ndi ini ndipu ini ndikoliyana nayu, wapasengi vipasu vinandi, chifukwa kwambula ini palivi cho mungachita.  Asani munthu waleka kukoliyana ndi ini, watayika kubwalu nge mphanda ndipu wamila. Ŵanthu awunjika mphanda zo ndi kuziponya pamotu ndipu zitufya.  Asani mulutirizga kukoliyana ndi ini ndipu mazu ngangu ngalutirizga kuja mwaku yimwi, mungapempha chechosi cho mukhumba ndipu chazakukuchitikiyani.  Ada akankhuskika asani mulutirizga kupasa vipasu vinandi ndipuso mutijilongo kuti mwe akusambira ŵangu.  Nge mo Ada andiyanjiya, nani so ndakuyanjani. Mwaviyo, lutirizgani kuchita vinthu vo vingawovya kuti ndikuyanjeningi. 10  Asani musunga marangu ngangu, mulutirizgengi kuchita vinthu vo vingawovya kuti ndikuyanjeningi, nge mo ini nani ndasungiya marangu nga Ada ndi kulutirizga kuchita vinthu vo vitovya kuti andiyanjengi. 11  “Ndakukambiyani vinthu venivi kuti likondwa langu lije namwi ndipuso kuti likondwa linu lije likulu ukongwa. 12  Ili ndi dangu langu, kuti muyanjanengi nge mo ini ndakuyanjiyani. 13  Palivi munthu yo we ndi chanju chikulu kuluska ichi, kuti munthu wapereki umoyu waki mumalu mwa anyaki. 14  Yimwi mwe anyangu asani muchita vo ndakulamulani. 15  Nditikudanani kuti akapolu so cha chifukwa kapolu waziŵa cha vo mbuyaki wachita. Kweni ndakudanani kuti anyangu, chifukwa ndakukambiyani vinthu vosi vo ndikuvwa kutuliya kwa Ada. 16  Yimwi mukundisankha cha, kweni ini ndini ndikukusankhani ndipuso ndikukuŵikani kuti mukalutirizgi kupasa vipasu, kweniso kuti vipasu vinu vilutirizgi kuŵapu, kuti chechosi cho mungapempha kwa Ada mu zina langu, yiwu akupaskeni. 17  “Nditikulamulani vinthu venivi kuti muyanjanengi. 18  Asani charu chitikutinkhani, ziŵani kuti chingwamba kutinkha ini chechendatinkhi yimwi. 19  Asani mwenga a charu, charu chatingi chikuyanjeningi chifukwa mwatingi muŵengi ŵaki. Pakuti sonu mwe a charu cha kweni ndakusankhani kutuliya mucharu, pa chifukwa chenichi, charu chitikutinkhani. 20  Kumbukani mazu ngo ndikukukambiyani ngakuti: Kapolu ndi mura cha kuluska mbuyaki. Asani atombozga ini, namwi azakukutombozgani. Kweniso asani asunga mazu ngangu, azamusunga so mazu nginu. 21  Kweni azakukuchitiyani vosi venivi chifukwa cha zina langu, pakuti atimuziŵa cha Yo wakundituma. 22  Asani ndinguleka kuza ndi kuŵakambiya, atingi aŵengevi ubudi. Kweni sonu alivi chifukwa chakukaniya maubudi ngawu. 23  Munthu weyosi yo watinkha ini, watinkha so Ada. 24  Asani ndinguleka kuchita ntchitu pakati pawu zo palivi munthu munyaki yo wakuchitapu, atingi aŵengevi ubudi. Kweni andiwona, anditinkha ndipuso atinkha Ada. 25  Kweni venivi vikuchitika kuti afiski mazu ngo ngakulembeka mu Dangu* lawu ngakuti: ‘Yiwu akunditinkha kwambula chifukwa.’ 26  Asani wakukuwovyani waza, yo ndikutumiziyeningi kutuliya kwa Ada, weniwo ndi mzimu wauneneska wakutuliya kwa Ada, mweniyo ndiyu wazamupereka ukaboni wakukwaskana ndi ini. 27  Ndipu yimwi namwi mundiperekiyengi ukaboni chifukwa mwaja nani kutuliya pakwamba.

Mazu Ngam'mphata

Wonani Mazu ngo Ngakonkhoskeka.