Tito 2:1-15

  • Chisambizu chamampha cha achinyamata ndi ŵaraŵara (1-15)

    • Kanani mijalidu yambula kopa Chiuta (12)

    • Aphamphu pa ntchitu zamampha (14)

2  Kweni yiwi, lutirizga kulongoro vinthu vo vikoliyana ndi chisambizu chamampha.*  Anthulumi arara achitengi vinthu mwambula kujumpha mwesu, angachitanga vinthu mwa­chiwana cha, aŵanaŵanengi umampha kweniso aje ndi chivwanu chanthazi, aje ndi chanju chikulu kweniso akunthiyengepu ukongwa.  Anthukazi arara nawu aje ndi jalidu lakwenere ŵanthu akupaturika, angaŵanga akukamba vinthu viheni va anyawu cha, angaŵanga akapolu a vinyu munandi cha, kweni aje asambizi a vinthu vamampha,  kuti alunguchizgi* anthukazi achisungwana kuti ayanjengi alumu ŵawu, ayanjengi ŵana ŵawu,  kuti aŵanaŵanengi umampha, aje akutowa, akugwira ntchitu zapakhomu,* amampha ndipuso akujithereska kwa alumu ŵawu, kuti mazu ngaku Chiuta ngaleki kunyozeka.  Mwakuyanana ŵaka, lutirizga kuchiska anyamata kuti aŵanaŵanengi umampha,  ndipuso uje chakuwoniyapu pa ntchitu zamampha mu nthowa yeyosi. Usambizengi cho ntchakupaturika* ndi mtima wosi,  ugwiriskiyengi ntchitu mazu ngamampha* ngo ngangasuskika cha, kuti wo asuska alengeseki ndipuso aŵevi chakukamba chiheni chakukwaskana ndi isi.  Akapolu ajithereskengi kwa ambuyawu mu vinthu vosi. Ayesesengi kuŵakondwesa ndipu angasuskananga nawu cha, 10  angaŵabiyanga cha kweni alongo kuti mbakugomezgeka ukongwa ndi chilatu chakuti adyoŵesi mu nthowa yeyosi chisambizu chaku Chiuta Mtaski widu. 11  Pakuti wezi ukulu waku Chiuta wawoneke ndipu wawovya kuti ŵanthu amitundu yosi ataskiki. 12  Utitisambiza kuti tikanengi kuja ndi mijalidu yambula kopa Chiuta kweniso makhumbiru nga charu, ndipuso kuti tijengi ndi maŵanaŵanu ngamampha, tichitengi urunji ndipuso tijengi akujipereka kwaku Chiuta pakati pa mugonezi wunu,* 13  tichikhaza chilindizga chakukondwesa kweniso kuwoneke mwaunkhankhu kwaku Chiuta mukulu ndipuso kwa Mtaski widu, Yesu Khristu, 14  yo wakujipereka chifukwa chaku isi, kuti watifwatuwi* ku mtundu wewosi wa kuleka kuvwiya marangu ndipuso kuti wajitowese ŵanthu wo ntchuma chaki chapade, aphamphu pa ntchitu zamampha. 15  Lutirizga kulongoro vinthu venivi, kuchiska ndipuso kuchenya ndi mazaza ngosi. Ungazomerezanga cha kuti ŵanthu akudelerengi.

Mazu Ngam'mphata

Pamwenga kuti, “chakovya.”
Pamwenga kuti, “akumbuskengi; asambizengi.”
Pamwenga kuti, “aphweriyengi nyumba zawu.”
Panyaki kuti, “Usambizengi kwambula kufipiskika.”
Pamwenga kuti, “ngakovya.”
Pamwenga kuti, “nyengu yinu.” Wonani Mazu ngo Ngakonkhoskeka.
Mazu ngaki chayingu, “watiwombo, watitaski.”