Mateyu 6:1-34

  • UPHARAZGI WA PAPHIRI (1-34)

    • Kanani kujiwonesa kuti ndimwi arunji (1-4)

    • Mo mungapemphere (5-15)

      • Pempheru la Ambuya (9-13)

    • Kufunga (16-18)

    • Chuma chapacharu chapasi ndipuso chakuchanya (19-24)

    • Lekani kufipa mtima (25-34)

      • Lutirizgani kupenja dankha Ufumu (33)

6  “Tcheŵani kuti muleki kuchita urunji pa masu pa ŵanthu kuti akuwoneni; chifukwa asani mungachita viyo, mwazamulonde mphotu yeyosi cha kwa Awusemwi wo ŵe kuchanya.  Mwaviyo, asani mupereka mphasu zalisungu* mungambanga mbata* cha nge mo achitiya ŵanthu akunyenga mumasinagogi ndi mumisewu kuti ŵanthu aŵalumbengi. Nditikuneneskiyani kuti alonde limu mphotu yawu yosi.  Kweni yimwi asani mupereka mphasu zalisungu, janja linu lamazge lingaziŵanga cha cho janja linu lamaryi lichita,  kuti mphasu zinu zalisungu muziperekiyengi kumphepeti. Ndipu Awusemwi wo awona vakuseri azakukuweziyanipu.  “Ndipuso asani mupemphera mungachitanga nge ŵanthu akunyenga cha, chifukwa yiwu atanja kuma ndi kupemphera mumasinagogi ndi mumphatukanu za misewu yikuluyikulu kuti ŵanthu aŵawonengi. Nditikuneneskiyani kuti alonde limu mphotu yawu yosi.  Kweni yimwi asani mukhumba kupemphera, sereni muchipinda chakumwija, jalani chisasa chinu ndipu pempherani kwa Awusemwi wo aja kwambula kuwoneka. Awusemwi wo awona vakuseri azakukutumbikani.  Pakupemphera mungawerezangawerezanga ŵaka cha nge mo achitiya ŵanthu amitundu yinyaki, pakuti aŵanaŵana kuti Chiuta waŵavwengi chifukwa cha mapempheru ngawu ngatali.  Mungayanananga nawu cha, chifukwa Awusemwi aziŵa vo mukhumba chinanga mphanyengu yo mwechendaŵapemphi.  “Kweni yimwi mupempherengi viyo: “‘Awusefwi akuchanya, zina linu lipaturiki.* 10  Ufumu winu uzi. Khumbu linu lichitiki panu pasi, nge kuchanya. 11  Mutipaski chakurya chidu chamsanawale;* 12  Mutigowoke vo tinangisa nge mo nasi tigowoke ŵanthu wo atitinangiya.* 13  Mungazomerezanga cha kuti titheri asani tiyeseka,* kweni titaskeni ku muheni yo.’ 14  “Chifukwa asani mugowoke ŵanthu maubudi ngawu, Awusemwi akuchanya nawu akugowokiyeningi. 15  Kweni asani muleka kugowoke ŵanthu maubudi ngawu, Awusemwi nawu akugowokiyeningi cha maubudi nginu. 16  “Asani mufunga, mungawonekanga mwakuzimbwa cha nge mo achitiya ŵanthu akunyenga, chifukwa akwinyimbuka* kuti ŵanthu aŵawoni kuti afunga. Nditikuneneskiyani kuti yiwu alonde limu mphotu yawu yosi. 17  Kweni yimwi asani mufunga, sambani kumasu kwinu ndi kupaka mafuta kumutu kwinu, 18  kuti muleki kujiwonesa pa masu pa ŵanthu kuti mufunga, kweni akuwoneningi Awusemwi pe wo aja kwambula kuwoneka. Ndipu Awusemwi wo awona vakuseri azakukutumbikani. 19  “Lekani kujiwunjikiya chuma pacharu chapasi po nyenji* ndi ulosu vinanga, kweniso po ankhungu asere ndi kuba. 20  Kweni yimwi jiwunjikiyeni chuma kuchanya, ko nyenji pamwenga ulosu vinanga cha, kweniso ko ankhungu asere cha ndi kuba. 21  Chifukwa ko kwe chuma chaku ndiku so kwe mtima waku. 22  “Nyali ya liŵavu ndi jisu. Asani jisu laku ndakulereska pa chinthu chimoza,* liŵavu laku losi liŵala.* 23  Kweni asani jisu laku ndambunu,* liŵavu laku losi lichita mdima. Sonu asani ukweru wo we mwaku yiwi ndi mdima, ndikuti mdima waki ngwakofya! 24  “Palivi munthu yo wangateŵete mabwana ngaŵi, chifukwa watinkhengi yumoza ndi kwanja munyaki, pamwenga wagomezgekengi ku yumoza ndi kunyoza munyaki. Mungaja cha kapolu waku Chiuta ndipuso kapolu wa chuma pa nyengu yimoza. 25  “Pa chifukwa chenichi nditikukambiyani kuti: Lekani kufipiya mtima umoyu winu kuti muryengenji pamwenga mumwengenji, pamwenga liŵavu linu kuti muvwalengenji. Kumbi umoyu ngwakuzirwa cha kuluska chakurya pamwenga liŵavu ndakuzirwa cha kuluska chakuvwala? 26  Wonesesani tiyuni tamude; timija mbewu cha pamwenga kuvuna pamwenga kusunga munkhokwi, kweni Awusemwi akuchanya atitiryisa. Asi yimwi mwe akuzirwa ukongwa kuluska tiyuni? 27  Kumbi ndiyani waku yimwi yo wangasazgiyaku utali wa umoyu waki chinanga nkhamanavi* chifukwa chakufipa mtima? 28  Ndipuso ntchifukwa wuli mufipa mtima kuti muvwalengenji? Sambirani ku maluŵa ngamudondu, wonani mo ngakuliya; ngagwira ntchitu cha pamwenga kuluka salu; 29  kweni nditikukambiyani kuti chinanga ndi Solomoni mu unkhankhu waki wosi wakuvwalapu cha malaya ngakutowa nge maluŵa yanga. 30  Sonu asani viyo ndimu Chiuta wavwalikiya vakume vamudondu vo msanawale vilipu, mawa viponyeka pamotu, kumbi yimwi wangatondeka kukuvwalikani kuluska venivi? Ntchifukwa wuli mwe ndi chivwanu chimana? 31  Mwaviyo, lekani kufipa mtima ndi kukamba kuti, ‘Tiryengenji?’ pamwenga, ‘Timwengenji?’ pamwenga, ‘Tivwalengenji?’ 32  Chifukwa vosi ivi ndivu ŵanthu amitundu ativipenja ukongwa. Awusemwi akuchanya aziŵa kuti yimwi mukhumbika vosi venivi. 33  “Mwaviyo, lutirizgani kupenja dankha Ufumu ndi urunji waki, ndipu vinthu vinyaki vosi venivi visazgikiyengeku kwaku yimwi. 34  Lekani kufipiya mtima vamawa, chifukwa la mawa le ndi vakufipiska mtima vaki. Zuŵa lelosi le ndi masuzgu ngaki.

Mazu Ngam'mphata

Pamwenga kuti, “mphasu ku ŵanthu akavu.” Wonani Mazu ngo Ngakonkhoskeka.
Anyaki akamba kuti, “lipenga.”
Pamwenga kuti, “litoweseki.”
Mazu ngaki chayingu, “buledi lidu lamsanawale.”
Mazu ngaki chayingu, “wo ŵe nasi ndi ngongoli.”
Mazu ngaki chayingu, “Mungatitoliyanga ku mayeseru cha.”
Pamwenga kuti, “atijiphwere cha.”
Mazu nga Chigiriki ngo ngafwatulikiya kuti nyenji ngang’anamuwa kachidononu kakuphululuka ko katurya vakuvwala.
Mazu ngaki chayingu, “ndipusu.”
Pamwenga kuti, “lingweruka ukongwa.”
Mazu ngaki chayingu, “ndiheni.”
Mazu ngaki chayingu, “chinanga ndi janja limoza.”