Mateyu 5:1-48

  • UPHARAZGI WA PAPHIRI (1-48)

    • Yesu watamba kusambiza paphiri (1, 2)

    • Vinthu 9 vo vichitiska kuti munthu waje wakutumbikika (3-12)

    • Mche kweniso ukweru wacharu (13-16)

    • Yesu wakuziya kuzifiska Dangu (17-20)

    • Ulongozgi pa nkhani ya kukwiya (21-26), chigololu (27-30), kupatana (31, 32), kulapizga (33-37), kuwezge (38-42), kwanja arwani (43-48)

5  Wati wawona chigulu cha ŵanthu, wanguluta pachanya pa phiri ndipu wati waja pasi, akusambira ŵaki anguza kwaku iyu.  Pavuli paki, wangwamba kuŵakambiya ndi kuŵasambiza kuti:  “Mbakutumbikika wo aziŵa kuti akhumbika Chiuta,* chifukwa Ufumu wakuchanya ngwawu.  “Mbakutumbikika wo atijichitiya chitima, chifukwa azamupembuzgika.  “Mbakutumbikika akuzika,* chifukwa azamuhara charu chapasi.  “Mbakutumbikika wo ŵe ndi nja ndi nyota ya urunji, chifukwa azamuguta.*  “Mbakutumbikika alisungu, chifukwa azakuŵachitiya lisungu.  “Mbakutumbikika akutowa mumtima, chifukwa azamuwona Chiuta.  “Mbakutumbikika akwanja chimangu,* chifukwa azamudanika kuti ŵana aku Chiuta. 10  “Mbakutumbikika wo atombozgeka chifukwa chakuchita vinthu vamampha, pakuti Ufumu wakuchanya ngwawu. 11  “Mwe akutumbikika asani ŵanthu atikunyozani, atikutombozgani ndipuso atikupusikiyani vinthu viheni vinandi chifukwa chaku ini. 12  Kondwani ndi kusekere ukongwa chifukwa mphotu yinu njikulu kuchanya, pakuti ndimu so angutombozge achimi wo ŵengaku yimwi mwechendaŵeku. 13  “Ndimwi mche wa charu, kweni asani mche wasukuluka, kumbi kunowa kwaki kungaweriyamu so wuli? Ugwiriskikiya so ntchitu cha, kweni utayika kubwalu ndipu ŵanthu atiwukandakanda. 14  “Ndimwi ukweru wa charu. Tawuni yo ye pachanya pa phiri yingabisika cha. 15  Asani ŵanthu abusa nyali atiyibenekere ndi sokola cha, kweni atiyiŵika pachakuŵikapu nyali ndipu yimbulikiya wosi wo ŵe munyumba yo. 16  Mwakuyanana ŵaka, longoni ukweru winu ku ŵanthu wosi kuti awoni ntchitu zinu zamampha ndi kuti akankhuski Awusemwi wo ŵe kuchanya. 17  “Mungaŵanaŵananga cha kuti ndikuziya kuzinanga Dangu* pamwenga Vakulemba va Achimi.* Ndikuziya kuzinanga cha kweni kuzifiska. 18  Nditikuneneskiyani kuti kuchanya ndi charu chapasi vingatuwapu kwambula kusuzga, kweni kalembu kamoza kamana ukongwa pamwenga kachigaŵa kamoza ka chilembu cha mu Dangu* kangatuwamu cha mpaka po vinthu vosi vafiskikiya. 19  Munthu weyosi yo waleka kulondo limoza mwa marangu ngamanangamana yanga ndipu wasambiza anyaki kuti nawu achitengi viyo, ngwambula kwenere kuzisere* mu Ufumu wakuchanya. Kweni yo watingalondo ndi kungasambiza ngwakwenere kuzisere* mu Ufumu wakuchanya. 20  Chifukwa nditikukambiyani kuti, asani urunji winu uleka kuluska wa alembi ndi Afarisi, mwazamuserepu cha mu Ufumu wakuchanya. 21  “Mukuvwa kuti ŵanthu akali anguŵakambiya kuti: ‘Ungabayanga munthu cha, chifukwa weyosi yo wabaya munthu wazamuyeruzgika kukhoti la milandu.’ 22  Kweni ini nditikukambiyani kuti, weyosi yo walutirizga kukwiyiya mubali waki wazamuyeruzgika kukhoti la milandu, ndipu weyosi yo wanena mubali waki ndi mazu ngaheni wazamuyeruzgika ku Khoti Likulu Ukongwa, ndipuso weyosi yo wakamba mubali waki kuti, ‘Mzeleza yiwi!’ wazamuponyeka mumotu wa ku Gehena.* 23  “Asani utuza ndi chawanangwa pamalu ngakuperekiyapu sembi,* ndipu we penipo wakumbuka kuti mubali waku we nawi ndi chifukwa, 24  leka chawanangwa chaku panthazi pa malu ngakuperekiyapu sembi, ndipu luta ku mubali waku. Chakwamba kayanjani ndi mubali waku ndipu pavuli paki ukawe so kuzipereka chawanangwa chaku. 25  “Umaliskengi liŵi nkhani ndi munthu yo watikumba mulandu, muchiluta kukhoti kuti panyaki munthu yo wangakutole kwa wakweruzga, wakweruzga wangakupereka kwa mteŵeti wa pakhoti ndipu angakuponya mujeri. 26  Nditikuneneske panu, wazamutuwamu cha mpaka po walipiriya ndalama zosi.* 27  “Mukuvwa kuti akukamba kuti: ‘Ungachitanga chigololu cha.’ 28  Kweni ini nditikukambiyani kuti weyosi yo walutirizga kulereska munthukazi mwakumukhumbira, wachita nayu kali chigololu mumtima mwaki. 29  Sonu asani jisu laku lakumaryi litikuguŵiska, ulikolowo ndi kulitaya. Chifukwa nkhwamampha kuti uleki kuja ndi chiŵalu chimoza cha liŵavu, kuluska kuti liŵavu laku losi liponyeki mu Gehena.* 30  Ndipuso asani janja laku lamaryi litikuguŵiska, ulidumuwi ndi kulitaya. Chifukwa nkhwamampha kuti uleki kuja ndi chiŵalu chimoza, kuluska kuti liŵavu laku losi liponyeki mu Gehena.* 31  “Kweniso akambanga kuti: ‘Weyosi yo wapata muwolu waki, wamupaski kalata yakumupatiya.’ 32  Kweni ini nditikukambiyani kuti, weyosi yo wapata muwolu waki kwambula kuti wachita malusu ngaheni ngakugonana,* wachitiska kuti munthukazi yo wachiti chigololu ndipu weyosi yo wato munthukazi wakupatika yo, nayu wachita chigololu. 33  “Mukuvwa so kuti ŵanthu akali anguŵakambiya kuti: ‘Ungalapizganga cha kwambula kufiska, kweni ufiskengi vo walayizga kwaku Yehova.’ 34  Kweni ini nditikukambiyani kuti: Uleke limu kulapizga, kwali mwakuzumbuwa kuchanya chifukwa kwe mpandu wachifumu waku Chiuta, 35  pamwenga mwakuzumbuwa charu chapasi chifukwa ntchakukandapu maphazi ngaki, pamwenga Yerusalemu chifukwa ndi tawuni ya Fumu yira. 36  Ungalapizganga cha mwakuzumbuwa mutu waku, chifukwa ungasambuska cha sisi limoza kuja lituŵa pamwenga lifipa. 37  Kweni asani wakamba kuti ‘Hinya,’ waŵi hinya ndipu asani wakamba kuti ‘Awa’ waŵi awa, ngakusazgiyapu pa mazu yanga, ngatuliya ku muheni yo. 38  “Mukuvwa kuti akukamba kuti: ‘Jisu kulipa jisu ndipuso jinu kulipa jinu.’ 39  Kweni ini nditikukambiyani kuti: Ungalimbananga ndi munthu muheni cha, kweni asani munthu wakuwomba khofi kudakama lakumaryi, mupaski so dakama linyaki. 40  Asani munthu wakhumba kukutole kukhoti kweniso wato malaya ngaku ngamukati, umupaski so malaya ngaku ngakubwalu. 41  Asani munthu munyaki waudindu wakukambiya kuti umupingiyi katundu pa mtunda wa kilomita* yimoza, umupingiyi pa mtunda wa makilomita ngaŵi. 42  Munthu yo wakupempha kanthu umupaski, ndipu asani munthu wakhumba kubwereka kanthu* kwaku yiwi ungamunolanga cha. 43  “Mukuvwa kuti akukamba kuti: ‘Uyanjengi munyaku ndipu utinkhengi murwani waku.’ 44  Kweni ini nditikukambiyani kuti: Lutirizgani kwanja arwani ŵinu ndipu mupempheriyengi ŵanthu wo atikutombozgani, 45  kuti mulongo kuti ndimwi ŵana a Awusemwi wo ŵe kuchanya, chifukwa yiwu aŵaliskiya lumwi pa ŵanthu aheni ndi amampha, ndipu awisiya vuwa ŵanthu arunji ndi ambula urunji. 46  Chifukwa asani mutanja ŵanthu wo atikuyanjani, muyanduwanji? Kumbi asi venivi ndivu ŵanthu akusonkhesa msonkhu achita? 47  Ndipu asani mutawuzga anyinu pe, mupambananji ndi ŵanthu anyaki? Asi venivi ndivu ŵanthu amitundu achita? 48  Mwaviyo, jani akufikapu* nge mo Awusemwi akuchanya aliri akufikapu.

Mazu Ngam'mphata

Pamwenga kuti, “Mbakutumbikika akavu mwauzimu.”
Pamwenga kuti, “akufwasa.”
Pamwenga kuti, “azamukhorwa.”
Pamwenga kuti, “achimangu.”
Wonani Mazu ngo Ngakonkhoskeka.
Mazu ngakuti ‘Dangu pamwenga Vakulemba va Achimi’ ngang’anamuwa Malemba nga Chiheberi ngosi.
Wonani Mazu ngo Ngakonkhoskeka.
Mazu ngaki chayingu, “wazamukuŵa mumana.”
Mazu ngaki chayingu, “wazamukuŵa mura.”
Malu ngakuwotchiyaku vimalala ngo ngenga kubwalu kwa Yerusalemu. Wonani Mazu ngo Ngakonkhoskeka.
Pamwenga kuti, “pajotcheru.”
Mazu ngaki chayingu, “kwadirani yakumaliya.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Mu Chigiriki, por·neiʹa. Wonani Mazu ngo Ngakonkhoskeka.
Mazu ngaki chayingu, “mayelu.”
Kung’anamuwa kubwereka kwambula kuzisazgiyapu chechosi pakuweza.
Pamwenga kuti, “akukwana.”